Magmapatalinghogon sa Sagradong mga Kapahayagan
1 Dili tanang gisulti sa tawo takos sa linaing pagtagad. Apan sa dihang ang Diyos mosulti, adunay hinungdanong katarongan sa pagpatalinghog. (Deut. 28:1, 2) Nga mapasalamaton, ang dinasig nga mga magsusulat nagrekord sa “sagradong kapahayagan sa Diyos” alang sa atong kaayohan. (Roma 3:2) Ang umaabot nga distritong kombensiyon motaganag bililhong mga kahigayonan sa pagpaminaw niini nga mga kapahayagan samtang kini basahon ug hisgotan. Sa unsang paagi ikaw ilabinang magmapatalinghogon?
2 Moabot nga Sayo Matag Buntag: Handurawa ang kahinam sa mga Israelinhon sa dihang sila gisultihan nga makigtagbo kang Jehova sa Bukid sa Sinai aron maminaw sa iyang Balaod! (Ex. 19:10, 11, 16-19) Kon ikaw adunay susamang tinamdan bahin sa pagdawat sa instruksiyon ni Jehova didto sa distritong kombensiyon, ikaw mohimog mga kahikayan aron moabot nga sayo matag adlaw. Dili kita makapaminaw sa tibuok programa kon kita ulahing moabot ug makatugaw sa uban tungod sa atong mga paninguha nga makakaplag ug mga lingkoranan.
3 Bisan ang pipila nga miabot ug sayo wala sa ilang mga lingkoranan sa pagsugod sa sesyon. Nganong ingon niini? Ilang hulaton hangtod nga ang tsirman mopailaila sa pangbukas nga awit una pa sila mohunong sa pakig-estorya sa ilang mga higala ug mosugod sa pagpaingon ngadto sa ilang mga lingkoranan. Angay natong matikdan nga pipila ka minutos sa dili pa ang pangbukas nga awit sa matag sesyon, ang tsirman molingkod sa plataporma samtang ang pasiunang musika sa Gingharian patugtogon. Kini ang atong ilhanan nga panahon na nga molingkod! Dayon, sa dihang ang pangbukas nga awit ipatagad, kita andam na sa pagduyog sa pag-awit ug mga pagdayeg kang Jehova.
4 Paminaw Ingong Nahiusang Pamilya: Sa dihang ang sagradong mga kapahayagan gibasa sa natigom nga mga Israelinhon, ang mga pamilya, lakip ang “mga bata,” naminaw ug mikat-on. (Deut. 31:12) Sa atong mga kombensiyon, ang mga bata kinahanglang dili “pasagdan.” (Prov. 29:15) Mga ginikanan, hikaya nga ang inyong tibuok pamilya molingkod nga magkauban—lakip ang mga tin-edyer. Ang pipila ka ginikanan maghulat sa pangbukas nga awit aron dad-on ang ilang mga bata ngadto sa kasilyas. Apan, dili gayod kini magtudlo sa mga anak sa pagkahinungdanon kaayo sa mga awit ug mga pag-ampo diha sa atong pagsimba. Pagkamaayo gayod ang pag-atiman sa mga panginahanglan alang sa kasilyas sa dili pa mosugod ang matag sesyon kon posible gayod!
5 Makatabang kanato sa pagpaminaw kon kita makapahulay ug maayo matag gabii ug likayan ang pagkaon ug daghan sulod sa maong adlaw. Isentro ang pagtagad sa gipahayag sa mamumulong. Ayawg tugoti nga maglatagaw ang imong hunahuna. Sundi sa Bibliya sa dihang basahon ang mga kasulatan. Pagkuhag mubong mga nota. Samtang ang matag pakigpulong ginapahayag, sublia sa imong hunahuna kon unsay gisulti sa mamumulong, ug hunahunaa kon sa unsang paagi imong mapadapat ang materyal. Sa pagtiklop sa adlaw, hisgoti ang programa ingong pamilya. Unsang mga puntos ang napahimuslan sa matag usa? Sa unsang paagi magamit sa imong pamilya kining impormasyona nga mapuslanon?
6 Ipakita ang Pagtahod sa Pulong sa Diyos: Ang mga kombensiyon maghatag kanatog maayong kahigayonan sa pagpakigsulti sa mga higala ug pahimuslan ang makapalig-ong panag-ubanay. Pinaagi sa pag-abot nga sayo, makabaton kitag panahon sa pakighisgot sa dili pa ang programa mosugod. Ang pipila, ugaling, magsultihanay sa panahon sa programa, nga di-hustong naghunahuna nga kini dili kaayo makabalda diha sa dakong awditoryum. Bisan kon ang mga tigom himoon nga dinagko, panahon kini sa pagpaminaw sama sa panahong motambong ug tigom sa Kingdom Hall. Ang paggamit ug mga cellular phone, pager, camcorder, ug mga kamera dili gayod tugotan nga magpahinabog mga kabaldahan sulod sa programa.
7 Samtang si Moises midawat sa Balaod gikan kang Jehova, “siya wala makakaon ug tinapay ug wala makainom ug tubig.” (Ex. 34:28) Sa susama, dili haom ang pagkaon ug pag-inom samtang nagpadayon ang mga sesyon sa kombensiyon. Gawas kon nalangkit ang seryosong mga butang sa panglawas, paghulat hangtod sa “tinudlong panahon” alang niini.—Eccl. 3:1.
8 Sa pipila ka kombensiyon, dihay nagpadayong problema bahin sa daghang igsoong lalaki ug babaye ug bisan mga bata nga naglakawlakaw diha sa mga agianan sa panahon sa mga sesyon. Ang mga atendant hatagan ug instruksiyon sa paghangyo sa maong mga tawo nga mobalik sa awditoryum. Ang mga boluntaryo nga nagtrabaho sa lainlaing mga departamento kinahanglang molingkod diha sa mamiminaw sa pagkahuman gayod sa ilang trabaho. Gawas kon ang mga boluntaryo gitudlo sa hinungdanong trabaho sa panahon sa mga sesyon, sila kinahanglang atua sa ilang mga lingkoranan, nga naminaw sa programa. Sila dili kinahanglang maglanganlangan diha sa mga departamento, nga magduaway sa usag usa samtang ang programa nagpadayon.
9 Dili gayod nato buot nga mahimong ‘mahabol sa atong pandungog’ sa dihang maminaw sa Pulong sa Diyos. (Heb. 5:11) Busa magmalig-on kita sa pagpakitag angayng pagtahod pinaagi sa pagpatalinghog pag-ayo samtang ang sagradong mga kapahayagan gikan kang Jehova ginahisgotan didto sa atong umaabot nga distritong kombensiyon.