Kon Unsay Gikinahanglan Gikan Kanato sa Diyosnong Pagpasakop

“Busa, magpasakop kamo sa Diyos.”​—SANTIAGO 4:7.

1. Unsay ikasulti bahin sa matang sa Diyos nga atong gisimba?

KAHIBULONGAN gayong Diyos si Jehova! Walay-tumbas, walay-kasama, walay-ikatanding, talagsaon sa labihan ka daghang paagi! Siya ang Labing Hataas, ang Soberano sa Uniberso nga anaa kaniya ang tanang tinuod nga pagbulot-an. Siya maoy gikan sa walay kataposan hangtod sa walay kataposan ug mahimayaon kaayo nga walay tawo ang makakita kaniya ug unya mabuhi pa. (Exodo 33:20; Roma 16:26) Siya walay kinutoban sa gahom ug kinaadman, bug-os hingpit sa hustisya, ug ang personipikasyon mismo sa gugma. Siya ang atong Maglalalang, atong Maghuhukom, atong Maghahatag-Balaod, ug atong Hari. Ang matag maayong gasa ug matag hingpit nga hatag nagagikan kaniya.​—Salmo 100:3; Isaias 33:22; Santiago 1:17.

2. Unsang mga butang ang nalangkit sa diyosnong pagpasakop?

² Tungod niining tanang kamatuoran, walay duhaduha mahitungod sa atong obligasyon nga magpasakop kaniya. Apan unsay nalangkit niini alang kanato? Ubay-ubayng mga butang. Sanglit sa personal dili kita makakita kang Jehova nga Diyos, ang pagpasakop kaniya naglangkit sa pagpamati sa tingog sa natudloang tanlag, pakigtambayayong sa yutan-ong organisasyon sa Diyos, pag-ila sa sekular nga mga awtoridad, ug pagtahod sa prinsipyo sa pagkaulo sulod sa pamilya.

Pagbatog Usa ka Maayong Tanlag

3. Sa paghupot ug maayong tanlag, kinahanglang magmasinugtanon kita sa unsang matang sa mga pagdili?

³ Sa pagbatog maayong tanlag, kinahanglang magmasinugtanon kita sa dili-ikapatuman​—nga mao, sa mga balaod o mga prinsipyo nga dili ikapatuman sa tawo. Pananglitan, ang ikanapulong sugo sa Napulo ka Sugo, nga gitumong batok sa pagkaibog, dili ikapatuman sa tawhanong mga awtoridad. Lain pay ato, kini nagapamatuod sa balaang sinugdanan sa Napulo ka Sugo, kay walay pundok sa mga magbabalaod ang makabuhat ug usa ka balaod nga dili ikapatuman pinaagi sa mga silot kon pagalapason. Pinaagi sa maong balaod, gihatag ni Jehova nga Diyos sa matag Israelinhon ang responsabilidad nga mahimong iyang kaugalingong polis​—kon buot niyang mabatonan ang maayong tanlag. (Exodo 20:17) Sa susama, apil sa mga buhat sa unod nga magpagawas sa usa gikan sa pagpanunod sa Gingharian sa Diyos mao ang “pangabugho” ug “mga kasina”​—mga reaksiyon nga ang mga silot niana dili ikapatuman sa tawhanong mga maghuhukom. (Galacia 5:19-21) Apan aron makabatog maayong tanlag, kinahanglang atong likayan kini sila.

