1999-2000 “Matagnaong Pulong sa Diyos” Distritong mga Kombensiyon

¹ Sa dihang ang mga Israelinhon hapit nang mosulod sa Yutang Saad, si Moises nangaliyupo kanila nga pabilhan ang instruksiyon sa Diyos. Gisultihan niya sila: “Dili kini walay bili nga pulong alang kaninyo, kondili nagkahulogan kini sa inyong kinabuhi.” (Deut. 32:​45-​47) Dili ba kita magmapasalamaton kang Jehova nga ang atong mga kinabuhi bililhon kaayo ngadto kaniya nga siya padayong naggiya kanato pinaagi sa iyang bililhong Pulong? Busa maikagon natong paaboton ang tulo-ka-adlaw nga “Matagnaong Pulong sa Diyos” Distritong Kombensiyon ug kon unsay itagana ni Jehova kanato.

² Niining tuiga, 52 ka distritong mga kombensiyon ang giplano nga kombenyente diha sa 46 ka lainlaing mga siyudad ug mga lungsod sa tibuok Pilipinas. Ang programa sa kombensiyon ipahigayon sa pinulongang Bicol, Cebuano, Hiligaynon, Iloko, Ingles, Pangasinan, Phil­ip­pine Sign Lan­guage, Samar-Leyte, ug Tagalog. Buot namong dasigon ang tanan sa pagtambong sa kombensiyon nga niana sila natudlo gawas kon ang talagsaong kahimtang maghimo sa eksepsiyon nga kinahanglanon. Kini ilabinang hinungdanon diha sa Tagalog nga mga kombensiyon sa ­Quezon ­City, diin ang lingkoranan ug paradahan limitado. Ang gidaghanon sa mga sirkito nga natudlo sa matag Tagalog nga kombensiyon sa As­sem­bly ­Hall igo lang alang sa kapasidad sa tigomanan, busa kon daghan kaayo ang magpunsisok, makapahasol kini kanilang natudlo nga motambong. Ang imong mahigugmaong pakigtambayayong niining bahina pabilhan ug dako.

³ Walay duhaduha ikaw mihimo na ug mga kahikayan sa pagtambong kada adlaw sa kombensiyon tungod kay ikaw nagtuo nga si Jehova nagdahom kanimo nga motambong. Magmasaligon nga iyang makita ang indibiduwal nga mga paningkamot ug mga sakripisyo nga gihimo sa iyang mga alagad sa pagtambong, ug iyang mahinumdoman kana nga may pagpabili. (Heb. 6:10) Pinaagi sa pagtambong sa matag adlaw sa kombensiyon gikan sa pangbukas nga awit hangtod sa paniklop nga pag-ampo, atong gipasundayag kang Jehova nga atong gipabilhan ang iyang mga pulong kanato. (Deut. 4:10) Atong gipakita usab ang pagpabili alang sa paghago sa atong daghang igsoon nga nalangkit sa pagpangandam alang sa kombensiyon.

⁴ Ang paghikay alang sa linibong katawhan sa Diyos nga magtigom diha sa matag dapit sa kombensiyon nagkinahanglan ug abanteng pagplano ug maayong organisasyon. Tungod kay nahibalo nga ang mga kahikayan sa kombensiyon gihimo sa mahigugmaong paagi angayng magpalihok kanato sa pakigtambayayong, aron nga “ipahinabo ang tanang butang nga may kahapsay ug pinaagig kahikayan.” (1 Cor. 14:40) Ang mosunod nga impormasyon ug mga pahinumdom itagana aron nga ikaw moabot sa inyong kombensiyon nga bug-os nga andam sa pagpahimulos sa espirituwal nga pagkaon ug Kristohanong panag-ubanay.

Sa Dili pa ang ­Kombensiyon

⁵ Kadtong imong ginadumalahag mga pagtuon sa Bibliya ug ubang interesadong mga tawo nagkinahanglan ba ug tabang sa paghimog personal nga mga kahikayan sa pagtambong sa kombensiyon? Ang ilang makita ug madungog samtang atua didto hayan magpalihok kanila nga mahimong mga magsisimba ni Jehova. (1 Cor. 14:25) Ang mga ansiyano angayng magmatikod ni bisan kinsang nanginahanglan ug tabang sa transportasyon, ilabina sa tigulang nga mga membro sa kongregasyon, ug mahigugmaong magpaigo nga ang ilang mga panginahanglan maatiman.​—Gal. 6:10.

