1997 “Pagtuo sa Pulong sa Diyos” Distritong Kombensiyon
1 Gipahinumdoman ni apostol Pablo si Timoteo nga “ang tibuok Kasulatan inspirado sa Diyos.” (2 Tim. 3:16) Sanglit inspirado ang Pulong sa Diyos, kita adunay tanang rason sa pagtuo niana. Ang tema sa distritong kombensiyon niining tuiga maoy “Pagtuo sa Pulong sa Diyos.” Ang programa magpalig-on sa atong pagtuo sa Bibliya, nakat-onan man nato ang kamatuoran sa daghang katuigan na o bag-o lamang nakakontak sa organisasyon ni Jehova. Kitang tanan angayng maghikay nga makatambong sa tibuok nga programa.
2 Tulo ka Ablawng Kombensiyon: Niining tuiga ang tulo ka adlawng programa sa distritong kombensiyon gihikay alang sa atong kaayohan. Ang 49 ka kombensiyon sa Pilipinas gilista sa kataposan niini nga pasukip. Sa pagkakaron nasayod ka na kon haing kombensiyona ang tambongan sa inyong kongregasyon, ug angay nga nakahimo ka na ug tinong mga plano sa pagtambong sa tanang tulo ka adlaw sa programa. Giduol mo na ba ang imong amo aron makakuhag gikinahanglang pagpalta?
3 Ang programa magsugod sa Biyernes ug Sabado sa 8:30 s.b. ug sa Dominggo sa 9:00 s.b. Planohang mogikan sa balay ug sayo pa aron makaabot sa dapit sa kombensiyon sa dili pa magsugod ang programa.
4 Pagbuhat ug Maayo Pinaagi sa Paghatag Pagtagab: Gipahinumdoman ni apostol Pedro ang unang siglong mga Kristohanon nga makaayo gayod kanila ang pagtagad sa matagnaong pulong ingon sa lamparahan nga nagadan-ag diha sa mangitngit nga dapit. (2 Ped. 1: 19) Tinuod usab kini kanato. Ang pagkinabuhi niining karaang kalibotan nga ilalom sa pagkontrolar ni Satanas nahisamag anaa sa mangitngit nga dapit. Kita mapasalamaton nga napahigawas sa espirituwal nga kangitngit. (Col. 1:13; 1 Ped. 2:9; 1 Juan 5:19) Aron magpabilin diha sa kahayag, angay natong huptan ang atong pagtuo nga malig-on pinaagig paghatag pagtagad sa inspiradong Pulong ni Jehova.
5 Gikinahanglan ang paningkamot sa atong bahin kon puntingon ta ang programa sa kombensiyon, apan kita mapanalanginan gayod sa pagbuhat sa ingon. Maningkamot gayod kita nga modangat sa dapit sa kombensiyon nga nakapahulay na pag-ayo aron kita igmat sa panahon sa mga sesyon. Hatagig igoigong panahon nga makadangat sa dapit sa kombensiyon matag adlaw, aron makalingkod ka na una pa magsugod ang programa. Dayon pakigduyog sa pangbukas nga awit ug pag-ampo sa pagsugod sa programa sa matag adlaw. Kinahanglang ipahiluna sa mga hamtong ang panig-ingnan, ug ang mga ginikanan angayng magbansay sa ilang mga anak.—Efe. 6:4.
6 Kon atong tan-awon ang mga ulohan sa mga bahin una pa magsugod ang programa sa adlaw, masulayan natong madahom ang mga puntos nga hayan ipresentar sulod nianang sesyona. Kini magpalambo sa atong interes sa materyal sa dihang kini ipresentar. Gikarekomendar nga magkuha kitag mugbong mga nota sa pagtabang kanato sa paghinumdom sa pangunang mga puntos sa programa. Kon mokuha kitag daghan kaayong nota, kita hayan mosipyat sa pipila ka pangunang mga puntos tungod kay puliki kita kaayo sa pagsulat.
