Makapalig-on ug Positibo

ANG mensahe nga gipawali kanato maoy maayong balita. Si Jesus miingon: “Sa tanang kanasoran ang maayong balita kinahanglang igawali una.” (Mar. 13:10) Gihatag ni Jesus ang panig-ingnan pinaagi sa pagpatugbaw sa “maayong balita sa gingharian sa Diyos.” (Luc. 4:43) Ang giwali sa mga apostoles gibatbat usab nga “ang maayong balita sa Diyos” ug “ang maayong balita bahin kang Kristo.” (1 Tes. 2:2; 2 Cor. 2:12) Ang maong mensahe makapalig-on ug positibo.

Nahiuyon sa pagmantala sa “walay kataposang maayong balita” pinaagi sa “manulonda nga naglupad sa kinatung-an sa langit,” kita nag-awhag sa mga tawo: “Kahadloki ninyo ang Diyos ug ihatag kaniya ang himaya.” (Pin. 14:​6, 7) Kita nagasulti sa mga tawo sa bisan diin bahin sa matuod nga Diyos, iyang ngalan, iyang kahibulongang mga hiyas, iyang katingalahang mga buhat, iyang mahigugmaong katuyoan, atong tulubagon kaniya, ug kon unsay iyang gikinahanglan kanato. Ang maayong balita naglakip sa kamatuoran nga pagalaglagon ni Jehova nga Diyos ang mga daotan, kinsa nagpakaulaw kaniya ug nagdaot sa kinabuhi sa ubang mga tawo. Apan dili kita ang maghukom sa mga tawo nga atong giwalihan. Ang atong tim-os nga tinguha mao nga ang labing daghan kutob sa maarangan mosanong nga paborable sa mensahe sa Bibliya aron kini mahimo gayod nga maayong balita alang kanila.​—Prov. 2:20-22; Juan 5:22.

Limitahe ang Negatibong mga Topiko. Siyempre, adunay negatibong mga bahin sa kinabuhi. Dili nato ikapiyong ang atong mga mata niini. Sa pagsugod sa usa ka panagkabildo, ikapatungha mo ang usa ka sulirang anaa sa mga hunahuna sa mga tawo diha sa imong teritoryo ug daklit kanang hisgotan. Apan kasagaran nga dili kaayo mapuslanon ang paghisgot nianag dugay. Kanunayng makabati ug makapasubong balita ang mga tawo, busa tungod sa paghisgot bahin sa daotang mga butang basin ilang sirhan ang ilang pultahan o ilang mga igdulungog. Sa sinugdan sa inyong panagkabildo, paningkamoti ang pagtumong sa atensiyon nganha sa makapahupayng mga kamatuoran diha sa Pulong sa Diyos. (Pin. 22:17) Unya, bisan pag ang tawo dili buot mopadayon sa panagkabildo, nabinlan mo siyag makapalig-ong butang nga mapalandong. Basin kana makahimo kaniyang mas andam nga mamati sa laing higayon.

Sa samang paagi, kon gidapit ka sa paghatag ug pakigpulong, ayawg lumsi ug negatibong impormasyon ang mamiminaw tungod lang kay adunay daghan niana. Kon ang mamumulong magdugay ug hisgot sa kapakyasan sa tawhanong mga magmamando, mga taho bahin sa krimen ug kapintasan, ug sa makapakurat nga pagkaylap sa imoralidad, ang epekto makapaluya. Ilakip lamang sa paghisgot ang negatibong mga bahin sa usa ka ulohan kon kana adunay mapuslanong katuyoan. Ang paghisgot ug diyutay sa maong impormasyon tingali makapasiugda sa pagkatukma sa panahon sa imong pakigpulong. Kini basin makapaila usab sa dagkong mga hinungdan nga maoy nakaingon sa usa ka kahimtang ug busa magamit aron ipakita kon nganong ang solusyon nga gipadayag sa Bibliya maoy praktikal. Kon posible, mahimong espesipiko nga dili maghisgot ug dugay sa mga suliran.

