Leksiyon 11

Mga Tinuohan ug mga Kostumbre nga Dili Makapahimuot sa Diyos

Unsang matang sa mga tinuohan ug mga kostumbre ang daotan? (1)

Angay bang tuohan sa mga Kristohanon nga ang Diyos usa ka Trinidad? (2)

Nganong ang matuod nga mga Kristohanon dili magsaulog ug Pasko, Easter, o mga adlawng-natawhan? (3, 4)

Ang mga patay ba makadaot sa mga buhi? (5)

Namatay ba si Jesus sa usa ka krus? (6)

Unsa ka hinungdanon nga pahimut-an ang Diyos? (7)

1. Dili daotan ang tanang tinuohan ug mga kostumbre. Apan ang Diyos dili mouyon niana kon naggikan kana sa bakak nga relihiyon o nahasupak sa mga pagtulon-an sa Bibliya.​—Mateo 15:6.

2. Trinidad: Si Jehova ba usa ka Trinidad​—tulo ka persona sa usa ka Diyos? Dili! Si Jehova, ang Amahan, mao “ang bugtong matuod nga Diyos.” (Juan 17:3; Marcos 12:29) Si Jesus mao ang Iyang panganay nga Anak, ug siya maoy ubos sa Diyos. (1 Corinto 11:3) Ang Amahan labaw kay sa Anak. (Juan 14:28) Ang balaang espiritu dili usa ka persona; kini maoy aktibong puwersa sa Diyos.​—Genesis 1:2; Buhat 2:18.

3. Pasko ug Easter: Si Jesus wala matawo sa Disyembre 25. Siya natawo sa mga Oktubre 1, usa ka panahon sa tuig sa dihang ang mga magbalantay sa kahayopan naghupot sa ilang kahayopan sa gawas sa magabii. (Lucas 2:​8-12) Wala gayod isugo ni Jesus nga ang mga Kristohanon magsaulog sa iyang pagkatawo. Hinunoa, gisugo niya ang iyang mga tinun-an nga handomon, o hinumdoman, ang iyang kamatayon. (Lucas 22:​19, 20) Ang Pasko ug ang mga kostumbre niini naggikan sa karaang bakak nga mga relihiyon. Maingon man usab ang mga kostumbre sa Easter, sama sa paggamit sa mga itlog ug mga koneho. Ang unang mga Kristohanon wala magsaulog ug Pasko o Easter, ni ang matuod nga mga Kristohanon magsaulog karong adlawa.

4. Mga Adlawng-Natawhan: Ang duha lamang ka pagsaulog sa adlawng-natawhan nga gihisgotan sa Bibliya gihimo sa mga tawo nga wala magsimba kang Jehova. (Genesis 40:​20-22; Marcos 6:​21, 22, 24-27) Wala magsaulog ug mga adlawng-natawhan ang unang mga Kristohanon. Ang kostumbre sa pagsaulog ug mga adlawng-natawhan naggikan sa karaang bakak nga mga relihiyon. Ang matuod nga mga Kristohanon mohatag ug mga regalo ug adunay mga paglipaylipay nga magkauban sa ubang mga panahon sa tuig.

5. Kahadlok sa mga Patay: Ang mga patay wala nay mahimo nga bisan unsa ni mobati pa. Dili kita makatabang kanila, ug dili sila makahimog kadaot kanato. (Salmo 146:4; Ecclesiastes 9:​5, 10) Ang kalag mamatay; dili kini magpadayong buhi human sa kamatayon. (Ezekiel 18:4) Apan ang tuman-kadaotang mga manulonda, nga gitawag ug mga demonyo, usahay magpakaaron-ingnong mga espiritu sa mga patay. Ang bisan unsang mga kostumbre nga may kalabotan sa pagkahadlok o pagsimba sa mga patay maoy sayop.​—Isaias 8:19.

6. Krus: Si Jesus wala mamatay sa usa ka krus. Siya namatay sa usa ka poste, o sa usa ka estaka. Ang Gregong pulong nga gihubad ug “krus” diha sa daghang Bibliya nagkahulogan lamang sa usa ka buok nga kahoy. Ang simbolo sa krus naggikan sa karaang bakak nga mga relihiyon. Ang krus wala gamita o simbaha sa unang mga Kristohanon. Busa, sa imong hunahuna husto ba nga gamiton ang krus sa pagsimba?​—Deuteronomio 7:26; 1 Corinto 10:14.

7. Tingali lisod kaayo ang pagbiya sa pipila sa maong mga tinuohan ug mga kostumbre. Basin sulayan sa mga paryente ug mga higala nga kombinsihon ka nga dili usbon ang imong mga tinuohan. Apan ang pagpahimuot sa Diyos mas mahinungdanon kay sa pagpahimuot sa mga tawo.​—Proverbio 29:25; Mateo 10:​36, 37.

[Hulagway sa panid 22]

Ang Diyos dili usa ka Trinidad

[Hulagway sa panid 23]

Ang Pasko ug Easter naggikan sa karaang bakak nga mga relihiyon

[Hulagway sa panid 23]

Walay katarongan nga simbahon ang mga patay o kahadlokan sila