4. Sa paghupot ug maayong tanlag, unsang mga prinsipyo sa Bibliya ang atong pagasundon sa kinabuhi?

⁴ Oo, kinahanglang sundon nato ang mga prinsipyo sa Bibliya diha sa atong kinabuhi. Ang maong mga prinsipyo masumada diha sa duha ka sugo nga gipasiugda ni Jesu-Kristo ingong tubag sa pangutana kon hain ang kinalabwang sugo sa Moisesnong kasugoan. “Higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong hunahuna. . . . Higugmaon mo ang imong silingan sama sa imong kaugalingon.” (Mateo 22:36-40) Nagailustrar sa kon unsay nalangkit sa ikaduha niining mga sugoa mao ang mga pulong ni Jesus nga nahitala diha sa Mateo 7:12: “Busa, ang tanang butang nga buot ninyong buhaton sa mga tawo nganha kaninyo, kinahanglan usab nga inyong pagabuhaton ngadto kanila; kini, sa pagkamatuod, mao ang kahulogan sa Kasugoan ug sa mga Manalagna.”

5. Sa unsang paagi atong mahuptan ang maayong relasyon uban kang Jehova nga Diyos?

⁵ Kinahanglang buhaton nato kon unsay atong nahibaloan nga matarong ug dili buhaton kon unsay atong nahibaloan nga daotan, bisan kon himatikdan kana sa uban o wala. Kini matuod bisan pag tingali kita makalingkawas ra sa dili pagbuhat kon unsay angay natong pagabuhaton o pagbuhat kon unsay dili angay natong pagabuhaton. Nagkahulogan kini sa pagbatog maayong relasyon uban sa atong langitnong Amahan, nga ibutang sa hunahuna ang pasidaan nga gipahayag ni apostol Pablo sa Hebreohanon 4:13: “Walay linalang nga dili dayag sa iyang panan-aw, apan ang tanang butang maoy hubo ug dayag nga binuksan sa panan-aw nga kaniya kita may tulubagon.” Ang pagpadayon sa pagbuhat sa matarong mobulig nato sa pagpakigbugno batok sa mga panglingla sa Yawa, sa pagsukol sa mga pagpit-os sa kalibotan, ug sa pagbugno sa pinanunod nga hilig padulong sa kahakog.​—Itandi ang Efeso 6:11.

Pagpasakop sa Organisasyon sa Diyos

6. Unsang mga agianan sa komunikasyon ang gigamit ni Jehova sa una-Kristohanong mga panahon?

⁶ Wala kita hatagi ni Jehova ug katungod sa paghukom nga tinagsa kon unsaon nato pagpadapat ang mga prinsipyo sa Bibliya diha sa atong mga kinabuhi. Sukad sa sinugdanan sa kasaysayan sa tawo, ang Diyos nagagamit ug mga tawo ingong mga agianan sa komunikasyon. Sa ingon, si Adan mao ang tigpamaba sa Diyos kang Eva. Ang sugo bahin sa gidiling bunga gihatag kang Adan sa wala pa malalang si Eva, busa si Adan mao gayod ang nagpahibalo kang Eva kon unsa ang kabubut-on sa Diyos alang kaniya. (Genesis 2:16-23) Si Noe mao ang propeta sa Diyos ngadto sa iyang pamilya ug sa wala-pay-lunop nga kalibotan. (Genesis 6:13; 2 Pedro 2:5) Si Abraham mao ang tigpamaba sa Diyos ngadto sa iyang pamilya. (Genesis 18:19) Ang propeta sa Diyos ug agianan sa komunikasyon ngadto sa nasod sa Israel mao si Moises. (Exodo 3:15, 16; 19:3, 7) Human kaniya, hangtod kang Juan Bawtista, daghang propeta, saserdote, ug hari ang gigamit sa Diyos sa pagpahibalo sa iyang kabubut-on ngadto sa iyang katawhan.

7, 8. (a) Sa pag-abot sa Mesiyas, kinsa ang gigamit ingong mga tigpamaba sa Diyos? (b) Ang diyosnong pagpasakop nanginahanglan sa unsa gikan sa mga Saksi ni Jehova karong adlawa?

