“Tagda Kon Giunsa Ninyo Pagpatalinghog”

ANG pagpatalinghog maoy usa ka bililhong tabang sa pagkakat-on. Kini makaapektar usab sa paglaom sa kaluwasan sa usa ka tawo. Sa dihang si Jehova nangandam sa pagpagawas sa iyang katawhan gikan sa kaulipnan sa Ehipto, mihatag siyag mga instruksiyon kang Moises, kinsa misulti sa mga ansiyano sa Israel kon unsay ilang pagabuhaton aron ang ilang panganay maluwas gikan sa tiglaglag nga manulonda. (Ex. 12:21-23) Unya ang mga ansiyano maoy nagpahibalo niining impormasyona ngadto sa matag panimalay. Kadto gihimo sa binaba nga paagi. Ang katawhan kinahanglang magpatalinghog pag-ayo. Unsay ilang sanong? Ang Bibliya nagtaho: “Ang tanang anak sa Israel nagbuhat ingon sa gisugo ni Jehova kang Moises ug kang Aaron. Ilang gibuhat ang ingon gayod.” (Ex. 12:​28, 50, 51) Ingong resulta, ang Israel nakasinatig makapahingangha nga pagkaluwas.

Karong adlawa, si Jehova nagaandam kanato alang sa labi pang dakong pagkaluwas. Segurado, ang instruksiyong iyang gitagana takos sa atong seryosong pagtagad. Ang maong instruksiyon ginahatag panahon sa mga tigom sa kongregasyon. Gipahimuslan mo ba sa bug-os ang maong mga tigom? Kana nag-agad ug dako kon giunsa nimo pagpatalinghog.

Makahinumdom ka ba sa dagkong mga punto nga ginatudlo panahon sa mga tigom? Imo bang batasan, semana por semana, ang pagpangitag mga paagi sa pagpadapat sa instruksiyong gihatag nganha sa imong kaugalingong kinabuhi o sa pagpakig-ambit niana sa uban?

Iandam ang Imong Kasingkasing

Aron mapahimuslan sa bug-os ang instruksiyong gihatag panahon sa Kristohanong mga tigom, kinahanglang iandam nato ang atong mga kasingkasing. Ang kabililhon sa paghimo niana gipasiugda sa nahitabo sa paghari ni Haring Jehosapat sa Juda. Si Jehosapat maisogong mibarog dapig sa matuod nga pagsimba. Siya “nagkuha gayod sa hatag-as nga mga dapit ug sa sagradong mga poste gikan sa Juda” ug iyang gisugo ang mga prinsipe, mga Levihanon, ug mga saserdote sa pagtudlo sa Balaod ni Jehova ngadto sa katawhan sa tanang siyudad sa Juda. Bisan pa niana, “ang hatag-as nga mga dapit wala mahanaw.” (2 Cron. 17:6-9; 20:33) Ang pagsimba sa bakak nga mga diyos ug ang dili-awtorisadong paagi sa pagsimba kang Jehova nga ginahimo diha sa paganong hatag-as nga mga dapit nakadulot ug lalom kaayo nga wala kana mahanaw.

Nganong ang instruksiyon nga gihikay ni Jehosapat walay malungtarong impluwensiya? Ang talaan nagpadayon: “Ang katawhan wala pa mag-andam sa ilang kasingkasing alang sa Diyos sa ilang mga katigulangan.” Sila nagpatalinghog apan napakyas sa paglihok uyon niana. Tingalig ilang gibati nga lisod ang panaw paingon sa templo sa Jerusalem aron sa pagtanyag ug mga halad. Kon unsa man ugaling, ang ilang mga kasingkasing wala palihoka sa pagtuo.

Sa paglikay nga maanod ug balik sa mga paagi sa kalibotan ni Satanas, kinahanglang iandam nato ang atong mga kasingkasing sa pagdawat sa instruksiyong ginahatag ni Jehova karong adlawa. Sa unsang paagi? Usa ka bililhong paagi mao ang pag-ampo. Kita angayng mag-ampo nga dawaton nato ang balaanong instruksiyon uban ang mapasalamatong espiritu. (Sal. 27:4; 95:2) Kini makatabang kanato sa pagpabili sa mga paningkamot sa atong mga igsoong lalaki si kinsa, bisag dili-hingpit, andam nga magpagamit ni Jehova aron matudloan ang iyang katawhan. Kini modasig kanato sa pagpasalamat kang Jehova dili lang tungod sa bag-ong mga butang nga atong ginatun-an kondili tungod usab sa higayon nga makapalalom sa atong pagpabili sa mga butang nga sa nangagi atong nakat-onan. Kay may bug-os nga tinguha nga buhaton ang kabubut-on sa Diyos, kita magaampo: “Oh Jehova, tudloi ako mahitungod sa imong dalan. . . . Bug-osa ang akong kasingkasing sa pagkahadlok sa imong ngalan.”​—Sal. 86:11.