⁶ Sanglit ang First Aid De­part­ment sa kombensiyon gibutang aron sa pagdumala sa emerhensiya nga mga kahimtang lamang, among isugyot nga dad-on nimo ang imong kaugalingong as­pi­rin, mga tabang sa paghilis ug pagkaon, ug susamang mga butang ngadto sa kombensiyon kon imong gibati nga kana kinahanglanon. Kon ikaw o ang usang minahal adunay seryosong sakit nga naglungtad, sama sa sakit sa kasingkasing, di­a­be­tes, o risgo sa mga pag-atake, palihog dad-a ang gikinahanglang tambal ngadto sa kombensiyon aron sa pag-atiman niini nga mga panginahanglan sama ra nga ikaw anaa sa balay o sa bakasyon. Maalamon alang sa membro sa pamilya o suod nga higala nga nakasabot sa kahimtang nga kanunayng ubanan ang maong tawo, sanglit siya ang anaa sa labing maayong posisyon sa pagtaganag gikinahanglang tabang.

⁷ Ang mga kahigayonan sa paghimog impormal nga pagsangyaw lagmit motungha samtang ikaw magbiyahe ngadto-ngari sa kombensiyon. Andam ka bang mopaambit sa kamatuoran sa uban? Kitang tanan, apil ang mga bata mahimong malangkit pinaagig pagtanyag ug mga tract ngadto sa mga katabang sa gasolinahan ug ubang imong mahibalag sa imong mga biyahe. Adunay mga kahigayonan sa pagpahimutang ug mga magasin, mga brosyur, o ubang literatura sa interesadong mga tawo. Magmaandam sa pagsangyaw sa impormal nga paagi sa mga tawo nga tingali masayloan pinaagi sa naandang mga paagi sa pagsangyaw.

Panahon sa Kombensiyon

⁸ Ikaw makareserba lamang ug mga lingkoranan alang sa imong pamilya o grupo nga kauban sa sakyanan. Kon posible, ireserba ang kombenyenteng mga lingkoranan alang sa tigulang nga mga igsoong lalaki ug babaye, ug ang mga dapit igahin alang sa mga baldado ug kanilang nagkinahanglag agianan sa wheel­chair. Matag adlaw samtang ikaw mobiya sa imong gilingkoran, palihog susiha aron maseguro nga dala mo ang imong tanang butang.

⁹ Ikaw ba magpabawtismo sa distritong kombensiyon? Sa sesyon sa buntag sa Sabado, usa ka seksiyon sa mga lingkoranan ang ireserba alang sa mga kandidato sa bawtismo, ug ang mga atendant maggiya kanimo niini nga dapit. Kon posible gayod, palihog sa paglingkod didto sa dili pa magsugod ang sesyon. Dad-a ang imong Bibliya, alawiton, tualya, ug kasarangang humdonon. Ang mga kamiseta nga may mga eslogan ug susamang sapot maoy dili haom alang nianang usa ka maligdong nga okasyon. Ang mga ansiyano nga magsubli uban sa mga kandidato sa bawtismo sa mga pangutana diha sa Atong Ministeryo nga libro kinahanglang magtino nga masabtan sa matag usa kining mga puntoha. Sanglit ang bawtismo maoy simbolo sa personal nga dedikasyon kang Jehova nga Diyos, dili tukma alang sa mga kandidato nga maggunitanay samtang bawtismohan.

¹⁰ Mahimo nimong gamiton ang mga kamera, mga camcorder, ug mga au­dio­cas­sette re­cord­er diha sa kombensiyon. Ugaling, ang nahimutangan o paggamit niini kinahanglang dili makababag sa mga agianan, makabalda sa pagtan-aw sa uban, o makalinga gikan sa programa. Kinahanglang kompleto kini sa kaugalingon​—nga mao, dili konektado sa elektrikal o mga sistema sa sound.

¹¹ Tungod kay ang paggamit ug mga cel­lu­lar ­phone ug mga pag­er midagsang, palihog pag-amping nga kini nga mga kahimanan dili makabalda sa imong atensiyon ngadto sa programa o sa pagsentro sa pagtagad kanilang naglingkod sa imong palibot. Kini nga mga kahimanan kinahanglang dili tugotan nga mokiring o mo-beep nga madungog samtang ikaw naglingkod taliwala sa mga mamiminaw. Kon kinahanglanon nimo nga mogamit ug cel­lu­lar phone samtang nagpadayon ang programa, palihog himoa kana sa gawas sa awditoryum.

