Kon Asa Modangop Alang sa mga Tubag

“Ang teoriya sa walay-kataposang pagpaantos maoy sumpaki sa pagtuo diha sa gugma sa Diyos alang sa linalang nga mga butang. . . . Ang pagtuo diha sa silot nga dayon alang sa kalag tungod sa mga sala sa pila ra ka tuig, nga dili kini hatagag higayon nga matul-id, maoy pagsupak sa tanang diktar sa katarongan.”—NIKHILANANDA, PILOSOPONG HINDU.

1, 2. Tungod sa nagkadaiyang mga tinuohan bahin sa Laing-Kinabuhi, unsang mga pangutana ang motungha?

SAMA sa pilosopong Hindu nga si Nikhilananda, daghan karon ang maduhaduhaon bahin sa pagtulon-an sa way-kataposang pagpaantos. Sa samang hinungdan, malisdan ang uban sa pagsabot sa mga ideya nga sama sa pagkamakadangat sa Nirvana ug pagkamahiusa uban sa Tao.

² Bisan pa niana, tungod sa ideyang ang kalag dili mamatay, ang mga relihiyon sa Sidlakan ug sa Kasadpan nakaugmad sa makalilibog nagkadaiyang mga tinuohan bahin sa Laing-Kinabuhi. Posible bang hisayran ang kamatuoran bahin sa kon unsay mahitabo kanato sa dihang mamatay kita? Tinuod bang ang kalag dili mamatay? Asa ba kita makadangop alang sa mga tubag?

Siyensiya ug Pilosopiya

3. Ang siyensiya ba o siyentipikanhong paagi sa pagsusi ang nakabaton ug mga tubag sa mga pangutana mahitungod sa kinabuhi luyo sa kamatayon?

³ Anaa ba sa siyensiya o sa siyentipikanhong paagi sa pagsusi ang mga tubag sa mga pangutana labot sa Laing-Kinabuhi? Nga gipasukad sa bag-ong mga asoy bahin sa pag-ungaw sa kamatayon o ‘gawas sa lawas’ nga mga kasinatian, ang pipila ka tigdukiduki misulay paghatag ug mga pahayag bahin sa kinabuhi luyo sa kamatayon. Sa pagsubli sa pipila nila ka pangangkon diha sa iyang lekturang “Kamatayon Ingong Pagsulod sa Kahayag?,” ang Katolikong teologo nga si Hans Küng mihinapos: “Kanang matanga sa mga kasinatian walay bisan unsang gipamatud-an bahin sa posibleng kinabuhi human sa kamatayon: kini pangutana bahin sa kataposang lima ka minutos una sa kamatayon ug dili sa kinabuhing dayon human sa kamatayon.” Midugang siya: “Ang pangutana bahin sa posibleng kinabuhi human sa kamatayon labihan ka bililhon alang sa kinabuhi una sa kamatayon. Kini nagkinahanglag tubag nga angayng pangitaon sa laing dapit kon dili kini ikahatag sa medisina.”

4. Ang pilosopiya ba makatabang kanato pagkaplag sa mga tubag taliwala sa daghang posibilidad sa laing-kinabuhi nga gitanyag sa nagkalainlaing mga relihiyon?

⁴ Unsa na man ang pilosopiya? Makatabang ba kini kanato sa pagkaplag sa mga tubag taliwala sa daghang posibilidad sa laing-kinabuhi nga gitanyag sa nagkalainlaing mga relihiyon? Ang pilosopikanhong pagsusi naglakip sa “mapangagpasong kalihokan,” matod sa Britanikong pilosopo sa ika-20ng siglo nga si Bertrand Russell. Ang pilosopiya, sumala sa The World Book Encyclopedia, maoy “usa ka porma sa pagsukitsukit​—usa ka proseso sa pag-analisar, pagsaway, pag-interpretar, ug pagpangagpas.” Bahin sa topikong Laing-Kinabuhi, ang pilosopikanhong mga pangagpas nagkadaiya gikan sa pagtawag sa imortalidad o kawalay-kamatayon nga pangandoy lamang ngadto sa pagpahayag niana ingong kinaiyanhong katungod sa matag tawo.

Usa ka Talagsaong Tinubdan sa mga Tubag

5. Unsa ang labing karaang basahon nga nasulat sukad?

⁵ Hinunoa, adunay usa ka basahong naundan sa matuod nga mga tubag sa hinungdanong mga pangutana bahin sa kinabuhi ug sa kamatayon. Kini ang labing karaang basahon nga nasulat sukad, nga ang mga bahin niini gisulat mga 3,500 ka tuig kanhi. Ang unang bahin niining basahona nasulat pipila ka siglo una mahan-ay ang kinasayohang mga himno sa Hindu nga kasulatan, ang mga Veda, ug mga usa ka libo ka tuig una mabuhi sa yuta si Budha, Mahāvīra, ug Confucius. Kining basahona nakompleto sa 98 K.P., kapig 500 ka tuig una matukod ni Muḥammad ang Islam. Kining talagsaong tinubdan sa labawng kaalam mao ang Bibliya.a

6. Nganong makadahom kita nga ang Bibliya motug-an kanato kon unsa ang kalag?

⁶ Ang Bibliya naundan sa labing tukmang karaang kasaysayan kay sa bisan unsang basahon nga naglungtad. Ang kasaysayang natala diha sa Bibliya mobalik ngadto sa sinugdan sa tawhanong pamilya ug nagsaysay kon sa unsang paagi kita nakaabot dinhi sa yuta. Magdala gani kini kanato balik sa panahong wala pa lalanga ang mga tawo. Ang ingong basahon makahatag gayod kanatog katin-awan kon sa unsang paagi ang tawo gibuhat ug kon unsa ang kalag.

7, 8. Nganong makadangop kitang masaligon sa Bibliya alang sa matuod ug makapatagbawng mga tubag bahin sa kon unsay mahitabo sa dihang mamatay kita?

⁷ Dugang pa, ang Bibliya maoy basahon sa mga tagna nga sa way-sipyat nangatuman. Pananglitan, kini nagtagnang detalyado kaayo sa pagtungha ug pagkapukan sa Medo-Persianhon ug Gresyanhong mga imperyo. Kining mga pulonga tukma kaayo nga ang pila ka kritiko misulay, nga wala molampos, sa pagpamatuod nga sila nasulat human sa mga panghitabo. (Daniel 8:​1-7, 20-22) Ang pila ka tagnang natala diha sa Bibliya detalyadong nangatuman sa atong panahon mismo.b​—Mateo, kapitulo 24; Marcos, kapitulo 13; Lucas, kapitulo 21; 2 Timoteo 3:​1-5, 13.

⁸ Walay tawo, bisan unsa ka intelihente, ang makatagnang tukma kaayo sa umaabot nga mga panghitabo. Ang gamhanan-sa-tanan ug maalamon-sa-tanan lamang nga Maglalalang sa uniberso ang makahimo. (2 Timoteo 3:​16, 17; 2 Pedro 1:​20, 21) Ang Bibliya sa pagkatinuod maoy basahong gikan sa Diyos. Segurado, ang ingong basahon makahatag kanatog matuod ug makapatagbawng mga tubag bahin sa kon unsay mahitabo kanato sa dihang kita mamatay. Ato unang tan-awon kon unsay gisulti niini bahin sa kalag.

[Mga footnote]

[Hulagway sa panid 18]

Ang labing karaang basahon nga nasulat sukad

[Hulagway sa panid 18]

Usa ka basahong mohatag sa kasaligan ug makapatagbawng mga tubag