BILDO

Usa ka kombinasyon sa linaing matang sa balas (silica) nga may diyutayng sagol sa ubang mga elemento sama sa boron, phosphorus, ug tingga. Kini nga mga sangkap tingob nga tunawon sa temperatura nga mga 1650°C. (3000°F.). Sa dihang mobugnaw na, ang bag-ong naporma nga bildo dili-sihag, hamis, gahi kaayo, ug medyo daling mabuak. Ang kainit sa bolkan makapatungha ug usa ka dagtomon nga matang sa bildo nga gitawag ug obsidian, ug sa dihang ang balas maigo sa kilat, ang balas usahay matunaw ug mahimong taas, yagpis nga mga tubo sa bildo nga nailhang mga fulgurite.

Sa Ehipto adunay nakaplagang mga lobitos nga bildo nga gituohan sa mga arkeologo nga gigama mga 4,000 ka tuig na ang milabay, sa mga panahon sa pagkatawo ni Abraham. Si Job, nga nabuhi niadtong ika-17 nga siglo sa wala pa ang Komong Panahon, naghisgot sa pagkabililhon sa bildo kauban sa bulawan sa dihang siya miingon: “Ang bulawan ug bildo dili ikatandi [sa kaalam].”​—Job 28:17.

Si apostol Juan, sa dihang naghubit sa iyang mga panan-awon, naghisgot sa “tin-aw nga bildo” (Pin 21:​18, 21); ug usab sa “usa ka dagat nga bildo nga sama ug kristal.”​—Pin 4:6.