⁷ Sa pag-abot sa Mesiyas, si Jesu-Kristo, ang Diyos migamit niya ug sa iyang suod nga mga apostoles ug mga tinun-an sa pag-alagad nga Iyang mga tigpamaba. Sa ulahi, ang dinihogang matinumanong mga sumusunod ni Jesu-Kristo mao ang mag-alagad nga “matinumanon ug maalamong ulipon” sa pagpahibalo sa katawhan ni Jehova kon unsaon pagpadapat ang mga prinsipyo sa Bibliya diha sa ilang mga kinabuhi. Ang diyosnong pagpasakop nagkahulogan sa pag-ila sa instrumento nga gigamit ni Jehova nga Diyos.​—Mateo 24:45-47; Efeso 4:11-14.

⁸ Gipakita sa mga kamatuoran nga karong adlawa “ang matinumanon ug maalamong ulipon” nakig-uban sa mga Saksi ni Jehova ug gihawasan sa Nagamandong Lawas sa maong mga Saksi. Ang maong lawas, sa baylo, nagatudlog mga magtatan-aw diha sa lainlaing mga kapasidad​—sama sa mga ansiano ug nagapanawng mga hawas—​sa pagdumala sa buluhaton sa lokal nga paagi. Ang diyosnong pagpasakop nanginahanglan nga ang matag nagpahinungod nga Saksi magpasakop sa maong mga magtatan-aw nga nahiuyon sa Hebreohanon 13:17: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag sama nga sila magahatag ug husay; aron sila makabuhat niini uban sa kalipay ug dili uban sa panghupaw, kay kana makadaot kaninyo.”

Pagdawat ug Disiplina

9. Ang diyosnong pagpasakop kasagaran nagalangkit sa unsa?

⁹ Ang diyosnong pagpasakop subsob maoy butang bahin sa pagdawat ug disiplina gikan niadtong nagaalagad nga mga magtatan-aw. Kon dili nato kanunay hatagan ang atong kaugalingon sa gikinahanglang disiplina, tingali kinahanglan nga kita tambagan ug disiplinahon niadtong may kasinatian ug awtoridad sa pagbuhat niana, sama sa mga ansiano sa atong kongregasyon. Ang pagdawat sa maong disiplina maoy dalan nga maalamon.​—Proverbio 12:15; 19:20.

10. Unsa ang obligasyon niadtong nagahatag sa disiplina?

¹⁰ Dayag, ang mga ansiano nga nagahatag sa disiplina kinahanglang sa ilang kaugalingon mga panig-ingnan sa diyosnong pagpasakop. Sa unsang paagi? Sumala sa Galacia 6:1, dili lamang sila kinahanglan nga magbaton ug maayong paagi sa pagpanambag kondili kinahanglan nga sila sulundan: “Mga igsoon, bisan pag ang usa ka tawo mahiligas sa dili pa siya mahibalo niana, kamong adunay mga katakos sa espirituhanong paagi maninguha sa pagpasibo sa maong tawo diha sa espiritu sa kalumo, samtang ang matag usa kaninyo magabantay sa iyang kaugalingon, kay basin unya kamo usab matental.” Sa laing mga pulong, ang tambag sa ansiano kinahanglang mahiuyon sa iyang panig-ingnan. Kana nahiuyon sa tambag nga gihatag sa 2 Timoteo 2:24, 25 ug sa Tito 1:9. Oo, kadtong nagabadlong o nagapanul-id kinahanglang magbantay kaayo nga dili gayod mag-inisog. Kinahanglang sila kanunayng malumo, maluluton, ug bisan pa niana malig-on sa pagtuboy sa mga prinsipyo sa Pulong sa Diyos. Kinahanglang sila maoy mga tigpatalinghog nga dili madapigon, nga makahupay niadtong nagabudlay ug nabug-atan.​—Itandi ang Mateo 11:28-30.

