Mga Benepisyo sa Pagpasakop sa Teokratikanhong Kahikayan

ANG atong pagpasakop sa Diyos, ang Soberano sa Uniberso, gikinahanglan aron organisado ta sa pagbuhat sa kabubut-on ni Jehova. Kita nag-ila sa pagkaulo sa iyang Anak diha sa Kristohanong kongregasyon ug nagsunod sa prinsipyo sa pagkaulo sa ubang bahin sa atong kinabuhi. Ang pagpasakop sa maong teokratikanhong kahikayan makahatag ug kaayohan sa tanan.

² Ang kahikayan sa pagpasakop sa giestablisar nga awtoridad unang gipaila ngadto sa mga tawo didto sa tanaman sa Eden. Kini makita sa mga sugo sa Diyos diha sa Genesis 1:28 ug 2:16, 17. Ang ubang linalang dinhi sa yuta magpasakop sa mga tawo, ug si Adan ug Eva magpasakop sa kabubut-on ug awtoridad sa Diyos. Ang pagkamasinugtanon sa awtoridad sa Diyos moresultag kalinaw ug kahapsay. Sa ulahi, ang prinsipyo sa pagkaulo gipasiugda sa 1 Corinto 11:3. Si apostol Pablo misulat: “Gusto nakong mahibalo mo nga ang ulo sa matag lalaki mao ang Kristo; sa baylo, ang ulo sa babaye mao ang lalaki; sa baylo, ang ulo sa Kristo mao ang Diyos.” Kini nagpakita nga ang tanan, gawas kang Jehova, nailalom sa kahikayan sa pagkaulo.

³ Kadaghanang tawo karon wala moila o mosunod sa prinsipyo sa pagkaulo. Ngano? Ang problema nagsugod sa Eden dihang ang unang ginikanan sa mga tawo tinuyong misalikway sa soberanong pagkaulo sa Diyos. (Gen. 3:4, 5) Pero wala gyod sila mahimong tinuod nga gawasnon. Hinuon, sila nahimong sakop sa daotang espiritung linalang, si Satanas nga Yawa. Ang unang rebelyon maoy hinungdan nga ang katawhan napahilayo sa Diyos. (Col. 1:21) Ingong resulta, ang kadaghanang tawo karon padayong gigamhan sa usa nga daotan.​—1 Juan 5:19.

⁴ Pinaagi sa atong pagkat-on sa Pulong sa Diyos ug pagpadapat niana, kita migawas gikan sa impluwensiya ni Satanas. Ingong dedikado, bawtismadong mga Saksi, atong gidawat si Jehova ingong Soberano sa atong kinabuhi. Mouyon kita kang Haring David, nga miila kang Jehova ingong “pangulo ibabaw sa tanan.” (1 Cron. 29:11) Oo, mapainubsanon natong gipahayag: “Ilha nga si Jehova maoy Diyos. Siya ang nagbuhat kanato, ug kita iyang gipanag-iya. Kita ang iyang katawhan ug mga karnero sa iyang sibsibanan.” (Sal. 100:3) Atong giila nga si Jehova gamhanan ug takos sa atong bug-os nga pagpasakop kay iyang gilalang ang tanang butang. (Pin. 4:11) Ingong mga ministro sa matuod nga Diyos, gisunod nato si Jesu-Kristo, kinsa naghatag ug hingpit nga panig-ingnan sa pagpasakop sa Diyos.

⁵ Unsay nakat-onan ni Jesus gikan sa mga butang nga iyang giantos dinhi sa yuta? Ang Hebreohanon 5:8 nagtubag: “Bisan tuod anak siya, nakat-onan niya ang pagkamasinugtanon gikan sa mga butang nga iyang giantos.” Oo, si Jesus padayong nagpakitag maunongong pagpasakop sa iyang langitnong Amahan bisan pa sa mga kalisdanan. Dugang pa, si Jesus wala maghimog bisan unsa sa iyang kaugalingong pagbuot. Wala siya magsulti sa kaugalingon ra niyang ideya o mangandoy ug kaugalingong himaya. (Juan 5:19, 30; 6:38; 7:16-18) Sa iyang ministeryo, si Jesus malipayong nagbuhat sa kabubut-on sa iyang Amahan, bisan pag tungod niini siya gisupak ug gilutos. (Juan 15:20) Siya nagpasakop gihapon sa Diyos. Si Jesus “nagpaubos” bisan hangtod sa “kamatayon sa estaka sa pagsakit.” Tungod sa iyang bug-os nga pagpasakop kang Jehova daghan siyag nadawat nga panalangin, nga miresulta sa walay kataposang kaluwasan para sa katawhan, pagbayaw kaniya, ug paghimaya sa iyang Amahan.​—Filip. 2:5-11; Heb. 5:9.

