Diyosnong Pagpasakop​—Ngano ug ni Kinsa?

“Ako nahibalo pag-ayo, Oh Jehova, nga wala diha sa yutan-ong tawo ang iyang dalan. Dili iya sa tawo nga nagalakaw bisan ang pagmando sa iyang lakang.”​—JEREMIAS 10:23.

1. Unsang mga dagway sa independensiya ang lapnag gipabilhan?

APIL sa labing iladong mga dokumento sa tawo mao ang Deklarasyon sa Independensiya, nga pinaagi niana 13 ka Britanikong mga koloniya sa Amerika del Norte sa ika-18ng siglo mingdeklarar sa ilang independensiya gikan sa ilang inahang nasod, ang Britanya. Buot nilag kagawasan, ug ang independensiya gikan sa langyawng paggahom ug kagawasan nagkauban. Mahimo nga dakong bentaha ang politikanhon ug ekonomikanhong independensiya. Sa bag-o pa pila ka nasod sa Silangang Uropa nanglihok padulong sa politikanhong independensiya. Bisan pa, pagaangkonon nga sa maong mga yuta ang independensiya nagdalag daghang bug-at nga mga suliran.

2, 3. (a) Unsang dagway sa independensiya ang dili maayo? (b) Sa unsang paagi kining kamatuorana gipasabot sa sinugdan?

² Bisan tuod ang lainlaing mga matang sa independensiya tingali maayo, adunay usa ka matang sa independensiya nga dili maayo. Unsa man kana? Ang independensiya gikan sa Magbubuhat sa tawo, si Jehova nga Diyos. Kana dili usa ka panalangin apan usa ka tunglo. Ngano? Tungod kay ang tawo wala tuyoa nga mag-independente sa paglihok gikan sa iyang Magbubuhat, sama sa haom kaayo nga gipakita sa mga pulong ni propeta Jeremias nga gikutlo sa itaas. Sa laing mga pulong, ang tawo gituyo nga magpasakop sa iyang Magbubuhat. Ang pagpasakop sa atong Maglalalang nagkahulogan sa pagkamasinugtanon kaniya.

³ Kanang kamatuorana giklaro pag-ayo ngadto sa unang tawhanong magtiayon pinaagi sa sugo ni Jehova kanila sumala sa nahitala sa Genesis 2:16, 17: “Gikan sa matag kahoy sa tanaman makakaon ka sa katagbawan. Apan sa kahoy sa kahibalo sa maayo ug daotan dili ka magkaon gikan niana, kay sa adlaw nga mokaon ka gikan niana mamatay ka gayod.” Ang pagdumili sa pagpasakop sa iyang Magbubuhat misangpot sa sala, pag-antos, ug kamatayon alang kang Adan ug sa tanan niyang mga anak.​—Genesis 3:19; Roma 5:12.

4, 5. (a) Unsay misangpot sa pagdumili sa mga tawo sa pagpasakop sa Diyos? (b) Unsang moral nga kasugoan ang dili maikyasan?

⁴ Ang pagdumili sa mga tawo sa pagpasakop sa Diyos maoy dili maalamon ug daotan sa moral nga paagi. Sa kalibotan misangpot kana sa lapnag nga kamalinapason, krimen, kabangisan, ug seksuwal nga imoralidad uban sa mga bunga nianang mga sakit nga ipasa sa seksuwal nga relasyon. Gawas pa, dili ba ang hampak karong adlawa sa krimen sa kabatan-onan gipahinabo ilabina sa pagdumili sa mga batan-on sa pagpasakop kang Jehova, ingon man ngadto sa ilang mga ginikanan ug ngadto sa mga balaod sa yuta? Ang maong espiritu sa independensiya makita diha sa katingad-anan ug way-areglar nga benistehan sa daghang tawo ug panampalas nga sinultihan nga ilang gigamit.