¹² Alang sa pagpahimulos sa panahon ug pagpayano, ang Sosyedad mihangyo kanato sa pagdala sa atong kaugalingong mga paniudto ngadto sa kombensiyon matag adlaw. Kadaghanang mga igsoon misunod niini nga direksiyon ug nakakaplag nga pagkahuman sa programa alang sa pahulay sa udto, sila makalingkod uban sa ilang mga pamilya ug mangaon sa ilang gidala alang sa adlaw. Daghan ang miingon nga ang kahigayonan sa pagrelaks panahon sa pahulay sa udto ug paggugol ug dugang panahon uban sa ilang mga igsoong lalaki ug babaye nakapalipay. Kini nagkinahanglan sa pagpamalit ug mga pagkaon ug ilimnon nga abante sa panahon ug pag-empaki niana diha sa gamayng sudlanan o pabugnawan nga mohaom ilalom sa lingkoranan. Among gihangyo nga ang tanang manambong mosunod niini nga instruksiyon. Dili pa dugay, namatikdan nga ang pipila ka igsoon mobiya sa awditoryum sa pagpalit ug pagkaon gikan sa mga namaligya sa dalan ug fast-food nga mga luna sa duol. Magpadugok kinig dugang mga namaligya sa dalan aron magpundok sa gawas sa estadyum, nga magpahuot ug ngil-ad nga tan-awon. Busa, among gihangyo nga ang matag usa maningkamot sa pagdala sa iyang kaugalingong pagkaon ug ilimnon ngadto sa kombensiyon matag adlaw. Ang interesadong mga tawo nga kauban nimo ngadto sa kombensiyon kinahanglan usab nga magdalag ilang kaugalingong pagkaon. Ang mga bildong sudlanan ug alkoholikong mga ilimnon dili tugotan diha sa mga pasilidad sa kombensiyon.

¹³ Uyon sa itaas, dayag nga dili haom alang ni bisan kinsang igsoon ang pagpahimulos sa kombensiyon pinaagig pagbaligyag mga butang, sama sa mga hapin sa libro o mga kamiseta, mga paypay, o mga kalendaryo nga may tema sa kombensiyon nga gipatik diha niana. Ang mga hawanan sa kombensiyon mahimong usa ka dakong Kingdom Hall diin ang mga kalihokan sa negosyo walay luna.

¹⁴ Makaboluntaryo ka ba sa paghinlo sa pasilidad human sa mga sesyon sa matag adlaw? O makaboluntaryo ka ba diha sa usa sa ubang mga departamento sa kombensiyon? Kon makatabang ka, palihog sa pagduol sa Vol­un­teer Ser­vice De­part­ment sa kombensiyon. Ang mga bata nga ubos sa 16 anyos ang edad giabiabi sa pagboluntaryo kauban sa ginikanan o laing responsableng hamtong. Siyempre, ang tanan makatabang sa paghinlo sa pasilidad pinaagig pagsusi nga ang bisan unsang basura puniton ug ilabay sa hustong dapit.

¹⁵ Atong nadawat ang maayong mga lagda kon unsay naglangkob sa haom nga panapot ug pamostura diha sa atong mga kombensiyon. Pananglitan: Kita adunay pagtultol bahin niining butanga diha sa mga pasukip sa Atong Ministeryo sa Gingharian, kita adunay mga ilustrasyon ug mga hulagway diha sa atong literatura, ug labing hinungdanon sa tanan, nabatonan nato ang giingon ni Jehova diha sa Bibliya. (Roma 12:​2; 1 Tim. 2:​9, 10) Ang katawhan nahibalo kon kinsa kita ug kon nganong kita nagtigom sa ilang siyudad. Busa, ang atong panapot ug pamostura maoy gamhanang pamatuod mismo. Ang kadaghanan sa katawhan ni Jehova nagpakitag maayong panig-ingnan niining bahina. Usahay, hinuon, atong makita ang espiritu sa kalibotan nga nabanaag diha sa panapot ug pamostura sa pipila nga mitambong sa atong mga kombensiyon. Ang madayganong sinina sa bisan unsang matang magpanghimakak sa pangangkon sa usa nga usa ka espirituwal nga tawo. Ang ligdong, hinlo, hapsay nga panagway mao ang labing madanihon. Busa, ang mga ulo sa pamilya magmatikod sa kon unsay giplanong isul-ob sa ilang mga membro sa pamilya. Kini mapadapat usab sa dihang kita anaa sa gawas sa dapit sa kombensiyon. Ang pagtaod sa atong mga lapel badge sa dili pa ug human sa mga sesyon sa adlaw dugang magpaila kanato uban ni Jehova ug sa iyang hinlong katawhan.​—Itandi ang Marcos 8:38.

