Panagkatigom Aron Dayegon si Jehova
1. Unsay tema sa kombensiyon, ug nganong si Jehova takos sa atong pagdayeg?
1 Si Jehova maoy labing gamhanan sa gahom, dili matukib sa kaalam, hingpit sa hustisya, ug ang personipikasyon sa gugma. Ingong Maglalalang, Maghahatag-Kinabuhi, ug Unibersohanong Soberano, siya lamang ang takos sa atong pagsimba. (Sal. 36:9; Pin. 4:11; 15:3, 4) Ang “Himayaa ang Diyos” nga Distritong Kombensiyon niining tuiga magpalig-on sa atong determinasyon sa pagdayeg kaniya ingong ang bugtong matuod nga Diyos.—Sal. 86:8-10.
2, 3. Sa unsang paagi ang maayong pagplano makapaarang kanato nga bug-os nga makabenepisyo?
2 Gikinahanglan ang Maayong Pagplano: Aron bug-os kitang makabenepisyo sa espirituwal nga bangkete nga giandam ni Jehova, hinungdanon ang maayong pagplano. (Efe. 5:15, 16) Imo na bang nakompleto ang imong mga kahikayan alang sa puy-anan, sakyanan, ug bakasyon sa trabaho o pag-eskuyla? Ayawg himoa kining hinungdanong mga butang nga apeke na sa panahon. Kon maglangaylangay ka sa paghangyog bakasyon, mahimong masayloan nimo ang usa ka bahin niining malipayong okasyon. Kitang tanan kinahanglang presente sa matag sesyon.
3 Himoang tumong ang pag-abot nga sayo sa dapit sa kombensiyon matag adlaw. Makapaarang kana kanimo sa pagpahimutang sa imong lingkoranan sa dili pa ang pangbukas nga awit ug makatabang kanimo nga maanaa sa hustong tinamdan sa hunahuna sa pagdawat sa instruksiyon nga ipresentar. Ang programa magsugod sa alas 8:30 s.b. sa Biyernes ug Sabado, ug sa alas 9:00 s.b. sa Dominggo. Palihog ireserba lamang ang mga lingkoranan alang sa imong pamilya o sa mga kauban sa sakyanan.
4. Nganong gihangyo nga kitang tanan magdalag paniudto ngadto sa kombensiyon?
4 Gihangyo nga ang tanan magdalag paniudto imbes mobiya sa dapit sa kombensiyon aron mamalit ug pagkaon panahon sa tingpaniudto. Ang inyong kooperasyon maylabot niini nga kahikayan makaamot sa malinawong palibot ug magtugot ug dugang panahon alang sa asosasyon uban sa mga isigkamagtutuo. (Sal. 133:1-3) Palihog hinumdomi nga ang mga sudlanang mabuakon ug alkoholikong mga ilimnon wala tugoti didto sa mga pasilidad sa kombensiyon.
5. Sa unsang paagi kita makasugod sa pag-andam sa atong kasingkasing alang sa kombensiyon?
5 Paminaw ug Pagkat-on: Si Esdras mainampoong nag-andam sa iyang kasingkasing sa pagdawat sa pulong sa Diyos. (Esd. 7:10) Iyang gikiling ang iyang kasingkasing ngadto sa mga pagtulon-an ni Jehova. (Prov. 2:2) Kita makasugod sa pag-andam sa atong kasingkasing alang sa kombensiyon bisan sa dili pa mobiya sa balay pinaagi sa pagpalandong sa tema sa kombensiyon ug paghisgot niana uban sa atong pamilya.
6. Unsay makatabang kanato sa paghupot sa atong konsentrasyon nganha sa programa? (Tan-awa ang kahon.)
6 Diha sa usa ka dakong awditoryum, mahimong adunay daghang makita ug madungog nga makapalinga sa atong atensiyon. Ang maong mga kabaldahan dali rang makawala sa atong konsentrasyon sa mamumulong. Kon mahitabo kana, ang bililhong impormasyon mawala. Ang mga sugyot nga makita sa nagauban nga kahon makatabang kanato sa pagpauswag sa atong konsentrasyon.
7, 8. Sa unsang paagi kita makapakitag konsiderasyon sa uban?
7 Pagpakitag Konsiderasyon sa Uban: Ang mga kamera ug mga camcorder mahimong gamiton panahon sa programa, apan aron malikayan nga makabalda sa uban, gamita lamang kana diha sa imong gilingkoran. Ang mga cell phone ug mga pager mas maayong patyon aron dili makadisturbo sa uban. Walay personal nga gamit ang angayng ikonektar nganha sa mga sistema sa elektrikal o sound didto sa dapit sa kombensiyon.
8 Naghinamhinam na gayod kita nga magkatigom aron sa pagdayeg kang Jehova! Hinaot determinado kita sa paghimaya kaniya pinaagi sa pagtambong sa matag sesyon, pagpaminaw pag-ayo, ug pagpadapat sa atong makat-onan.—Deut. 31:12.
[Kahon sa panid 3]
Pagpaminaw Didto sa mga Kombensiyon
▪ Palandonga ang mga ulohan sa pakigpulong
▪ Tan-awa ang mga teksto
▪ Pagkuhag mugbong mga nota
▪ Ilain ang mga punto nga gustong ipadapat
▪ Repasoha ang imong nakat-onan