Pagpasakop sa Labawng mga Awtoridad

11. Unsay gikinahanglan gikan sa mga Kristohanon diha sa ilang relasyon uban sa sekular nga mga awtoridad?

¹¹ Ang diyosnong pagpasakop nanginahanglan usab nga atong sugton ang sekular nga mga awtoridad. Gitambagan kita sa Roma 13:1: “Magpasakop ang matag kalag sa labawng mga awtoridad, kay walay awtoridad gawas nga pinaagi sa Diyos; ang naglungtad nga mga awtoridad nahiluna diha sa ilang may-kinutobang mga kahimtang pinaagi sa Diyos.” Kining mga pulonga nanginahanglan nga kita, apil sa ubang butang, magsugot sa mga balaod sa trapiko ug magbinuotan sa pagbayad sa mga buhis ug mga alkabala, sama sa gipahayag ni apostol Pablo sa Roma 13:7.

12. Sa unsang diwa ang atong pagpasakop kang Cesar maoy may kinutoban?

¹² Hinuon, tin-aw nga kanang tanang pagpasakop kang Cesar kinahanglang may kinutoban. Kinahanglang ibutang nato kanunay sa hunahuna ang prinsipyo nga giingon ni Jesu-Kristo, sumala sa nahitala sa Mateo 22:21: “Busa, ibayad balik kang Cesar ang mga butang ni Cesar, ang mga butang sa Diyos ngadto sa Diyos.” Usa ka potnot sa Roma 13:1 diha sa Oxford NIV [New International Version] Scofield Study Bible nag-ingon: “Kini wala magpasabot nga siya magasugot sa mga regulasyon nga imoral o supak-Kristohanon. Nianang mga kasoha maoy iyang katungdanan ang pagsugot sa Diyos inay sa mga tawo (Buh. 5:29; itandi ang Dan. 3:16-18; 6:10 paunahan).”

Diyosnong Pagpasakop Sulod sa Pamilya

13. Ang diyosnong pagpasakop sulod sa pamilya nanginahanglan sa unsa gikan sa mga sakop niini?

¹³ Sulod sa pamilya, ang bana ug amahan magaalagad nga ulo. Nanginahanglan kini nga ang mga asawa magsunod sa tambag nga gihatag sa Efeso 5:22, 23: “Ang mga asawa magpasakop sa ilang mga bana ingon nga ngadto sa Ginoo, kay ang bana mao ang ulo sa iyang asawa maingon nga si Kristo usab mao ang ulo sa kongregasyon.”a Mahitungod sa mga anak, dili sila ang magbuhat sa ilang kaugalingong mga lagda apan utangan sa amahan ug inahan sa diyosnong pagpasakop, ingon sa gisaysay ni Pablo sa Efeso 6:1-3: “Mga anak, magmasinugtanon kamo sa inyong mga ginikanan nga nahiusa sa Ginoo, kay kini matarong: ‘Pasidunggi ninyo ang inyong amahan ug inyong inahan’; nga mao ang unang sugo nga may saad: ‘Aron magmaayo kamo ug mabuhig taas nga panahon sa yuta.’”

14. Ang diyosnong pagpasakop nanginahanglan sa unsa gikan sa mga ulo sa pamilya?

¹⁴ Hinuon, mas sayon nga ang mga asawa ug mga anak maghatag nianang diyosnong pagpasakop sa dihang ang mga bana ug mga amahan mismo magpasundayag ug diyosnong pagpasakop. Ginabuhat nila kini pinaagi sa pagtuman sa ilang pagkaulo nga nahiuyon sa mga prinsipyo sa Bibliya, sama nianang hikaplagan sa Efeso 5:28, 29 ug 6:4: “Niining paagiha ang mga bana angay maghigugma sa ilang mga asawa sama sa ilang kaugalingong mga lawas. Siya nga nahigugma sa iyang asawa nahigugma sa iyang kaugalingon, kay walay tawo ang sukad nagdumot sa iyang kaugalingong unod; kondili siya nagapakaon ug nagaamoma niana, sama sa ginabuhat usab ni Kristo sa kongregasyon.” “Mga amahan, ayaw ninyo pagpasuk-a ang inyong mga anak, apan ipadayon ninyo ang pagmatuto kanila sa disiplina ug pagdumala sa kaisipan gikan kang Jehova.”