MGA PAAGI SA PAGPASAKOP SA TEOKRATIKANHONG KAHIKAYAN

⁶ Dihang magpasakop ta sa Diyos pinaagi sa pagbuhat sa iyang kabubut-on, atong malikayan ang daghang kabalaka ug kahigawad nga maagoman niadtong midumili sa pagpasakop sa pagkasoberano ni Jehova. Ang atong kaaway, ang Yawa, kanunayng naningkamot sa pagtukob kanato. Kita maluwas gikan sa usa nga daotan kon kita mobarog batok kaniya ug mapainubsanong magpasakop kang Jehova.​—Mat. 6:10, 13; 1 Ped. 5:6-9.

⁷ Sulod sa Kristohanong kongregasyon, atong giila ang pagkaulo sa Kristo ug ang awtoridad nga iyang gihatag sa “matinumanon ug maalamong ulipon.” Kini dunay epekto sa atong tinamdan ug pagpakiglabot sa usag usa. Ang diyosnong pagpasakop sa kahikayan sa kongregasyon magdasig nato nga magmasinugtanon sa Pulong sa Diyos diha sa tanang bahin sa atong pagsimba. Lakip niini ang atong pagministeryo, atong pagtambong ug pagkomento sa tigom, atong relasyon sa mga ansiyano, ug ang atong kooperasyon sa mga kahikayan sa organisasyon.​—Mat. 24:45-47; 28:19, 20; Heb. 10:24, 25; 13:7, 17.

⁸ Ang atong pagpasakop sa Diyos makaamot sa kalinaw, kasegurohan, ug kahapsay sa Kristohanong kongregasyon. Ang mga hiyas ni Jehova makita diha sa iyang diyosnong mga alagad. (1 Cor. 14:33, 40) Ang ato mismong mga kasinatian diha sa organisasyon ni Jehova maoy nagpalihok nato sa pagpahayag ug mga pulong nga sama sa gisulti ni Haring David. Human niya makita ang kalainan sa mga alagad ni Jehova ug sa mga daotan, si David mipahayag: “Malipayon ang katawhan kansang Diyos mao si Jehova!”​—Sal. 144:15.

⁹ Sulod sa kahikayan sa kaminyoon ug sa pamilya, “ang ulo sa babaye mao ang lalaki.” Sa baylo, ang ulo sa mga lalaki mao ang Kristo, samtang ang ulo sa Kristo mao ang Diyos. (1 Cor. 11:3) Ang mga asawa magpasakop sa ilang mga bana, ug ang mga anak magpasakop sa ilang mga ginikanan. (Efe. 5:22-24; 6:1) Dunay kalinaw kon sundon sa matag membro sa pamilya ang prinsipyo sa pagkaulo.

¹⁰ Ipasundayag sa bana ang iyang pagkaulo sa mahigugmaong paagi, agig pagsundog sa Kristo. (Efe. 5:25-29) Dihang dili niya abusohan o talikdan ang iyang pagkaulo, ang iyang asawa ug mga anak malipay nga magpasakop kaniya. Ang papel sa asawa maoy katimbang, o kauban, sa bana. (Gen. 2:18) Pinaagi sa iyang mapailobong pagsuportar ug pagtahod sa iyang bana, mapahimut-an niya ang iyang bana ug madayeg ang Diyos. (1 Ped. 3:1-4) Dihang sundon sa mga bana ug asawa ang tambag sa Bibliya bahin sa pagkaulo, sila naghatag ug maayong panig-ingnan sa ilang mga anak sa pagpasakop sa Diyos.

¹¹ Ang atong pagpasakop sa Diyos makaapektar sab sa atong panglantaw sa “labaw nga mga awtoridad,” nga “gibutang sa Diyos . . . sa ilang lainlaing posisyon.” (Roma 13:1-7) Ingong mga lungsoranon nga masinundanon sa balaod, ang mga Kristohanon mobayad ug buhis. Ilang ibayad “sa Cesar ang iya sa Cesar, apan ngadto sa Diyos ang iya sa Diyos.” (Mat. 22:21) Dugang pa, ang mga kahikayan sa pagkobre sa teritoryo angayng subay sa mga balaod sa pagprotektar ug personal nga impormasyon. Kay nagpasakop ta ug nagsunod sa mga awtoridad sa bisan unsang sugo nga dili supak sa matarong nga balaod ni Jehova, kita makapokus sa atong panahon ug kusog alang sa buluhatong pagsangyaw.​—Mar. 13:10; Buh. 5:29.

¹² Ang teokratikanhong pagpasakop hinungdanon sa tanang bahin sa atong kinabuhi. Pinaagi sa mga mata sa pagtuo, makita nato ang adlaw dihang ang tanang tawo magpasakop na kang Jehova nga Diyos. (1 Cor. 15:27, 28) Pagkabulahan unya niadtong malipayong nag-ila sa pagkasoberano ni Jehova ug padayong magpasakop kaniya hangtod sa hangtod!