DEDAN

1. Usa ka Cusihanon diha sa linya ni Raama. (Gen 10:7; 1Cr 1:9) Ang iyang kaliwat mopatim-awng nanimuyo sa usa ka bahin sa Arabia.

2. Usa ka kaliwat ni Abraham pinaagi kang Joksan. (Gen 25:3; 1Cr 1:32) Ang mga Dedanhon nga naggikan kang Joksan mopatim-awng nanimuyo sa H ug sa HS sa Yutang Saad sa samang dapit diin gipadala ni Abraham ang tanan niyang mga anak kang Ketura.​—Gen 25:6.

Sanglit ang duha ka banay sa mga Dedanhon (kadtong kang Raama ug kang Joksan) dayag nga namuyo sa mga bahin sa Arabia, mitungha ang pangutana kon kinsa nga Dedan ang gipasabot sa dihang kining ngalana makaplagan diha sa ulahing mga sinulat sa Bibliya. Hinunoa, ang paglangkit usahay kang Dedan ngadto sa ubang Semitikanhong mga katawhan sama sa Edom, Tema, ug Buz nagpaila sa Dedan nga naggikan kang Joksan. Pananglitan, ang Dedan gitala nga anaa sa usa ka tumoy sa Edom, kansang yuta hapit nang laglagon. (Eze 25:13) Ang Dedan, diha sa “desyertong kapatagan,” giingnan usab nga mokalagiw gikan sa mga manunulong. Ang nagapanawng panon sa mga Dedanhon kinahanglang mopuyo sa kakahoyan, samtang ang Tema, nga latas sa iyang teritoryo sila mokalagiw, gisugo sa pagtaganag makaon ug mainom alang sa mga kagiw. (Isa 21:11-15; Jer 49:8) Sama sa Edom, ang Dedan sa kataposan mapugos usab sa pagtilaw sa kopa sa bino sa kasuko ni Jehova.​—Jer 25:​15, 21, 23.

Ang mga eskolar naglangkit sa Dedan sa tubigan nga dapit sa el-Ula, mga 120 km (75 mi) sa HK sa Taima.

Ang ubang mga paghisgot sa Dedan wala magpaila kon usa ba ka Hamitikanhon o Semitikanhong katawhan ang gipasabot. Pananglitan, ang Dedan gihisgotan sa Ezequiel 27:​15, 20 ingong usa ka magpapatigayon sa Tiro. Ang Dedan may mahakogon usab nga interes sa gilaraw nga pagpangagaw ni Gog sa Magog batok sa katawhan sa Diyos.​—Eze 38:13.