HARIM

[Gikatugyan; Gidili].

1. Usa ka Aaronikong saserdote nga gipili pinaagig ripa aron mangulo sa ika-3 sa 24 ka dibisyon sa mga saserdote nga giorganisar ni David. (1Cr 24:​1, 3, 7, 8) “Ang mga anak [o mga kaliwat] ni Harim” gihisgotan nga lakip sa mga saserdote human sa pagkadestiyero: 1,017 ang namalik gikan sa Babilonya niadtong 537 W.K.P. (Esd 2:​1, 2, 36, 39; Neh 7:42) Sa misunod nga kaliwatan, si Adna mao ang pangulo niini nga balay sa amahan. (Neh 12:​12, 15) Lima “sa mga anak ni Harim” nangasawag langyawng mga asawa apan nagpapahawa kanila agig sanong sa tambag ni Esdras sa pagbuhat niana. (Esd 10:​10, 11, 21, 44) Usa ka hawas sa banay (o lagmit usa kanila nga may samang ngalan) ang mipaluyo sa pakigsaad sa pagkamatinumanon human moabot si Nehemias niadtong 455 W.K.P.​—Neh 9:38; 10:​1, 5, 8.

2. Ang nagpundar sa usa ka dili-saserdotehanong banay, nga ang 320 kanila namalik sa Jerusalem gikan sa Babilonya uban kang Zorobabel. (Esd 2:​1, 2, 32; Neh 7:35) Sama sa mga membro sa banay sa mga saserdote nga may samang ngalan (Num. 1), walo sa kaliwat niini nga Harim nangasawa usab ug langyawng mga asawa ug nagpapahawa kanila. (Esd 10:​25, 31, 32, 44) Ang ilang mga hawas usab nagpamatuod sa “kasaligang kontrata” nga gihimo sa panahon sa pagkagobernador ni Nehemias. (Neh 9:38; 10:​1, 14, 27) Usa ka “anak nga lalaki” ni Harim, si Malkias, mitabang sa pag-ayo sa paril sa Jerusalem.​—Neh 3:11.