Mga Hinabang sa Pagpasundayag ug Diyosnong Pagpasakop

15. Unsang bunga sa espiritu ang motabang kanato sa pagpasundayag ug diyosnong pagpasakop?

¹⁵ Unsay motabang nato sa pagpasundayag ug diyosnong pagpasakop niining lainlaing mga natad? Nahauna, anaa ang dili-hakog nga gugma​—gugma kang Jehova nga Diyos ug niadtong iyang gibutang ibabaw kanato. Kita gisuginlan sa 1 Juan 5:3: “Kini mao ang kahulogan sa paghigugma sa Diyos, nga atong pagabantayan ang iyang mga sugo; ug ngani ang iyang mga sugo dili bug-at.” Si Jesus mipahayag sa samang punto sa Juan 14:15: “Kon kamo nahigugma kanako, inyong pagabantayan ang akong mga sugo.” Sa pagkatinuod, ang gugma​—ang kinalabwang bunga sa espiritu sa Diyos​—motabang kanato sa pagpabili sa tanan nga gibuhat ni Jehova alang kanato ug sa ingon motabang kanato sa pagpakitag diyosnong pagpasakop.​—Galacia 5:22.

16. Unsay ikatabang sa diyosnong kahadlok sa pagpakitag diyosnong pagpasakop?

¹⁶ Ikaduha, anaa ang diyosnong kahadlok. Ang kahadlok nga makapasuko kang Jehova nga Diyos motabang kanato tungod kay kini “nagkahulogan sa pagdumot sa daotan.” (Proverbio 8:13) Sa walay duhaduha, ang kahadlok nga makapasuko kang Jehova mopugong nato sa pagkompromiso tungod sa kahadlok sa tawo. Motabang usab kini kanato sa pagsugot sa mga instruksiyon sa Diyos walay pagsapayan kon unsang mga kalisdanan ang kinahanglang buntogon. Dugang pa, kini mopugong nato sa pagpadaog sa mga tentasyon o mga kiling sa pagbuhat ug daotan. Ang Kasulatan nagapakita nga ang kahadlok kang Jehova maoy nakapaarang kang Abraham sa pagsulay sa paghalad sa iyang hinigugmang anak si Isaac ingong usa ka sakripisyo, ug mao ang kahadlok nga makapasuko kang Jehova ang nakapaarang kang Jose sa pagtutol nga malamposon sa imoral nga mga panghaylo sa asawa ni Potipar.​—Genesis 22:12; 39:9.

17. Unsang papel ang ginadula sa pagtuo diha sa atong pagpakitag diyosnong pagpasakop?

¹⁷ Ang ikatulong hinabang mao ang pagtuo kang Jehova nga Diyos. Ang pagtuo mopaarang nato sa pagsunod sa tambag nga gihatag sa Proverbio 3:5, 6: “Sumalig kang Jehova uban sa bug-os mong kasingkasing ug ayaw pagsandig sa imong kaugalingong pagsabot. Sa tanan nimong mga dalan matikdi siya, ug siya mismo motul-id sa imong mga alagianan.” Ang pagtuo motabang ilabina kanato sa dihang kita morag nagaantos nga dili makataronganon o mobating gipihig tungod sa atong rasa o nasyonalidad o tungod sa panagbingkil maylabot sa personalidad. Ang pipila tingali mobati usab nga sa kasayop gisayloan sa dihang wala irekomendar sa pag-alagad ingong ansiano o ministeryal nga alagad. Kon kita may pagtuo, kita maghulat kang Jehova sa pagtul-id sa mga butang sa iyang nahaigong panahon. Kasamtangan kinahanglan tingali nga atong ugmaron ang mapailobong pag-antos.​—Lamentaciones 3:26.