⁵ Apan walay makaikyas sa dili-mapala moral nga kasugoan sa Maglalalang: “Ayaw kamo pagpalimbong: Ang Diyos dili mabiaybiay. Kay bisan unsa ang ginapugas sa usa ka tawo, kini usab ang iyang pagaanihon; tungod kay siya nga nagapugas nga nagapanglantaw sa iyang unod magaani ug kadunotan gikan sa iyang unod.”​—Galacia 6:7, 8.

6, 7. Unsa ang lintunganayng hinungdan sa pagdumili sa pagpasakop, sumala sa makita sa unsang mga panig-ingnan?

⁶ Unsa ang lintunganayng hinungdan niining tanang pagdumili sa pagpasakop? Sa yanong pagkasulti, kini mao ang kahakog ug garbo. Kanay hinungdang si Eva, ang unang babaye, nagpalimbong sa bitin ug mikaon sa gidiling bunga. Kon siya unta makasaranganon pa ug mapaubsanon, ang panental nga mahisama sa Diyos​—ang paghukom nga kinaugalingon kon unsay maayo ug daotan—​dili unta madanihon alang kaniya. Ug kon siya unta dili pa hakog, dili niya tinguhaon ang butang nga tin-awng gidili sa iyang Magbubuhat, si Jehova nga Diyos.​—Genesis 2:16, 17.

⁷ Wala madugay tapos sa pagkahulog ni Adan ug Eva, ang garbo ug kahakog maoy nagpahinabo nga gipatay ni Cain ang iyang igsoong si Abel. Gawas pa, ang kahakog mao ang hinungdang ang pila ka manulonda milihok nga independente, nga mingbiya sa ilang unang posisyon ug nagsul-ob ug unod aron makapahimulos ug unodnong mga kalipayan. Ang garbo ug kahakog mitukmod kang Nimrod ug mao ang timaan sa kadaghanang magmamando sa kalibotan sukad sa iyang panahon.​—Genesis 3:6, 7; 4:6-8; 1 Juan 3:12; Judas 6.

Kon Nganong Angay Kitang Magpasakop Kang Jehova nga Diyos

8-11. Unsa ang upat ka lig-ong mga katarongan sa atong pagpakitag diyosnong pagpasakop?

⁸ Nganong angay kitang magpasakop sa atong Magbubuhat, si Jehova nga Diyos? Una sa tanan tungod kay siya mao ang Soberano sa Uniberso. Ang tanang pagbulot-an makataronganong anaa kaniya. Siya ang atong Maghuhukom, Maghahatag-Balaod, ug Hari. (Isaias 33:22) Tukma kining nahisulat bahin kaniya: “Ang tanang butang hubo ug dayag nga binuksan sa panan-aw niya kang kinsa magahatag ra unya kitag husay.”​—Hebreohanon 4:13.

⁹ Dugang pa, sanglit ang atong Magbubuhat maoy labing gamhanan, walay mausa ang mahimong molampos sa pagsupak kaniya; walay mausa ang mahimong dili magpakabana sa iyang obligasyon sa pagpasakop Kaniya. Sa madugay o madali, kadtong modumili malaglag sama sa nahitabo kang Paraon sa kakaraanan ug mao usab unya si Satanas nga Yawa sa nahaigong panahon sa Diyos.​—Salmo 136:1, 11-15; Pinadayag 11:17; 20:10, 14.

¹⁰ Ang pagpasakop mao ang obligasyon sa tanang intelihenteng mga linalang tungod kay nagalungtad sila alang sa katuyoan nga mag-alagad sa ilang Magbubuhat. Ang Pinadayag 4:11 nagapahayag: “Takos ikaw, Jehova, among Diyos, sa pagdawat sa himaya ug sa kadungganan ug sa gahom, tungod kay ikaw naglalang sa tanang butang, ug tungod sa imong kabubut-on sila naglungtad ug nangalalang.” Siya mao ang Dakong Magkokolon, ug siya nagahimo sa tawhanong mga sudlanan sa pag-alagad sa iyang katuyoan.​—Isaias 29:16; 64:8.