Isentro ang Imong Atensiyon

Adunay daghang babag sa pagpatalinghog natog maayo. Tingali ang atong mga kaisipan napunog mga kabalaka. Ang kalangas ug paglakawlakaw sa mamiminaw o sa gawas sa tigomanan tingalig makatugaw kanato. Tungod sa lawasnong pagkadili-komportable basin malisdan kita sa pagsentro sa atong atensiyon. Kasagarang mabahin ang atensiyon niadtong adunay mga anak. Unsay makatabang aron makapadayon kita sa pagsentro sa atong atensiyon sa programa?

Ang mga mata kusog nga makaapektar kon asa nato isentro ang atong atensiyon. Gamita ang imong mga mata aron katabangan ka sa pagsentro sa atensiyon pinaagi sa kanunay nga pagtan-aw sa mamumulong. Inigsitar niyag teksto sa Bibliya​—bisan sa tekstong sinati na—​tan-awa kini, ug sunda ang iyang pagbasa niini. Sukli ang tentasyon sa pagliso sa imong ulo sa gigikanan sa matag kalangas o paglakawlakaw. Kon ang imong mga mata magtaganag sobra nga makatugawng impormasyon sa imong kaisipan, dili ka makasabot sa kadaghanan nga ipahayag gikan sa plataporma.

Kon malisdan ka sa pagsentro sa imong atensiyon sa programa tungod sa “makapatugaw nga mga hunahuna,” ampo kang Jehova alang sa kalinaw sa hunahuna ug kasingkasing nga gikinahanglan aron magpatalinghog. (Sal. 94:19; Filip. 4:​6, 7) Kon gikinahanglan balikbalika ang paghimo niana. (Mat. 7:​7, 8) Ang mga tigom sa kongregasyon maoy usa ka tagana gikan ni Jehova. Makasalig ka nga buot niya nga makapahimulos ka niana.​—1 Juan 5:​14, 15.

Pagpatalinghog sa mga Pakigpulong

Lagmit gayod, makahinumdom ka sa paboritong mga punto nga imong nadunggan sa mga pakigpulong. Bisan pa niana, ang pagpatalinghog sa usa ka pakigpulong dili lang pagtigom ug talagsaong mga punto. Ang usa ka pakigpulong maoy sama sa usa ka panaw. Bisan pag aduna tingaliy daghang makaiikag nga mga butang nga malantaw ubay sa dalan, ang hinungdanon mao ang destinasyon, ang tumong. Ang mamumulong mahimong naningkamot nga agakon ang mamiminaw ngadto sa tinong panghinapos o dasigon sila nga molihok.

Tagda ang pakigpulong nga gipahayag ni Josue ngadto sa nasod sa Israel, nga natala sa Josue 24:1-15. Ang iyang tumong mao ang pagdasig sa mga tawo sa pagbarog nga walay pagkompromiso dapig sa matuod nga pagsimba pinaagi sa pagbulag sa bug-os sa ilang kaugalingon gikan sa pagsimbag diyosdiyos sa mga nasod sa silinganan. Nganong hinungdanon kaayo kadto? Ang kaylap nga bakak nga pagsimba maoy seryosong hulga sa maayong baroganan sa nasod uban ni Jehova. Ang katawhan mitubag sa hangyo ni Josue sa pag-ingon: “Halayo ra alang kanamo nga mobiya kang Jehova aron moalagad sa ubang mga diyos. . . . Kami mag-alagad kang Jehova.” Ug sila nagbuhat gayod niana!​—Jos. 24:​16, 18, 31.

Samtang nagpatalinghog ka sa usa ka pakigpulong, paningkamoting masabtan ang tumong niini. Hunahunaa kon sa unsang paagi ang mga punto nga gipagawas sa mamumulong nagtabang sa pagkab-ot sa maong tumong. Suknaa ang imong kaugalingon kon unsay giawhag sa impormasyon nga imong pagabuhaton.

Pagpatalinghog Panahon sa mga Panaghisgot

Ang Pagtuon sa Bantayanang Torre, ang Pagtuon sa Libro sa Kongregasyon, ug ang mga bahin sa Tigom sa Pag-alagad gidumala ingong pangutana-ug-tubag nga mga panaghisgot sa pinatik nga impormasyong binase sa Bibliya.

