Uban sa Babaye sa Atabay

SI Jesus mihunong sa pagpahulay daplin sa atabay sa Samaria. Ang iyang mga tinun-an nangadto sa lungsod sa pagpalit pagkaon. Ang babaye nga gipakigsultihan ni Jesus mianha sa pagkuhag tubig. Mihangyo siya kaniya nga moinom.

Kadaghanan sa mga Hudiyo dili gusto sa mga Samarianhon. Busa ang babaye nahibulong sa dihang nakigsulti si Jesus kaniya. Apan si Jesus nahigugma sa tanang matang sa mga tawo. Matod niya: ‘Kon ikaw nahibalo kon kinsa ang naghangyo kanimo nga makainom, ikaw mohangyo kaniya ug siya mohatag kanimo sa makahatag-kinabuhi nga tubig.’

‘Ginoo,’ matod sa babaye, ‘Wala ka gani bisan timba ug ang atabay lalom. Asa man nimo kuhaa kining makahatag-kinabuhi nga tubig?’

Miingon si Jesus: ‘Kon ikaw moinom ug tubig ning atabaya, ikaw uhawon pag-usab. Apan ako makahatag ug tubig nga makahimo sa tawo nga mabuhi sa walay kataposan.’

‘Ginoo, miingon ang babaye, ‘Hatagi ako niining tubiga! Unya ako dili na moanhi dinhi sa pagkuhag tubig pa.’

Ang babaye naghunahuna nga si Jesus nagsulti kaniya mahitungod sa tinuod nga tubig. Apan siya nagsulti mahitungod sa kamatuoran labot sa Diyos ug sa iyang gingharian. Kining kamatuorana maoy sama sa makahatag-kinabuhi nga tubig.

Si Jesus karon misugo sa babaye: ‘Lakaw ug tawga ang imong bana.’

‘Wala akoy bana,’ siya mitubag.

‘Tinuod kana,’ miingon si Jesus. ‘Apan ikaw may lima ka bana. Ug ang lalaki nga imong gikapuyo karon dili imong bana.’

Ang babaye natingala, tungod kay matuod kini. Si Jesus nahibalo niining tanan tungod kay siya mao ang Sinaad nga Usa nga gipadala sa Diyos. Ang Diyos naghatag kaniya niining kasayorana. Ang mga disipulo karon ni Jesus nahibalik, ug natingala sa pagkakaplag kang Jesus nga nagpakigsulti sa usa ka Samarianhong babaye.

Gikan niini atong makita nga si Jesus maluluy-on sa katawhan sa tanang rasa. Ug kinahanglan usab kita. Si Jesus gusto nga ang tanang katawhan mahibalo sa kamatuoran nga motultol ngadto sa kinabuhing walay kataposan. Ug kita usab kinahanglang magtinguha sa pagtabang sa katawhan nga makakat-on sa kamatuoran.