¹¹ Dili angay natong kalimtan ang kamatuoran nga ang atong Magbubuhat maoy maalamon-sa-tanan, busa nahibalo siya kon unsay labing maayo alang kanato. (Roma 11:33) Ang iyang mga balaod maoy ‘alang sa atong kaayohan.’ (Deuteronomio 10:12, 13) Labaw sa tanan, “ang Diyos gugma,” mao nga buot lamang niya ang kinamaayohan alang kanato. Pagkadaghan sa atong matukmorong mga katarongan sa pagpasakop sa atong Magbubuhat, si Jehova nga Diyos!​—1 Juan 4:8.

Si Jesu-Kristo, ang Hingpit nga Panig-ingnan sa Diyosnong Pagpasakop

12, 13. (a) Giunsa pagpadayag ni Jesu-Kristo ang diyosnong pagpasakop? (b) Unsang mga pulong ni Jesus ang nagpadayag sa iyang mapinasakopong tinamdan?

¹² Sa walay duhaduha, ang bugtong Anak ni Jehova, si Jesu-Kristo, naghatag kanatog hingpit nga panig-ingnan sa diyosnong pagpasakop. Gipunting kini ni apostol Pablo sa Filipos 2:6-8: “[Si Jesus], bisan pag siya naglungtad sa dagway sa Diyos, wala maghunahuna sa pag-ilog, nga mao, nga siya mahisama sa Diyos. Wala, apan siya naghukas sa iyang kaugalingon ug nagbaton sa dagway sa usa ka ulipon ug nahisama sa mga tawo. Labaw pa niana, sa dihang nakaplagan niya ang iyang kaugalingon nga sama sa usa ka tawo, siya [dugang pa] nagpaubos sa iyang kaugalingon ug nagmasinugtanon hangtod sa kamatayon, oo, kamatayon diha sa usa ka kahoy sa pagsakit.” Sa dinhi sa yuta, si Jesus subsob nagpahayag nga siya wala magbuhat sa iyang kaugalingong pagbuot; siya wala maglihok nga independente, apan kanunay nga nagpasakop sa iyang langitnong Amahan.

¹³ Mabasa nato sa Juan 5:19, 30: “Si Jesus nag-ingon kanila: ‘Sa pagkatinuod ako magaingon kaninyo, Ang Anak dili makabuhat sa usa ka butang sa iyang kaugalingong pagbuot, apan kon unsa lamang nga mga butang ang iyang makita nga ginabuhat sa Amahan. Kay bisan unsay ginabuhat Niya, kining mga butanga ginabuhat usab sa Anak sa samang paagi. Ako dili makabuhat sa usa ka butang sa akong kaugalingong pagbuot; sumala sa akong madungog, ako nagahukom; ug ang paghukom nga akong ginapahamtang maoy matarong, tungod kay ako nagatinguha, dili sa akong kaugalingong kabubut-on, kondili sa kabubut-on niya nga nagpadala kanako.’” Sa samang paagi, siya nagbalikbalik sa pag-ampo sa gabii sa pagbudhi kaniya: “Dili sumala sa akong pagbuot, kondili sumala sa imong pagbuot.”​—Mateo 26:39, 42, 44; tan-awa usab ang Juan 7:28; 8:28, 42.

Karaang mga Panig-ingnan sa Diyosnong Pagpasakop

14. Sa unsang mga paagi si Noe nagpakitag diyosnong pagpasakop?

¹⁴ Nahiapil sa unang tawhanong mga panig-ingnan sa diyosnong pagpasakop mao si Noe. Gipasundayag niya ang iyang pagpasakop sa tulo ka paagi. Una, pinaagi sa pagkahimong tawong matarong, nga walay-ikasaway taliwala sa iyang mga katalirongan, nga naglakaw uban sa matuod nga Diyos. (Genesis 6:9) Ikaduha, pinaagi sa pagtukod sa arka. Siya “mibuhat sumala sa tanan nga gisugo sa Diyos kaniya. Gibuhat gayod niya kana.” (Genesis 6:22) Ikatulo, pinaagi sa pagmantala sa pasidaan bahin sa umaabot nga Lunop ingong “usa ka magwawali sa pagkamatarong.”​—2 Pedro 2:5.

