Paglinig-onay sa Usag Usa Panahon sa Pagsangyaw
1 Kitang tanan malipay sa pagkadungog ug makapadasig nga “pulong nga gisulti sa hustong panahon.” (Prov. 25:11) Sa dihang mokuyog kita sa uban sa pagsangyaw, sa unsang paagi atong matino nga makapadasig ang atong panag-estoryahay?
2 Makapalig-ong Panag-estoryahay: Makapalig-on gayod ang paghisgot ug espirituwal nga mga butang sa atong panag-estoryahay panahon sa atong pagsangyaw! (Sal. 37:30) Mahimo natong hisgotan ang atong presentasyon o iasoy ang atong makapadasig nga mga kasinatian sa pagsangyaw sa di pa dugay. (Buh. 15:3) Aduna bay punto nga nakapainteres kanato gikan sa atong personal nga pagbasa sa Bibliya, sa bag-ong mga magasin, o tigom sa kongregasyon? Mahimo natong hisgotan ang mga punto sa pakigpulong publiko nga bag-o pa natong nadunggan sa Kingdom Hall.
3 Basin maluya kita kon dili nato matubag ang pagsupak sa tagbalay. Human makabiya sa balay, mapuslanon gayod kon mogahin kita ug pipila ka minuto aron hisgotan nato ug sa atong kauban kon sa unsang paagi matubag ang maong pagsupak sa sunod higayon, tingali pinaagi sa paggamit sa librong Nangatarongan. Ug kon aduna kitay naangayan sa presentasyon sa atong kauban, ang sinserong pagdayeg kaniya makapadasig gayod.
4 Lig-ona ang Uban: Aduna bay pipila diha sa atong grupo sa CBS nga taudtaod na natong wala ikauban sa pagsangyaw? Kon personal nato silang dapiton sa pag-uban kanato sa pagsangyaw, kini moresulta sa “pagdinasigay.” (Roma 1:12) Malipay gayod ang mga regular ug oksilyare payunir kon adunay mouban kanila sa pagsangyaw, ilabina sa sayo sa buntag o sa kahaponon, diin diyutay rang magmamantala ang manangyaw. Makapaluyo kita sa mga payunir pinaagi sa atong pagkaandam nga mouban kanila. Aduna bay magmamantala nga masakiton ug limitado rag mahimo sa ministeryo? Basin makatabang ang pagdapit kaniya sa pag-uban kanato, tingali sa usa ka pagtuon sa Bibliya.—Prov. 27:17.
5 Ang komendasyon ug mga pulong sa pagpasalamat, bisan sa gagmayng mga butang, makapadasig gayod. Hinumdoman nato kana sa dihang kita magsangyaw uban sa mga igsoon, sanglit buot natong “magpadayon sa . . . paglinig-onay sa usag usa.”—1 Tes. 5:11.