7 Sa miaging tuig daghang hamtong ug mga batan-on ang namatikdan na usab nga nagsuroysuroy sa palibot sa mga agianan, nagwaraswaras sa gawas, ug namisita sa uban samtang nagpadayon ang programa, inay maminaw sa gitagana sa “kasaligan ug mabuot nga ulipon” alang sa atong kaayohan. Misaad si Jesus sa paghatag kanato sa espirituwal nga pagkaon sa hustong panahon. (Mat. 24:45-47) Busa, angay kitang presente sa pagbatog kaayohan gikan nianang pagkaona ug dili magpakitag kakulang sa apresasyon. (2 Cor. 6:1) Usab maorag sa dihang di-mahimutang ang pipila ka kabataan, sagad silang mohangyo sa paggamit sa kasilyas ingong pasangil sa pagtindog ug paglakawlakaw. Ang hustong pagbansay sa balay sagad maghimo sa maong kanunayng mga pag-adto sa kasilyas nga di-kinahanglanon. Usahay, ang edarang mga batan-on magtapok sa pagpanglingkod, mag-estoryahanay ug maghunghonganay sa usag usa. Ang atong mga batan-on, nga nagaatubang sa daghang pagpig-ot karon, kinahanglang magsentro sa pagtagad diha sa gipresentar nga materyal, dili magbuhat ug ubang mga butang sa panahon sa programa. Ang mga tinguha sa pagkabatan-on nga dili uyon sa mga prinsipyo sa Bibliya kinahanglang likayan. (Itandi ang 2 Timoteo 2:22.) Ang pagkamatagdanon sa tanan, mga hingkod ug mga batan-on man, magpasidungog kang Jehova ug magpalipay kaniya.
8 Kon kinahanglang tambagan sa usa sa mga atendant si bisan kinsa niining mga butanga, kinahanglang dawaton kini ingong mahigugmaong tagana gikan kang Jehova. (Gal. 6:1) Angayng hinumdoman sa tanan nga ang rason nga kita manlimbasog sa pagtambong sa kombensiyon mao nga kita ‘maminaw ug mokat-on.’ (Deut. 31:12) Usab, “ang maalamong tawo maminaw ug mokuhag dugang instruksiyon.” (Prov. 1:5) Sa panahong nahibilin una pa kamo motambong sa kombensiyon, hisgoti ingong pamilya ang panginahanglan nga duyog nga manglingkod diha sa mamiminaw, magpabiling maglingkod sa panahon sa programa, ug maminaw pag-ayo, aron maangkon ang bug-os nga kaayohan sa programa.
9 Pagpaanyag nga Makapahimuot Kang Jehova: Ang katawhan ni Jehova gipasundayag aron malantaw sa tibuok kalibotan. (1 Cor. 4:9) Kita sa kinatibuk-an namatikdan sa atong maayong sukdanan sa panapot ug pamostura. Ang pagpadapat sa Kasulatanhong mga prinsipyo nga makaplagan sa 1 Timoteo 2:9, 10 ug sa 1 Pedro 3:3, 4 miresulta sa dagkong mga kausaban sa panagway sa daghan kon itandi sa ilang hitsura sa dihang misugod sila sa pagpakig-uban sa Kristohanong kongregasyon. Angay kitang magbantay nga dili kita mahimong sama sa kalibotan sa atong panagway—nga magsul-ob ug katingad-anang panapot, magpasiugdag kalibotanong mga uso sa estilo sa buhok, o manapot sa di-makasaranganong paagi. Ang atong maayong panig-ingnan sa panapot ug pamostura angayng magtabang sa mga bag-ohan kinsa motambong sa kombensiyon sa pagkakita kon sa unsang paagi ang mga Kristohanon angayng magpaanyag sa ilang kaugalingon.