Kasagarang dili posible o maayo nga wagtangon ang tanang negatibong impormasyon gikan sa usa ka pakigpulong. Ang hagit mao ang pagpresentar sa kombinasyon sa maayo ug daotan sa paaging ang katibuk-ang epekto maoy positibo. Aron makab-ot kini, kinahanglang tinoon mo kon unsay ilakip, kon unsay dili ilakip, ug kon asang bahina ang ipasiugda. Sa Wali sa Bukid, gitambagan ni Jesus ang iyang mga tigpatalinghog nga likayan ang matinagdanon-sa-kaugalingong mga paagi sa mga eskriba ug mga Pariseo, ug nagpahayag siyag pipila ka panig-ingnan aron iilustrar ang punto. (Mat. 6:​1, 2, 5, 16) Bisan pa niana, inay hisgotan ang negatibong mga panig-ingnan niadtong relihiyosong mga pangulo, gipasiugda ni Jesus ang pagsabot sa matuod nga mga paagi sa Diyos ug pagsunod niana sa kinabuhi. (Mat. 6:​3, 4, 6-15, 17-34) Ang epekto maoy mapuslanon kaayo.

Himoang Positibo ang Paagi sa Pagpahayag. Kon ikaw naasayn sa paghatag ug pakigpulong diha sa inyong kongregasyon mahitungod sa usa ka bahin sa Kristohanong buluhaton, paningkamoti nga mahimong makapalig-on inay hinawayon. Tinoa nga imong ginabuhat kon unsay imong ginadasig nga buhaton sa uban. (Roma 2:​21, 22; Heb. 13:7) Pasagding ang gugma, dili ang pagkapikal, maoy magtukmod sa imong igasulti. (2 Cor. 2:4) Kon ikaw masaligon nga ang imong isigkamagtutuo buot nga magpahimuot kang Jehova, ang imong igasulti mopabanaag sa maong pagsalig, ug kini aduna unyay mapuslanong epekto. Matikdi kon giunsa pagpahayag ni apostol Pablo ang maong pagsalig, sumala sa natala sa 1 Tesalonica 4:1-12; 2 Tesalonica 3:​4, 5; ug Filemon 4, 8-14, 21.

Usahay ang mga ansiyano kinahanglang magpasidaan batok sa dili-maalamong panggawi. Apan ang pagkamapaubsanon makatabang kanila sa pagdumala sa ilang mga igsoon diha sa espiritu sa kalumo. (Gal. 6:1) Ang paagi sa pagsulti magpakita nga kadtong sakop sa kongregasyon giisip uban sa pagtahod. (1 Ped. 5:​2, 3) Ang Bibliya nagtambag sa mga batan-ong lalaki nga ilabinang magbantay niini. (1 Tim. 4:12; 5:​1, 2; 1 Ped. 5:5) Kon gikinahanglan ang pagbadlong, pagdisiplina, pagtul-id sa mga butang, kini angayng buhaton pinasukad sa ginaingon sa Bibliya mismo. (2 Tim. 3:16) Ang pagpadapat sa Kasulatan dili gayod angayng ipugos o tuison aron isuportar sa usa ka ideya nga tingali hugot nga gituohan sa mamumulong. Bisan pag gikinahanglan ang tambag aron sa pagtul-id, ang tono sa pakigpulong magpabiling positibo kon ang pagpasiugda ibutang ilabina sa kon unsaon paglikay nga malangkit sa buhat nga daotan, kon unsaon pagsulbad ang mga suliran, kon unsaon pagbuntog ang mga kalisdanan, kon unsaon pagtul-id sa daotang dalan, ug kon sa unsang paagi ang mga kinahanglanon ni Jehova manalipod kanato.​—Sal. 119:​1, 9-16.

Sa dihang mangandam sa imong pakigpulong, palandonga ilabina kon unsaon nimo paghatag ug konklusyon sa matag pangunang punto ug sa katibuk-ang pakigpulong. Ang kataposan nimong isulti kasagarang mao ang mahinumdoman sa labing hataas nga panahon. Positibo ba unya kana?

Sa Dihang Makigkabildo sa Isigkamagtutuo. Gipabilhan sa mga alagad ni Jehova ang kahigayonan sa pagpakig-uban panahon sa Kristohanong mga tigom. Mga panahon kini sa espirituwal nga pagpalig-on. Ang Bibliya nag-awhag kanato nga ibutang sa hunahuna nga “magdasigay sa usag usa” sa dihang magkatigom diha sa atong mga dapit sa pagsimba. (Heb. 10:25) Kana ginahimo dili lamang pinaagig mga pakigpulong ug mga komento panahon sa mga tigom kondili pinaagi usab sa pakigkabildo sa wala pa ug human sa mga tigom.

Bisan pag normal nga ang pakigkabildo maoy mahitungod sa matag-adlaw nga mga kinabuhi, ang labing dakong pagdasig nagagikan sa paghisgot ug espirituwal nga mga butang. Naglakip kini sa mga kasinatian nga gipahimuslan nato diha sa sagradong pag-alagad. Ang pagpakitag angay nga interes diha sa usag usa makapalig-on usab.