¹⁶ Ang maalamong Haring Solomon gidasig sa pag-ingon nga “ang mga kabuangan nabugkos sa kasingkasing sa usa ka bata” ug “ang usa ka bata nga pinasagdan maghatag ug kaulawan sa iyang inahan.” (Prov. 22:​15; 29:15) Panahon sa mga sesyon, ang wala madumalang batang mga Saksi nakabalda sa mga igsoong lalaki ug babaye nga naningkamot sa pagpahimulos gikan sa programa. Panahon sa miaging tuig nga mga kombensiyon sa Tinipong Bansa, ang pipila ka batan-on nakaplagang naglingkod sa ibabaw nga mga seksiyon sa lingkoranan, nga nagpatumong ug mga la­ser point­er palibot sa mga mamiminaw. Ang silaw gikan niini nga mga point­er kusog kaayo ug makadaot sa mata, bisag layo kaayo. Dayag nga kining mga batan-ona wala makapahimulos gikan sa espirituwal nga programa nga giandam alang kanila. Sanglit ang mga ginikanan manubag kang Jehova tungod sa panggawi sa ilang mga anak, ang inahan o amahan makatino lamang nga ang ilang mga anak nagagawi ug nagapaminaw sa instruksiyon ni Jehova kon ang mga anak naglingkod tupad nila. Ang mga atendant moduol ni bisan kinsa nga makapabalda ug mohangyo nga sila mohunong sa pagbuhat sa ingon, nga mabinationg magpahinumdom kanila sa pagpatalinghog sa programa.

¹⁷ Tungod kay atong ginaabiabi ang publiko sa atong mga kombensiyon, maalamon nga magmabinantayon maylabot sa mga bata ug personal nga mga butang. Ang atong mga anak maoy bililhong gasa gikan kang Jehova. Apan kita nahibalo nga ang kalibotan nagpabanaag ug matukobong kinaiya ni Satanas. Busa, palihog hibaloi sa tanang panahon kon asa ang inyong mga anak. Dugang pa, ang mga kamera, mga pitaka, ug ubang bililhong mga butang kinahanglang anaa kanunay kanimo sa tanang panahon ug ayawg ibilin sa imong lingkoranan. Tinoa nga nakandadohan ang imong sakyanan, ug ibutang ang personal nga mga butang diha sa sudlanan sa sakyanan o dad-a kana. Magpakunhod kini sa pagkatintal sa usa ka tawo sa paglungkab sa imong sakyanan.

¹⁸ Makapadasig nga makita ang mga igsoong lalaki ug babaye nga nagnota panahon sa mga sesyon sa kombensiyon. Ang mugbong mga nota motabang kanimo sa pagsentro sa pagtagad ug paghinumdom sa lintunganayng mga puntos. Ang pagrepaso sa imong mga nota sa ulahi uban sa imong pamilya o mga higala magtugot kanimo sa pagpamalandong bahin sa dagkong mga puntos sa kombensiyon aron dili kini makalimtan.

¹⁹ Ang katawhan ni Jehova kanunayng mahinatagon sa pag-amot alang sa teokratikanhong intereses. (Ex. 36:​5-7; 2 Cron. 31:​10; Roma 15:​26, 27) Ang imong boluntaryong mga amot alang sa tibuok-kalibotang buluhaton gamiton sa paghulip sa mga galastohan maylabot sa pag-abang sa dagkong mga pasilidad nga didto himoon ang mga kombensiyon. Kon ang imong amot himoon pinaagig tseke, palihog ingalan ngadto sa “Watchtower.”

²⁰ Sumala sa natala sa Amos 3:​7, si Jehova miingon nga siya “dili mobuhat sa usa ka butang gawas kon iyang gikapadayag ang iyang kompidensiyal nga butang ngadto sa iyang mga alagad nga mga propeta.” Ingong ang “Tigpadayag sa mga tinago,” gipahinabo ni Jehova nga matala sa Bibliya ang gatosan ka tagna nga tukma ug bug-os nga natuman. (Dan. 2:​28, 47) Ang dagkong mga saad pagatumanon pa. Ang 1999-2000 “Matagnaong Pulong sa Diyos” Distritong mga Kombensiyon mopalig-on sa imong pagtuo diha sa mga saad sa Diyos. Paminaw pag-ayo sa pulong ni Jehova alang kanimo. Ipadapat kon unsay imong makita ug madungog​—diha sa ministeryo, diha sa kongregasyon, ug sa imong personal nga kinabuhi. Nagaampo kami sa dagayang panalangin ni Jehova diha sa tanan nimong mga kahikayan sa pagtambong sa matag adlaw niining dagaya, espirituwal nga piyesta!

[Blurb sa panid 3]

Planoha ang pagtambong sa tibuok adlaw sa Biyernes, Sabado, ug Dominggo!