NUWES, KAHOYNG

[Heb., ʼeghohzʹ].

Ang dalagang Sulamita diha sa Awit ni Solomon (6:11) naghisgot nga siya milugsong “ngadto sa tanaman sa mga kahoyng nuwes.” Ang mga kahoyng nuwes nga gihisgotan dinhi tingali mao ang mga kahoyng walnut (Juglans regia). Kini nga kahoy maoy lumad sa habagatan-sidlakang Uropa ug sa kasadpang Asia ug sa pagkakaron gitanom didto sa Galilea ug sa mga bakilid sa Lebanon ug sa Bukid sa Hermon. Ang Hudiyong historyador nga si Josephus naghisgot nga kini daghan kaayo diha sa dapit sa Dagat sa Galilea niadtong unang siglo K.P. (The Jewish War, III, 516, 517 [x, 8]) Ang walnut maoy usa ka matahom nga kahoy, nga motubo hangtod sa gitas-ong 9 m (30 p), nga may humot nga mga dahon nga maayong kasilongan. Kini nga kahoy pino ug grano ug gipabilhan pag-ayo sa mga tighimog kabinet tungod sa kaanindot niini. Ang tipaka sa bunga niini adunay asidong tannin ug kon pabukalan, magpatunghag tina nga lubos-kape ang bulok. Ang liso sa nuwes gipabilhan pag-ayo tungod sa kalami niini ug kini ligison aron mopatunghag lana nga halos susamag kalidad sa lana sa olibo.