Tungod sa impluwensiya sa kalibotan alirong nato, gikinahanglan ang pagbantay. Sa nagsulat ngadto sa mga Kristohanon sa Efeso, si Pablo miingon: “Karon nga gisalikway na ninyo ang kabakakan, magsulti sa tinuod ang matag usa kaninyo sa iyang silingan.” (Efe. 4:25) Ang pagsulti sa tinuod inay sa kabakakan naglakip sa dili pagdayeg sa mga butang ug sa mga tawo nga giidolo sa kalibotan. Sa susama, si Jesus nagpasidaan batok sa “malimbongong gahom sa mga bahandi.” (Mat. 13:22) Busa sa dihang magsultiay sa usag usa, kinahanglang magbantay kita nga dili ipasiugda ang maong panglimbong pinaagi sa pagdayeg sa pagpanag-iyag materyal nga mga butang.​—1 Tim. 6:​9, 10.

Sa dihang magatambag bahin sa panginahanglan nga mahimong makapalig-on, si apostol Pablo nag-awhag kanato nga dili hukman o tamayon ang usa ka igsoon nga tingali molikay sa pipila ka butang tungod sa “mga kaluyahon sa iyang pagtuo,” nga mao, tungod kay wala siya makasabot sa bug-os nga nalangkit sa Kristohanong kagawasan. Sa tinuoray, aron ang atong pakigkabildo makapalig-on sa uban, kinahanglang atong tagdon ang ilang kagikan ug gidak-on sa ilang espirituwal nga pagtubo. Pagkamakapasubo unya nga ‘magbutang atubangan sa igsoong lalaki [o babaye] ug kapandolan o hinungdan sa pagkadagma’!​—Roma 14:1-4, 13, 19.

Kadtong nagsagubang ug seryosong personal nga mga suliran​—pananglitan, sa nakalamay nga sakit—​moapresyar sa makapalig-ong pakigkabildo. Ang maong tawo tingali manlimbasog pag-ayo aron motambong sa mga tigom. Kadtong nahibalo sa iyang kahimtang tingali mangutana: “Unsay imong gibati?” Sa walay duhaduha iyang pabilhan ang ilang pagtagad. Ugaling, ang kahimtang sa iyang panglawas basin dili mao ang ulohang iyang isipon nga labing makapadasig nga estoryahan. Ang mga pulong sa apresasyon ug pagdayeg basin labaw nga makapasadya sa iyang kasingkasing. Nakakita ka bag ebidensiya sa iyang nagpadayong gugma alang kang Jehova ug sa iyang pagkamalahutayon bisan pa sa lisod nga kahimtang? Gibati mo bang nadasig sa dihang siya mokomento? Dili ba kaha mas makapalig-on ang pagpunting sa iyang lig-ong mga hiyas ug kon unsay iyang ikaabag sa kongregasyon inay sa iyang mga kahuyangan?​—1 Tes. 5:11.

Aron ang atong pakigkabildo mahimong makapalig-on, hinungdanon ilabina ang pagtagad sa hunahuna ni Jehova diha sa ginahisgotan. Sa karaang Israel, kadtong nagsultig batok sa mga hawas ni Jehova ug nagreklamo bahin sa mana nakaagom sa dakong kasuko sa Diyos. (Num. 12:1-16; 21:​5, 6) Ginahatag nato ang ebidensiya nga nakabaton kitag kaayohan gikan sa maong mga panig-ingnan sa dihang magpakita kitag pagtahod alang sa mga ansiyano ug pagpabili sa espirituwal nga pagkaong gitagana sa matinumanon ug maalamong ulipon nga matang.​—1 Tim. 5:17.

Ang pagpangitag mapuslanong mga butang nga mahisgotan sa dihang kauban sa atong Kristohanong mga igsoon talagsa rang mahimong suliran. Bisan pa niana, kon ang mga komento sa usa maoy sobra ka hinawayon, manguna sa pagpunting sa estorya sa makapalig-ong direksiyon.

Kon kita nagsangyaw sa uban, nagpakigpulong diha sa plataporma, o nagpakigsulti sa isigkamagtutuo, hinaot atong gamiton ang hait nga pagsabot aron ipagula ang bahandi sa atong mga kasingkasing nga “bisan unsang sulti nga maayo nga makapalig-on sumala sa gikinahanglan, aron makahatag kinig kaayohan sa mga magapatalinghog.”​—Efe. 4:29.