10 Bisan tuod ang kinatibuk-ang impresyon nga nabutyag ingong resulta sa mga kombensiyon sa miaging tuig paborable kaayo, ang kalibotanong panapot ug pamostura nagapadayong suliran sa pipila ka igsoong lalaki ug babaye, ilabina sa panahong walay buhat. Mga ginikanan, maalamong susiha kon unsay isul-ob sa inyong batan-ong mga anak ug mga tin-edyer. Seguroha nga dili nato tugotan ang kalibotanong mga estilo ug mga uso nga makadaot sa atong Kristohanong panagway.
11 Hupti ang Maayong Panggawi: Ang maayong panggawi maoy ilhanan sa tinuod nga mga Kristohanon. (1 Ped. 2:12) Ang atong pamatasan bisan asa pa tingali kita—diha sa kombensiyon, sa mga restawran, ug sa atong mga sak-anan, sa dihang magabiyahe usab—makahatag ug maayong pamatuod ug hayan magtukmod sa pipila sa pagpakaila kang Jehova. (Itandi ang 1 Pedro 3:1, 2.) Aduna kita ing pribilehiyo sa paghimaya sa Diyos pinaagi sa atong panggawi. Sa dihang makadawat kitag paborableng mga taho bahin sa atong panggawi, kita malipay, dili ba? Adunay panginahanglan nga magpabiling igmat, hinunoa, aron atong matipigan ang maayong dungog sa katawhan ni Jehova.
12 Daghang pahinumdom ang gikahatag na bahin sa pagkontrolar sa atong mga anak, nga dili magtugot kanila nga magdagandagan libot sa kadalanan palibot sa mga hawanan sa kombensiyon, nga magtugaw sa uban. Bisan tuod ang mga kombensiyon maghatag kanatog kahigayonan sa pagduaw ug pagpakig-uban sa atong kaigsoonan, sa gihapon kinahanglang hinumdoman sa mga ginikanan ang ilang obligasyon sa pagtaganag superbisyon sa ilang mga anak sa tanang panahon. Kini maoy responsabilidad nga gipahiluna ni Jehova sa matag ginikanan. (Prov. 1:8; Efe. 6:4) Ang pinasagdang mga lihok sa mga bata magpawalay-pulos sa maayong dungog nga gipaningkamotan pag-ayong tukoron sa ubang mga Saksi ni Jehova.—Prov. 29:15.
13 Hinumdomi nga tukma ang pag-tip diha sa mga restawran sa dihang makadawat ug personal nga serbisyo gikan sa mga tigsilbi. Ingong mga Saksi ni Jehova, buot natong ipakita ang maayong pamatasan niining bahina usab.—Tan-awa ang Awake! sa Hunyo 22, 1986, mga panid 24-7.
14 Paghulip sa mga Galastohan sa Kombensiyon: Kitang tanan adunay mga galastohan maylabot sa pagtambong sa mga kombensiyon. Adunay laing galastohan nga maayong atong tagdon. Mahal ang mga pasilidad nga gigamit sa mga kombensiyon, ilabina sa dagkong mga siyudad. Adunay laing mga galastohan usab nga angayng atimanon. Ang atong mahinatagon boluntaryong mga amot diha sa mga kombensiyon gipabilhan pag-ayo.—Buh. 20:35; 2 Cor. 9:7, 11, 13.
15 Lingkoranan: Ang mga direksiyon nga gikatagana na sulod sa daghang tuig padayong igapadapat, nga mao, ANG MGA LINGKORANAN IKARESERBA LAMANG SA SUOD NGA MGA MEMBRO SA IMONG PAMILYA UG NI BISAN KINSA NGA HAYAN NAGABIYAHE UBAN KANIMO SA IMONG SAKYANAN. Nindot ang pagmatikod nga mas pa ang misunod niini nga mga direksiyon sa di pa dugayng katuigan, ug kini nagpalambo sa mahigugmaong atmospera nga gipasundayag diha sa mga kombensiyon. Sa kadaghanang dapit ang pipila ka lingkoranan mas daling mabatonan kay sa uban. Palihog ipakita ang konsiderasyon, ug igahin ang mas kombenyenteng mga lingkoranan alang sa mga tigulang o baldado.