Ang pagpatalinghog panahon sa panaghisgot, sa pipila ka bahin, maoy sama sa pagpakig-ambit sa kabildohay. Aron makapahimulos sa bug-os, patalinghog ug maayo. Panid-i ang direksiyon sa panaghisgot. Matikdi kon giunsa pagpasiugda sa tigdumala ang tema ug pangunang mga punto. Tubaga diha sa hunahuna ang iyang mga pangutana. Patalinghog samtang ipatin-aw ug ipadapat sa uban ang impormasyon. Ang pagtagad sa impormasyon gikan sa panglantaw sa uban basin mohatag kanimog bag-ong pagsabot sa sinati nga ulohan. Tampo sa pagbayloay ug mga opinyon pinaagi sa paghatag sa imong mga pahayag sa pagtuo.​—Roma 1:12.

Ang abanteng pagtuon sa naasayn nga materyal motabang kanimo sa pagsentro sa atensiyon nganha sa panaghisgot ug sa pagpamati sa mga komento sa uban. Kon tungod sa imong kahimtang lisod nga matun-an sa bug-os ang materyal, labing menos gugola ang pipila ka minutos aron makuha ang sumaryo sa impormasyon sa wala pay tigom. Ang paghimo niini makapaarang nimo sa pagkat-on ug daghan gikan sa panaghisgot.

Pagpatalinghog Panahon sa mga Asembliya ug mga Kombensiyon

Panahon sa mga asembliya ug mga kombensiyon, lagmit mas daghan ang mga kabaldahan kay sa panahon sa mga tigom sa kongregasyon. Kini mas makapalisod sa pagpatalinghog. Unsay makatabang kanato?

Usa ka butang nga makatabang ug dako mao ang pagbatog igong pahulay sa gabii. Sa dili pa mosugod ang programa, sa matag adlaw, itisok sa hunahuna ang tema. Tan-awa ang ulohan sa matag pakigpulong, ug sulayi ang pagdahom sa ipahayag. Gamita kanunay ang imong Bibliya. Ang daghan nakadiskobre nga ang pagsulat ug mugbong mga nota sa dagkong mga punto motabang kanila sa pagsentro sa ilang mga hunahuna diha sa programa. Isulat ang instruksiyon nga imong giplanong ipadapat sa imong kinabuhi ug ministeryo. Hisgoti ang pipila ka punto samtang magngadto-nganhi ka sa dapit sa asembliya kada adlaw. Makatabang kini kanimo sa paghinumdom sa impormasyon.

Pagbansay sa mga Bata sa Pagpatalinghog

Ang Kristohanong mga ginikanan makatabang sa ilang mga bata​—bisan sa mga masuso—​nga mahimong “maalamon alang sa kaluwasan” pinaagi sa pagdala kanila sa mga tigom sa kongregasyon, mga asembliya, ug mga kombensiyon. (2 Tim. 3:15) Sanglit ang mga bata lainlaig kinaiya ug gidugayon sa atensiyon, ang katakos sa pag-ila gikinahanglan aron katabangan sila nga makakat-on sa pagpatalinghog ug maayo. Ang mosunod nga mga sugyot basin makatabang kanimo.

Sa balay, hikaya ang mga panahon nga ang imong mga bata maghilom sa paglingkod ug magbasa o magtan-awg mga hulagway diha sa atong Kristohanong mga basahon. Sa mga tigom, likayi nga mogamit ug mga dulaan aron sa paglingaw sa mga bata. Sama sa kahimtang sa karaang Israel, karong adlawa ang mga bata usab presente “aron sila mamati ug aron sila makakat-on.” (Deut. 31:12) Kon praktikal, ang pipila ka ginikanan motaganag personal nga mga kopya sa mga basahong ginatun-an bisan sa mga bata pa kaayo. Samtang magkadagko ang mga bata, tabangi sila sa pagpangandam nga makigbahin sa mga programang nagaawhag sa pagpakigbahin sa mamiminaw.

Ang Kasulatan nagpadayag sa suod nga koneksiyon tali sa pagpatalinghog kang Jehova ug sa pagkamasinugtanon kaniya. Makita kini sa mga pulong ni Moises ngadto sa nasod sa Israel: “Gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi . . . pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya.” (Deut. 30:​19, 20) Karong adlawa, ang pagpamati sa instruksiyong gitagana ni Jehova ug masinugtanong pagpadapat niana sa atong kinabuhi kinahanglanon aron maangkon ang pag-uyon sa Diyos ug ang panalangin sa kinabuhing walay kataposan. Nan, pagkahinungdanon nga atong pamation ang tambag ni Jesus: “Tagda kon giunsa ninyo pagpatalinghog”!​—Luc. 8:18.