“Usahan Ta ang Pagbayaw sa Iyang Ngalan”
1. Unsang kahigayonan ang atong mabatonan aron duyog natong mabayaw ang ngalan sa Diyos, ug unsay atong mahimo karon agig pagpangandam?
1 “Oh padakoa . . . si Jehova uban kanako, ug usahan ta ang pagbayaw sa iyang ngalan,” miawit ang salmista. (Sal. 34:3) Ang atong taliabot nga “Lakaw Uban sa Diyos” nga Distritong Kombensiyon mohatag kanato ug kahigayonan sa pagbayaw sa ngalan ni Jehova duyog sa atong kaigsoonan gikan sa daghang kongregasyon. Nakahimo ka na bag mga kahikayan alang sa mga puy-anan, sakyanan, ug bakasyon gikan sa sekular nga trabaho? Maalamon kita kon abante natong atimanon kining mga butanga.—Prov. 21:5.
2. Nganong mapuslanon ang pagplanong sayo nga moabot sa dapit sa kombensiyon?
2 Pag-abot sa Dapit sa Kombensiyon: Ang pagbiya nga sayo paingon sa kombensiyon makatabang kanato sa pagdumala sa wala-damhang mga kalangan ug makapaarang kanato sa pagpahiluna na sa atong mga lingkoranan nga untop sa panahon aron kinasingkasing nga makapakig-ambit sa pangbukas nga awit ug pag-ampo. (Sal. 69:30) Pipila ka minutos sa dili pa magsugod ang sesyon, ang tsirman molingkod na sa plataporma samtang patokaron ang pasiunang musika sa Gingharian. Kitang tanan angayng manglingkod na sa maong panahon aron makasugod ang programa sa hapsay nga paagi.—1 Cor. 14:33, 40.
3. Sa unsang paagi atong ikapakita ang konsiderasyon sa uban sa dihang mangitag mga lingkoranan?
3 Ang Pulong sa Diyos nag-awhag kanato sa ‘paghimo sa tanan natong kalihokan uban ang gugma.’ (1 Cor. 16:14) Kon kita ang unang moabot sa dapit sa kombensiyon, ang konsiderasyon sa uban maoy mopugong kanato sa pagdagandagan, pagdalidali o pagtulakay aron makauna sa atong paboritong lingkoranan. Ang mga lingkoranan mahimong ireserba lamang alang niadtong nagbiyahe kauban nimo sa samang sakyanan o nagpuyo uban kanimo sa samang balay.—1 Cor. 13:5; Filip. 2:4.
4. Unsa ang mga kahikayan para sa tingpaniudto, ug nganong mapuslanon kini?
4 Palihog pagdalag paniudto imbes mobiya sa dapit sa kombensiyon aron magpalit ug pagkaon panahon sa tingpaniudto. Kini makahatag ug higayon sa tanan sa pagpahimulos sa makapalig-on nga panag-ubanay ug anaa inigsugod gayod sa sesyon sa hapon. Kon mahimo, pagdala lang ug gamayng balonan nga ikabutang sa ilalom sa lingkoranan. Ang dagkong mga balonan para sa ubay-ubayng mga tawo, sama sa tibuok pamilya, mga sudlanang mabuakon, ug alkoholikong mga ilimnon wala tugoti diha sa pasilidad sa kombensiyon.
5. Sa unsang paagi kita ‘makabuhat ug maayo’ ngadto sa mga tigulang ug mga baldado?
5 Diha sa atong mga kombensiyon, gipaningkamotan gayod nga mahatagan ug linaing lingkoranan ang mga tigulang o mga baldado. Gipahinumdoman ni apostol Pablo ang mga kongregasyon sa Galacia nga “buhaton [nila] ang maayo ngadto sa tanan, apan ilabina kanila nga [ilang] kabanay sa pagtuo.” (Gal. 6:10) Ang tigulang o baldado nga mga igsoong lalaki ug babaye, nag-inusarang mga ginikanan, o kadtong anaa sa bug-os-panahong pag-alagad basin dili mohangyo sa imong tabang, apan sila may mga suliran nga sagubangon aron makatambong sa kombensiyon. Anaa ka ba sa kahimtang sa ‘pagbuhat kon unsay maayo’ ngadto kanila ug sa pagtanyag ug tabang?
6. Sa unsang paagi atong maandam ang atong mga kasingkasing alang sa instruksiyon nga atong madawat?
6 Usa ka Espirituwal nga Bangkete ang Nagpaabot Kanato: Si Haring Jehosapat usa nga ‘miandam sa iyang kasingkasing sa pagpangita sa matuod nga Diyos.’ (2 Cron. 19:3) Sa unsang paagi atong maandam ang atong kasingkasing sa dili pa ang kombensiyon? Ang mga artikulo sa kataposang panid sa Oktubre 22 ug Nobyembre 8 nga mga gula sa Pagmata! naghatag ug pasiunang pagtan-aw sa espirituwal nga bangkete nga itagana. Nganong dili mogahin ug panahon sa pagpamalandong sa maong mga artikulo, nga ugmaron ang kahinam alang sa itagana ni Jehova kanato? Ang pag-andam sa atong kasingkasing naglakip usab sa paghangyo kang Jehova sa pagtabang kanato nga masabtan ang instruksiyon nga atong madawat ug mapadapat kana.—Sal. 25:4, 5.
7. Unsay atong tinguha, ug ngano?
7 Kitang tanan nagtinguha nga makakat-on ug dugang pa gikan sa Pulong sa Diyos, nga nahibalo nga pinaagi niini kita motubo ngadto sa kaluwasan. (1 Ped. 2:2) Busa, tambongan nato ang atong “Lakaw Uban sa Diyos” nga Distritong Kombensiyon ug ‘usahan ta ang pagbayaw sa ngalan ni Jehova.’—Sal. 34:3.
[Kahon sa panid 3]
Mga Paagi sa Pagbayaw sa Ngalan sa Diyos
◼ Abanteng pagplano
◼ Ipakita ang gugma ngadto sa uban
◼ Andama ang imong kasingkasing