16 Mga Kamera, mga Camcorber, ug mga Aubiocassette Recorber: Ang mga kamera ug mga kagamitan sa rekording mahimong gamiton sa mga kombensiyon. Bisan pa niana, ang atong paggamit niini kinahanglang dili makabalda sa ubang nanambong. Kita dili angayng magsuroysuroy sa panahon sa mga sesyon sa pagpangletrato, kay kana makatugaw sa uban nga naningkamot sa pagsentro sa pagtagad sa programa. Walay mga galamiton sa rekording sa bisan unsang matang ang ikonektar sa elektrikal o mga sistema sa sound, ni kini nga kahimanan mobabag diha sa mga agianan, mga pasilyo, o sa pagtan-aw sa uban.
17 First Aid: Alang lamang sa mga emerhensiya ang First Aid Department. Dili kini makasarang sa pag-atiman sa dugay nang masakiton. Mao kanay hinungdan kon nganong angay nimong tagdon ang mga panginahanglan sa panglawas sa imong kaugalingon ug sa imong pamilya nga abante. Palihog dad-a ang imong kaugalingong aspirin, mga tabang sa paghilis sa pagkaon, mga bendahe, mga ampirel, o susamang mga butang, sanglit ang maong mga butang dili mabatonan didto sa kombensiyon. Bisan kinsang tawo nga may risgo sa pag-atake, mga sakit sa kasingkasing, ug uban pa, angayng managana sa ilang mga panginahanglan kutob gayod sa mahimo. Angay nga aduna silay gikinahanglang tambal, ug usa ka membro sa pamilya o kongregasyon nga makasabot sa ilang kahimtang kinahanglang presente uban kanila sa tanang panahon aron sa pagtaganag bisan unsang gikinahanglang tabang. Kon ang pipila nga may linaing mga panginahanglan sa panglawas walay mga membro sa pamilya nga makatabang kanila, ang ilang mga ansiyano sa kongregasyon angayng maghimo ug gikinahanglang mga kahikayan sa pagtabang. Walay tagana nga himoon sa mga kombensiyon alang sa linaing mga lawak sa pagdawat niadtong adunay mga alerdyi.
18 Pagkaon Bibto sa Kombensiyon: Ang pagkawalay-serbisyo sa pagkaon sa mga kombensiyon miresulta nga daghan pa ang nakahimo sa pagtambong sa tanang sesyon aron sa pagsentro sa pagtagad sa espirituwal nga pagkaon. Daghang pahayag sa apresasyon bahin niini nga pagpayano ang nadawat sukad nga ang kahikayan gisugdan. Ang tanan angayng magplano sa pagdala sa ilang kaugalingong mga pagkaon alang sa paniudto, sama nianang gisugyot diha sa Mayo 1995 nga pasukip sa Atong Ministeryo sa Gingharian, mga parapo 11-14. Walay bildong mga sudlanan ug alkoholikong mga ilimnon ang dad-on ngadto sa pasilidad sa kombensiyon. Ang mga cooler sa pagkaon kinahanglang gagmay ra aron dili makaali sa mga agianan ug angayng dili ibutang sa ibabaw sa mga lingkoranan. Ang pipila sa mga mamiminaw namatikdang nangaon ug nanginom sa panahon sa programa. Pagkaway-pagtahod ang pagbuhat niini. Diin adunay mga tigpamaligya sa gawas sa pasilidad sa kombensiyon, ang pipila sa mga igsoon namatikdang namalit niini sa panahon sa programa. Ang maong buhat dili husto.
19 Atong gipabilhan gayod ang atong espirituwal nga kombira ug ang relaks, malinawong atmospera sa panag-ubanay sulod sa atong mubong mga pahulay sa udto. Isip pagpahiuyon sa katuyoan niini nga kahikayan, inay nga mobiya sa pasilidad sa pahulay sa udto aron mopalit ug pagkaon, palihog pagdalag imong makaon. Sa ingon, makabaton ka ug dugang panahon sa pagtagamtam sa panag-ubanay sa imong mga igsoong lalaki ug babaye.
