Mahimong Maayong Tigpatalinghog
1 Nagkinahanglag disiplina aron makapatalinghog pag-ayo. Nagkinahanglan usab ug tinguha sa bahin sa tigpatalinghog aron makakat-on ug makabenepisyo sa napatalinghogan. Busa, gipasiugda ni Jesus ang panginahanglan sa ‘paghatag ug pagtagad kon giunsa ninyo pagpatalinghog.’—Luc. 8:18.
2 Kini ilabinang mapadapat sa dihang kita motambong sa mga tigom sa kongregasyon, mga asembliya, ug mga kombensiyon. Kini maoy mga panahon nga kita kinahanglang magpatalinghog pag-ayo. (Heb. 2:1) Ania ang pipila ka puntos nga motabang kanimo nga mahimong maayong tigpatalinghog niining Kristohanong mga panagkatigom.
◼ Pabilhi ang kahinungdanon sa mga tigom. Kini mao ang pangunang paagi nga niana kita ‘gitudloan ni Jehova’ pinaagi sa “kasaligang tinugyanan.”—Isa. 54:13; Luc. 12:42.
◼ Pangandam nga abante. Sublia ang materyal nga pagahisgotan, ug paneguroa nga dad-on ang imong Bibliya ug personal nga kopya sa publikasyon nga ginatun-an.
◼ Sa panahon sa mga tigom, panlimbasogi gayod nga ibug-os ang pagtagad. Ang pagpakigsulti sa imong mga katapad maingon man ang pagtan-aw sa ginabuhat sa uban diha sa mga mamiminaw kinahanglang likayan. Paningkamoti nga dili magpalinga pinaagi sa paghunahuna kon unsay imong buhaton human sa tigom o bahin sa ubang personal nga mga butang.
◼ Analisaha kon unsay gipresentar. Suknaa ang imong kaugalingon: ‘Sa unsang paagi ikapadapat ko kini? Kanus-a ko kini ipadapat?’
◼ Paghimog mubong mga nota sa pangunang mga puntos ug mga teksto sa kasulatan. Motabang kini nimo sa pagsentro sa imong mga hunahuna kon unsa ang ginahisgotan ug makadugang sa imong paghinumdom sa pangunang mga puntos aron magamit sa ulahi.
3 Tudloi ang Imong mga Anak nga Magpatalinghog: Ang mga bata nagkinahanglag espirituwal nga instruksiyon. (Deut. 31:12) Sa karaang kapanahonan ang “tanan nga may igong panabot sa pagpamati” taliwala sa katawhan sa Diyos kinahanglang magpatalinghog samtang ang Balaod gibasa ngadto kanila. (Neh. 8:1-3) Kon ang mga ginikanan malangkit diha sa mga tigom ug maminaw pag-ayo, lagmit sama niana ang buhaton sa ilang mga anak. Dili maalamon nga magdalag mga dulaan o mga libro sa hulagway nga koloran sa mga bata aron malingaw. Ang wala-kinahanglanang pagbalikbalik sa kasilyas makabalda usab sa ilang pagpatalinghog. Sanglit ang “binuang nabugkos sa kasingkasing sa usa ka bata,” ang mga ginikanan kinahanglang manikaysikay gayod sa pagtino nga ang ilang mga anak molingkod ug tarong ug magpatalinghog sa mga tigom.—Prov. 22:15.
4 Pinaagi sa pagkahimong maayong mga tigpatalinghog, atong gipamatud-an nga kita gayod maalamon ug buot nga ‘modawat ug dugang pagtudlo.’—Prov. 1:5.