“Magpatalinghog ug Magadawat ug Dugang nga Pagtudlo”
1 Ang basahon sa Proverbio naglarawan sa kaalam ingong nagatawag: “Patalinghog, kay nagasulti ako mahitungod sa pangunang mga butang, ug mahitungod sa katul-id ang ginabungat sa akong mga ngabil. Ako adunay tambag ug praktikal nga kaalam. . . . Patalinghog kanako; oo, malipayon silang nagasubay sa akong mga dalan. Kay siya nga makakaplag kanako makakaplag ug kinabuhi, ug makabaton ug maayong kabubut-on gikan ni Jehova.” (Prov. 8:6, 14, 32, 35) Kanang mga pulonga naghubit pag-ayo sa instruksiyon nga naghulat kanato sa “Mga Magtutudlo sa Pulong sa Diyos” Distritong Kombensiyon.
2 Ang mga panginahanglan sa tibuok-kalibotang panag-igsoonay gianalisar, ug ang programa sa kombensiyon giandam aron tagdon ang maong mga panginahanglan. Ang espirituwal nga instruksiyon ug praktikal nga mga sugyot nga ihatag, kon ipadapat, makatabang kanato nga magmalipayon, mahuptan ang maayong relasyon uban kang Jehova, ug magpabilin sa dalan padulong sa kinabuhing walay kataposan. Dayag, kita adunay maayong katarongan nga “magpatalinghog ug magadawat ug dugang nga pagtudlo.”—Prov. 1:5.
3 Sa Dili pa ang Programa: Aron makakuhag bug-os nga kaayohan gikan sa kon unsay itanyag, kinahanglang anaa na kita sa atong mga lingkoranan ug anaa sa hustong kahimtang sa panghunahuna sa dihang magsugod na ang programa. Nagkinahanglan kinig maayong personal nga pag-organisar. Ang usa ka yawing bahin mao ang pagsugod ug sayo. Pahulay ug sayo sa gabii sa dili pa ang kombensiyon. Bangon ug sayo aron igo pang makapangandam ang tanan sa inyong grupo ug makahikay ug pagkaon. Moabot nga sayo sa dapit sa kombensiyon aron makakitag kalingkoran ug maatiman ang gikinahanglang mga butang sa dili pa magsugod ang programa.
4 Sanglit ang pangunang katuyoan sa panagkatigom mao man ang pagdayeg kang Jehova “taliwala sa mga nagkatigom nga panon,” ang matag sesyon pagasugdan sa paagi nga magabayaw sa atong Diyos. (Sal. 26:12) Sa maong katuyoan, ang tanan gidasig sa paglingkod sa dili pa ipahibalo ang pangbukas nga awit. Nahiuyon kini sa tambag sa Kasulatan: “Himoa ang tanang butang nga may kahapsay ug pinaagig kahikayan.” (1 Cor. 14:40) Unsay gipasabot niana alang sa matag usa kanato? Sa dihang makita nimo ang tsirman nga naglingkod na sa plataporma panahon sa pasiunang musika, lingkod na dayon. Kini magtugot kanimo sa pagduyog nga kinasingkasing sa awit nga magbukas sa matag sesyon, nga nagpatugbaw ug pagdayeg ngadto kang Jehova.—Sal. 149:1.
5 Panahon sa Programa: Si Esdras ‘miandam sa iyang kasingkasing sa pagkonsulta sa balaod ni Jehova ug sa pagbuhat niini.’ (Esd. 7:10) Sa unsang paagi maandam nato ang atong mga kasingkasing sa pagdawat sa instruksiyon nga gitagana ni Jehova? Samtang sublion mo ang mga ulohan sa lainlaing mga bahin nga gilista sa pinatik nga programa, pangutan-a ang imong kaugalingon, ‘Unsay ginasulti ni Jehova kanako pinaagi niining programaha? Sa unsang paagi magamit ko ang impormasyon aron makabenepisyo ang akong kaugalingon ug ang akong pamilya?’ (Isa. 30:21; Efe. 5:17) Ipadayon ang pagsukna sa maong mga pangutana sa tibuok kombensiyon. Paghimog nota sa mga puntos nga giplanohan nimong gamiton. Paggahin ug panahon aron hisgotan kana sa kataposan sa mga sesyon sa kada adlaw. Magtabang kini nimo nga mahinumdoman ug mapadapat ang impormasyon.
6 Ang pagsentro sa pagtagad sa ubay-ubayng oras sa usa ka panahon mahimong usa ka suliran. Unsay makatabang kanato sa pagsukol sa kiling nga maanod sa mental nga paagi? Pahimusli ang gahom sa mata. Sa dakong bahin, kon unsay gipunting sa atong mga mata mopaduso sa atong pagtagad. (Mat. 6:22) Busa, sukli ang agda sa paglingi sa matag kasikas o lihok. Isentro kanunay ang imong mga mata sa mamumulong. Sundi sa imong kopya sa Bibliya sa dihang may kasulatang basahon, ug ipabiling bukas ang imong Bibliya samtang ang teksto ginahisgotan.
7 Ang Kristohanong gugma magtukmod kanato nga likayan ang pagbalda sa uban samtang ang programa nagpadayon. (1 Cor. 13:5) Kini maoy “panahon sa paghilom” ug pagpatalinghog. (Eccl. 3:7) Busa, likayi ang wala-kinahanglanang pagpakig-estorya ug paglakawlakaw. Menosi ang pagngadto-ngari sa kasilyas pinaagig abanteng pagplano. Ayaw pagkaon o pag-inom hangtod sa gitakdang panahon, gawas kon nalangkit ang seryosong mga kahimtang sa panglawas. Kadtong magdalag mga cellular phone, pager, camcorder, ug mga kamera dili angayng maggamit niini sa paagi nga makabalda sa uban. Ang mga ginikanan angayng maghikay alang sa ilang tibuok pamilya—lakip ang mga tin-edyer—nga magkauban sa paglingkod aron ilang madumala pag-ayo ang ilang mga anak.—Prov. 29:15.
8 Sa miaging tuig ang usa ka ansiyano nga mitambong ug mga kombensiyon sa daghang dekada nakapaniid: “Nagtuo ako nga kining kombensiyona maoy talagsaon sa laing katarongan. Halos tanang mamiminaw nagkuhag mga nota, lakip ang gagmayng mga bata. Kaanindot tan-awon kadto. Gigamit gayod ang Bibliya sa dihang ang mga mamumulong nag-agda kanila sa pagbukas ngadto sa tinong mga teksto.” Ang maong atentibong pagpatalinghog maoy dalayegon gayod. Dili lang kana magdalag mga kaayohan nganhi kanato ug sa atong kaubanang mga delegado sa kombensiyon kondili labaw sa tanan maghimaya sa atong Dakong Instruktor, si Jehova nga Diyos.—Isa. 30:20.