20 Mga Kalihokan sa Negosyo: Dili maayo alang ni bisan kinsang igsoon ang pagpahimulos sa dagkong panon pinaagi sa paghimo ug baligyang mga butang, sama sa mga hapin sa libro o mga kamiseta, mga paypay, ug mga kalendaryo nga pinatikan sa tema sa kombensiyon. Ang mga hawanan sa kombensiyon mahimong usa ka dakong Kingdom Hall diin ang mga kalihokan sa negosyo walay luna.
21 Pagkamalipayon nato nga ang “Pagtuo sa Pulong sa Diyos” Distritong mga Kombensiyon magsugod na sa di madugay! Kitang tanan buot maneguro nga ang atong mga pagpangandam nahimo na aron sa pagtambong sa bug-os nga programa, aron atong matagamtam sa bug-os ang lamiang espirituwal nga bangkete nga giandam ni Jehova alang kanato pinaagi sa iyang organisasyon. Nianang paagiha kita mahimong “kompleto nga masinangkapan alang sa tanang maayong buhat” sa mga adlaw sa unahan.—2 Tim. 3:17.
[Kahon sa panid 6]
Distritong Kombensiyon nga mga Pahinumdom
Bawtismo: Ang mga kandidato sa bawtismo kinahanglang makalingkod na diha sa gitudlong dapit una pa magsugod ang programa sa buntag sa Sabado. Ang kasarangang humdonon ug usa ka tualya ang kinahanglang dad-on sa matag usa nga nagplanong magpabawtismo. Ang mga ansiyano nga magsubli uban sa mga kandidato sa bawtismo sa mga pangutana diha sa Atong Ministeryo nga libro kinahanglang magtino nga masabtan sa matag usa kining mga puntoha. Ang bawtismo ingong simbolo sa pahinungod sa usa maoy suod ug personal nga butang tali sa indibiduwal ug kang Jehova. Busa, dili tukma alang sa mga kandidato nga maggaksanay o maggunitanay samtang bawtismohan.
Mga Babge Carb: Palihog itaod ang 1997 nga badge card sa tanang panahon samtang diha sa siyudad sa kombensiyon ug samtang mobiyahe ngadto-ngari niana. Ang mga badge card ug mga sudlanan angayng mabatonan pinaagi sa inyong kongregasyon, kay kini dili mabatonan didto sa kombensiyon. Hinumdomi ang pagdala sa inyong bag-ong kard nga Advance Medical Directive/Release.
Pagboluntaryo: Makagahin ka ba ug pipila ka panahon sa kombensiyon aron makatabang sa usa sa mga departamento? Kon makatabang ka, palihog sa pagtaho ngadto sa Volunteer Service Department sa kombensiyon. Ang mga bata nga ubos sa 16 anyos makatabang usab pinaagi sa pagbuhat ilalom sa pagtultol sa usa ka ginikanan o ubang responsableng hamtong.
Mga Pahimangno: Magmaalisto sa posibleng mga suliran aron malikayan ang wala kinahanglanang mga gumonhap. Ang mga kawatan sagad nga mamiktima sa mga tawo nga halayo sa palibot sa ilang balay. Tinoa nga nakandadohan ang imong sakyanan sa tanang panahon, ug ayaw pagbilin ug bisan unsang butang nga makita nga makatental sa usa nga manglungkab. Dili maalamon nga magbilin ug bisan unsang bililhong butang diha sa imong lingkoranan. Dili ka makaseguro nga ang matag usa sa imong palibot maoy Kristohanon. Nganong manental man? Ang mga taho nadawat nga gisulayan sa pipila ka tagagawas ang paghaylo nga mahilayo ang kabataan. PABAYONG TAN-AWA ANG INYONG MGA ANAK SA TANANG PANAHON.