15, 16. (a) Unsang maayong panig-ingnan ang gihatag ni Abraham sa diyosnong pagpasakop? (b) Giunsa pagpadayag ni Sara ang diyosnong pagpasakop?

¹⁵ Si Abraham maoy laing talagsaong panig-ingnan sa diyosnong pagpasakop. Gipadayag niya ang pagpasakop pinaagi sa pagsugot sa sugo sa Diyos: “Pahawa ka gikan sa imong yuta.” (Genesis 12:1) Kana nagkahulogan sa pagbiya sa iyang haruhay nga palibot sa Ur (dili kay gamayng siyudad, sumala sa gipaila sa mga kaplag sa arkeolohiya) aron sa paglaaglaag ingong usa ka tawong tiglalin diha sa usa ka langyawng yuta sulod sa usa ka gatos ka tuig. Si Abraham nagpadayag ilabina ug diyosnong pagpasakop pinaagi sa pagtuman sa dakong pagsulay sa paghalad nga kinabubut-on sa iyang anak nga si Isaac.​—Genesis 22:1-12.

¹⁶ Ang asawa ni Abraham nga si Sara naghatag kanatog laing maayong panig-ingnan sa diyosnong pagpasakop. Ang paglibotlibot sa usa ka langyawng yuta sa walay duhaduha nagdalag daghang kalisdanan, apan dili kita makabasa nga siya nagbagutbot. Siya mihatag ug maayong panig-ingnan sa diyosnong pagpasakop sa duha ka higayon sa dihang gipaila siya ni Abraham ingong iyang igsoong babaye atubangan sa paganong mga magmamando. Sa duha ka panahon siya miuyon, bisan pag siya hapit mahimong usa ka sakop sa mga harem sa paganong mga magmamando ingong sangpotanan. Nagapamatuod sa iyang diyosnong pagpasakop mao ang iyang paagi sa pagtumong sa iyang kaugalingon sa iyang bana, si Abraham, ingong “akong ginoo,” nga nagpakita nga ang diyosnong pagpasakop mao ang tinuod nga tinamdan sa iyang kasingkasing.​—Genesis 12:11-20; 18:12; 20:2-18; 1 Pedro 3:6.

17. Nganong ikaingon nga si Isaac nagpakitag diyosnong pagpasakop?

¹⁷ Dili nato kalimtan ang panig-ingnan sa diyosnong pagpasakop nga gihatag sa anak ni Abraham nga si Isaac. Ang Hudiyohanong tradisyon nagpaila nga si Isaac maoy mga 25 anyos na sa dihang si Jehova nagsugo sa iyang amahan, si Abraham, sa pagtanyag kaniya ingong usa ka halad. Kon buot pa ni Isaac, sayon ra unta siyang makasukol sa iyang amahan, si kinsa usa na ka gatos ka tuig nga mas gulang kay kaniya. Apan wala. Bisan pag si Isaac nahibulong nga walay hayop alang sa halad, siya aghop nga misugot nga siya ibutang sa iyang amahan ibabaw sa halaran ug dayon gigapos ang iyang kamot ug tiil aron mapugngan o makontrolar ang dili-tinuyong mga sumbalik-lihok nga basin mahitabo kon gamiton na ang pangpatay nga punyal.​—Genesis 22:7-9.

