Kinabuhi ug Ministeryo ni Jesus

Pagtudlo sa Usa ka Babayeng Samarianhon

SA ILANG pagpaingon sa Galilea gikan sa Judea, si Jesus ug iyang mga tinun-an miagi sa distrito sa Samaria. Kay gikapoy sa biyahe, sa mga udto sila mihunong aron mopahulay sa daplin sa atabay duol sa siyudad sa Sicar. Kining atabaya gikalot kasiglohang miagi ni Jacob, ug kini nagapabilin bisan hangtod karong adlawa, duol sa modernong-adlaw nga siyudad sa Nablus.

Samtang si Jesus mipahulay didto, ang iyang mga tinun-an nangadto sa siyudad aron mopalit ug pagkaon. Sa miabot ang usa ka babayeng Samarianhon aron mokalos ug tubig, siya mihangyo: “Paimna ra ako.”

Ang mga Hudiyo ug mga Samarianhon sa linangkob dili makiglabot sa usag usa tungod sa nakadulot nga mga pagpihigpihig. Busa, sa katingala, ang babaye nangutana: “Naunsa ba nga ikaw, bisan pag Hudiyo, nangayog mainom, sa dihang ako usa man ka babayeng Samarianhon?”

Si Jesus mitubag nga kon siya nasayod pa kon kinsa siya, siya mangayo unta sa “buhing tubig.” Kining tubiga, siya miingon, mamahimong “usa ka tuboran sa tubig nga magapatubod ug kinabuhing walay kataposan.”

“Senyor, hatagi ako niining tubiga,” mitubag ang babaye.

Si Jesus niana miingon: “Lakaw, tawga ang imong bana.”

“Wala akoy bana,” siya mitubag.

Giuyonan ni Jesus ang iyang mga pulong. “Husto ang imong giingon, ‘Ikaw walay bana.’ Kay ikaw may lima na ka bana, ug ang lalaki nga imong gikaipon karon dili man imong bana.”

“Senyor, naila ko nga ikaw usa ka propeta,” ang babaye miingon nga natingala. Sa pagpadayag sa iyang espirituhanong pagkamaikagon, siya miingon nga ang mga Samarianhon nagsimba sa Bukid sa Gerizim, apan ang mga Hudiyo sa Jerusalem.

Apan ang dapit sa pagsimba dili mao ang importanteng butang, mipunting si Jesus. “Ang Diyos usa ka Espiritu,” siya misaysay, “ug ang mga nagasimba kaniya kinahanglang magsimba sa espiritu ug sa kamatuoran.”

Ang babaye dulot nahingangha. “Ako nasayod nga umaabot ang Mesiyas, nga ginatawag Kristo,” siya miingon. “Inig-abot na niya, igasaysay niya kanato ang tanang butang sa dayag.”

“Ako nga nakigsulti kanimo mao siya,” mipahayag si Jesus. Hunahunaa kana! Kining bayhana mianha sa udto sa pagkalos ug tubig, tingali aron dili makakontak sa mga babaye sa lungsod nga nagtamay kaniya tungod sa iyang pagkinabuhi, gipaboran sa kahibulongang paagi ni Jesus. Sa laktoray iyang gisultihan siya sa butang wala niya isulti sa dayag kang bisan kinsa. Unsay sangpotanan? Ang artikulo sa sunod namong isyu ang mosaysay. Juan 4:3-26.

◆ Nganong ang babayeng Samarianhon natingala nga nakigsulti si Jesus kaniya?

◆ Unsay gitudlo kaniya ni Jesus mahitungod sa buhing tubig ug kon asa mosimba?

◆ Giunsa pagpadayag ni Jesus kaniya kon kinsa siya, ug nganong ang maong pagpadayag katingalahan kaayo?

[Bug-os-panid nga letrato sa panid 9]