18. Unsa ang ikaupat nga tabang sa atong pagpasundayag ug diyosnong pagpasakop?

¹⁸ Ang ikaupat nga tabang mao ang pagpaubos. Ang usa ka tawong mapainubsanon dili malisdan sa pagpasundayag ug diyosnong pagpasakop tungod kay ‘sa pagpaubos sa hunahuna, siya nagaisip nga ang uban labaw kay kaniya.’ Ang usa ka tawong mapainubsanon andam sa paggawi ingong “usa nga ubos.” (Filipos 2:2-4; Lucas 9:48) Apan ang tawong garboso mayugot sa pagpasakop ug maglagot niana. Gikaingon nga ang maong tawo mopalabi pang madaot sa pagdayeg inay matabangan sa paglikay sa kadaot sa pagsaway.

19. Unsang maayong panig-ingnan sa pagpaubos ang gihatag sa kanhi presidente sa Watch Tower Society?

¹⁹ Usa ka maayong panig-ingnan sa pagpaubos ug diyosnong pagpasakop kaniadto gihatag ni Joseph Rutherford, ang ikaduhang presidente sa Watch Tower Bible and Tract Society. Sa dihang gidili ni Hitler ang buluhaton sa mga Saksi ni Jehova sa Alemanya, ang mga igsoon didto nagsulat kaniya nga nangutana kaniya kon unsay pagabuhaton nila tungod kay gidili man ang ilang mga tigom ug buluhatong pagwali. Gisugilon niya kini ngadto sa pamilyang Bethel ug prangkang gidawat nga wala siya mahibalo kon unsay isulti sa mga igsoong Aleman, ilabina tungod sa grabeng mga silot nga nalangkit. Siya miingon nga kon may usang nahibalo kon unsay isulti kanila, siya malipay nga mamati niana. Pagkamapaubsanong espiritu!b

Mga Kaayohan Gikan sa Pagpasundayag ug Diyosnong Pagpasakop

20. Unsang mga panalangin ang mosangpot sa pagpasundayag ug diyosnong pagpasakop?

²⁰ Mahimong ikasukna, Unsa ang mga kaayohan sa pagpasundayag ug diyosnong pagpasakop? Sa pagkatinuod, daghan. Makalingkawas kita sa mga kabalaka ug mga kapakyasan nga nasinati niadtong nagalihok nga independente. Matagamtam nato ang maayong relasyon uban kang Jehova nga Diyos. Nabatonan nato ang labing maayong pakig-uban sa atong Kristohanong mga igsoon. Dugang pa, pinaagi sa atong paggawi nga uyon sa balaod, malikayan nato ang dili-kinahanglanong pakigbingkil sa sekular nga mga awtoridad. Mapahimuslan usab nato ang malipayong pamilyahanong kinabuhi ingong mga bana ug mga asawa, ingong mga ginikanan ug mga anak. Dugang pa, pinaagi sa padayong paghupot ug diyosnong pagpasakop, kita magalihok nga nahiuyon sa tambag nga gihatag sa Proverbio 27:11: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako.”

[Mga footnote]

Mga Pangutana Ingong Pagsubli

◻ Kinsang mga tawhana ang gigamit sa Diyos ingong mga agianan sa komunikasyon, ug unsay obligasyon sa iyang mga alagad ngadto kanila?

◻ Sa unsang lainlaing mga relasyon mapadapat ang diyosnong pagpasakop?

◻ Unsang mga hiyas ang motabang kanato sa pagpakitag diyosnong pagpasakop?

◻ Ang diyosnong pagpasakop mosangpot sa unsang mga panalangin?

[Hulagway sa panid 16]

Ang Diyos migamit sa organisasyon sa templo sa Jerusalem sa pagpahibalo sa iyang kabubut-on ngadto sa iyang katawhan

[Mga hulagway sa panid 18]

Mga natad diin kita makapasundayag ug diyosnong pagpasakop