18. Giunsa pagpakita ni Moises ang talagsaon nga diyosnong pagpasakop?

¹⁸ Sa katuigan sa ulahi, si Moises naghatag ug maayong panig-ingnan alang kanato sa diyosnong pagpasakop. Kana sa pagkatinuod gipaila sa pagbatbat kaniya ingong “ang labing maaghop sa tanang tawo nga anaa sa nawong sa yuta.” (Numeros 12:3) Ang iyang masinugtanong pagtuman sa mga sugo ni Jehova sulod sa 40 ka tuig sa kamingawan, bisan pag siya maoy magtatan-aw sa usa ka masukihong katawhan nga mokabat ug duha o tulo ka milyon, dugang nagapamatuod sa iyang diyosnong pagpasakop. Busa ang rekord nagaingon nga “gibuhat ni Moises ang sumala sa tanan nga gisugo kaniya ni Jehova. Gibuhat gayod niya kana.”​—Exodo 40:16.

19. Pinaagi sa unsang mga pahayag nga si Job nagpakita sa iyang pagpasakop kang Jehova?

¹⁹ Si Job maoy laing talagsaong tawo nga naghatag kanatog usa ka ekselenteng panig-ingnan sa diyosnong pagpasakop. Human tugoti ni Jehova si Satanas sa pagwagtang sa tanang kabtangan ni Job, sa pagpatay sa iyang mga anak, ug dayon sa paghampak kaniya pinaagi sa “hubag nga makapatay gikan sa lapalapa sa iyang tiil ngadto sa alimpulo sa iyang ulo,” ang asawa ni Job miingon kaniya: “Ikaw ba nagahupot gihapon nga lig-on sa imong pagkamatinumanon? Tungloha ang Diyos ug magpakamatay ka!” Bisan pa niana, gipakita ni Job ang iyang diyosnong pagpasakop pinaagi sa pag-ingon kaniya: “Ikaw nagasulti ingon sa usa sa mga babayeng buang nga nagasulti. Modawat ba lamang kita sa maayo gikan sa matuod nga Diyos ug dili modawat usab sa daotan?” (Job 2:7-10) Nagapadayag sa samang tinamdan sa hunahuna mao ang iyang mga pulong nga nahitala sa Job 13:15: “Bisan pa ako iyang patyon, dili ba ako magpaabot?” Bisan pag si Job, sa pagkatinuod nabalaka kaayo sa iyang kaugalingong pagpakamatarong, dili angay natong kalimtan nga sa kataposan si Jehova miingon ngadto sa usa sa iyang mga maglilipay-kono: “Ang akong kasuko miinit batok kanimo ug sa imong duha ka kauban, kay kamo wala magsulti sa tinuod mahitungod kanako sama sa akong alagad nga si Job.” Sa walay duhaduha, si Job nagahatag kanatog maayong panig-ingnan sa diyosnong pagpasakop.​—Job 42:7.

20. Sa unsang mga paagi si David nagpasundayag ug diyosnong pagpasakop?

²⁰ Sa paghisgot ug usa pa ka panig-ingnan gikan sa Hebreohanong Kasulatan, anaa si David. Sa dihang si Haring Saul nagpangita kang David nga samag siya usa ka hayop, si David may duha ka higayon sa pagtapos sa iyang mga suliran pinaagi sa pagpatay kang Saul. Apan, ang diyosnong pagpasakop ni David nagpugong niya sa pagbuhat niana. Ang iyang mga pulong nahisulat sa 1 Samuel 24:6: “Dili mahunahunaan, sa akong bahin, gikan sa panglantaw ni Jehova, nga akong pagabuhaton kining butanga ngadto sa akong ginoo, ang dinihogan ni Jehova, pinaagi sa pagtuy-od sa akong kamot batok kaniya, kay siya mao ang dinihogan ni Jehova.” (Tan-awa usab ang 1 Samuel 26:9-11.) Sa susama iyang gipakita ang iyang diyosnong pagpasakop pinaagi sa pagdawat ug pagbadlong sa dihang siya nakahimog mga sayop o nakasala.​—2 Samuel 12:13; 24:17; 1 Cronicas 15:13.

Panig-ingnan ni Pablo sa Pagpasakop

21-23. Sa unsang lainlaing higayon si apostol Pablo nagpakitag diyosnong pagpasakop?

