Mahimong Makapalig-on

¹ Sanglit kay nagakinabuhi kita sa “makuyaw nga mga panahong lisod sagubangon,” kitang tanan nagakinananglag pagdasig. (2 Tim. 3:1) Kay nahibalo gayod niining maong panginahanglan bisan sa iyang adlaw, si Pablo matinguhaon sa paggamit sa iyang pakig-uban sa iyang mga igsoon ingong kahigayonan alang sa “pagdinasigay.” Iyang giawhag ang iyang mga igsoon nga “tinguhaon ang mga butang ... nga makapalig-on sa usag usa.” (Roma 1:11, 12; 14:19) Kini nga panlimbasog milampos sa “pagpalig-on sa mga kalag sa mga tinun-an, nga nagdasig kanila nga magpabilin sa pagtuo.” (Buh. 14:22) Gikinahanglan gayod nato kanang matanga sa pagdasig karong adlawa.

² Kita makapalig-on sa uban pinaagi sa atong gisulti. Kon sa tukma gamiton, ang atong mga pulong mahimong “ingon sa mga mansanas nga bulawan diha sa mga linilok nga salapi.” (Prov. 25:11) Pinaagig pagpakig-ambit sa mga tigom, kita “magdinasigay sa usag usa.” (Heb. 10:25) Ang atong dila magamit sa positibong paagi sa dihang ipaambit nato ang mga kasinatian, paghatag ug komendasyon, o paghisgot sa espirituwal nga mga butang. Kanang maong makapalig-ong paggamit sa dila maoy “maayo alang sa pagpalig-on, aron makahatag kini ug unsay paborable sa mga tigpaminaw.”​—Efe.4:29.

³ Pakigsulti Bahin sa mga Butang nga Makapalig-on: Sa Filipos 4:8, si Pablo nagtaganag makatabang nga mga giya alang sa atong sinultihan. Siya nag-ingon nga angay natong pamalandongon ang mga butang matuod, butang nga ugdang talagdon, matarong, putli, hiligugmaon, butang nga ginaingong maayo, hamili, ug dalayegon. Kita makaseguro kanunay nga ang atong isulti tinuod ug makabenepisyo sa uban kon kana gipasukad sa Pulong sa Diyos. (Juan 17:17) Ang atong Kristohanong pagpahinungod, kon unsay atong nakat-onan sa mga tigom sa kongregasyon, ang paagi nga gituman nato sa bug-os ang atong ministeryo, ug uban pa nianang mga butanga maoy mga butang nga ugdang pagatagdon. Ang makapalig-ong mga panaghisgot bahin sa mga sukdanan ug mga prinsipyo sa pulong sa Diyos seguradong makatabang kanato nga mahimong “maalamon alang sa kaluwasan.” (2 Tim. 3:15) Makapahayag kita sa atong pagpabili sa putling panggawi nga ginabuhat niadtong anaa sa hinlong organisasyon ni Jehova. Atong madayeg ang hiligugmaong mga buhat sa kalulot sa atong mga igsoon. (Juan 13:34, 35) Ang mga butang nga maayong pagkapamulong nagalakip sa makapalig-on nga Kristohanong mga hiyas sa pagtuo, kalipay, pakigdait, ug taas-nga-pailob nga atong naobserbahan diha sa mga igsoon. Ang panaghisgot bahin nianang mga butanga maoy ‘maayo para sa ikalig-on’ sa uban.​—Roma 15:2.

⁴ Matag adlaw, kita giatubang sa makapaluyang mga kabalaka sa kalibotan. Pagkamakarepresko ang pagpadaplin niining mga butanga ug makig-ambit sa mahigugmaong panag-ubanay sa atong mga igsoon! Nganong dili moabot nga sayo sa Kingdom Hall aron makaarang sa pagbuhat niini? Usab, human sa tigom kita may dugang kahigayonan sa paglig-on sa usag usa. Kining bililhong panahon nga atong maarangan sa paggugol sa tingob maoy usa ka bahandi nga pakamahalon. Kon kita kanunayng makapadasig ug makapalig-on, ang uban sa pagkamatinud-anon moingon kanato: “Ilang napalagsik ang akong espiritu.”​—1 Cor. 16:18.