²¹ Sa Kristohanon Gregong Kasulatan, aduna kitay usa ka talagsaong panig-ingnan sa diyosnong pagpasakop diha kang apostol Pablo. Diha niini giawat niya ang iyang Agalon, si Jesu-Kristo, sama sa iyang gibuhat sa tanang ubang bahin sa iyang ministeryo ingong apostol. (1 Corinto 11:1) Bisan tuod si Jehova nga Diyos mas kusganong migamit kaniya kay ni bisan kinsa sa ubang apostoles, si Pablo wala gayod molihok nga independente. Si Lucas nagsugilon kanato nga sa dihang ang pangutana mitungha bahin kon kaha ang Hentil nga mga kinabig kinahanglang masirkunsidahan, “sila [ang mga igsoon sa Antioquia] mihikay nga si Pablo ug si Bernabe ug uban pa kanila moadto sa mga apostoles ug sa mga ansiano sa Jerusalem mahitungod sa maong panaglalis.”​—Buhat 15:2.

²² Mahitungod sa kalihokan ni Pablo ingong misyonaryo, kita gitug-anan diha sa Galacia 2:9: “Sa dihang ilang nahibaloan ang dili-takos nga kalulot nga gikahatag kanako, si Santiago ug si Cefas ug si Juan, nga sila mao ang daw mga haligi, mihatag kanako ug kang Bernabe sa tuong kamot sa pagpakig-ambitay, aron kami mangadto gayod sa kanasoran, apan sila ngadto kanila nga sinirkunsidahan.” Inay kay molihok nga kinaugalingon, si Pablo nangita sa giya.

²³ Sa susama, ang kataposang panahon nga si Pablo didto sa Jerusalem, iyang gidawat ang tambag nga gihatag sa mga ansiano didto maylabot sa pag-adto sa templo ug pagsunod sa paagi sa Kasugoan aron makita sa tanan nga siya dili apostata kon bahin sa Kasugoan ni Moises. Sanglit ang pagbuhat niya niana morag misangpot sa kadaotan tungod sa pagkaukay sa usa ka magubotong panon batok kaniya, ang iya bang pagpasakop niadtong mga ansianoha maoy sayop? Dili gayod, sumala sa madayag gikan sa atong mabasa sa Buhat 23:11: “Sa sunod nga gabii ang Ginoo mibarog sa iyang tupad ug miingon: ‘Magmalig-on! Kay ingon nga ikaw nakahatag ug bug-os nga pamatuod sa mga butang mahitungod kanako sa Jerusalem, kinahanglan usab nga ikaw magpamatuod sa Roma.’”

24. Unsang dugang mga bahin sa pagpasakop ang pagahisgotan sa sunod artikulo?

²⁴ Sa pagkatinuod, ang Kasulatan naghatag kanatog lig-ong mga katarongan sa atong pagpasakop ug talagsaong mga panig-ingnan bahin niadtong nagpadayag sa maong pagpasakop. Sa sunod artikulo, among hisgotan ang lainlaing natad nga niana kita makapasakop kang Jehova nga Diyos, ang mga tabang sa atong pagpasakop, ug ang mga ganti nga mosangpot.

Unsaon Nimo Pagtubag?

◻ Unsang dagway sa independensiya ang dili maayo?

◻ Unsa ang lintunganayng hinungdan sa pagdumili sa pagpasakop?

◻ Tungod sa unsang mga katarongan kita obligadong magpasakop kang Jehova?

◻ Unsang maayong mga panig-ingnan ang ginahatag sa Kasulatan bahin sa diyosnong pagpasakop?

[Hulagway sa panid 10]

Si Nimrod, ang unang tapos-lunop nga magmamando nga misukol sa diyosnong pagpasakop

[Hulagway sa panid 13]

Si Noe, walay-ikasaway nga panig-ingnan sa diyosnong pagpasakop.​—Genesis 6:14, 22