ABDIAS

[Alagad ni Jehova].

1. Usa ka pangulo sa banay sa tribo ni Isacar; anak nga lalaki ni Izrahias ug kaliwat ni Tola.​—1Cr 7:1-3.

2. Usa ka Zabulonhon kansang anak nga lalaki maoy usa ka prinsipe niana nga tribo sa panahon sa pagmando ni David.​—1Cr 27:​19, 22.

3. Usa ka gamhanang manggugubat nga Gadhanon kinsa mitabok sa Jordan bisag kini nagbaha ug mipaluyo kang David sa dihang siya nagkinabuhi ingong kagiw gumikan sa kapungot ni Saul.​—1Cr 12:​8, 9, 14, 15.

4. Ang nagdumala sa panimalay ni Haring Ahab. Bisan tuod si Haring Ahab ug Jezebel nagbuhat sa pagkadaotan, si Abdias mahinadlokon kaayo kang Jehova, nga nagtago sa 100 ka manalagna ni Jehova nga “tagkalim-an didto sa usa ka langob” sa dihang si Jezebel nagpapatay kanilang tanan. Sa panahon sa hulaw nga gipahinabo sa Diyos nga gitagna ni Elias, gibahin ni Abdias ug sa iyang agalong si Ahab ang usa ka teritoryo, ug ang matag usa kanila nangita ug balili aron ipakaon sa kahayopan sa dihang nakigkita si Elias kang Abdias. Si Elias wala na makit-i ni Ahab panahon sa hulaw, usa ka yugto nga mga tulo ka tuig. Sa dihang gisultihan nga pahibaloon si Ahab nga nahibalik na si Elias, si Abdias, tungod sa dakong kahadlok, nagpanuko sa pag-adto hangtod nga gipasaligan siya nga dili mobiya ang manalagna, kay tinong patyon ni Ahab ang iyang alagad kon mapamatud-ang bakak kini nga taho.​—1Ha 18:1-16.

5. Usa ka prinsipe nga gipadala ni Jehosapat aron sa pagtudlo sa balaod ni Jehova diha sa mga siyudad sa Juda.​—2Cr 17:​7, 9.

6. Usa ka layong kaliwat ni Saul ug Jonatan sa tribo ni Benjamin.​—1Cr 8:33-38; 9:44.

7. Usa ka Merarihanong Levihanon nga usa sa mga magtatan-aw sa pagpang-ayo sa templo nga gisugo ni Haring Josias nga buhaton.​—2Cr 34:​8, 12.

8. Usa ka manalagna ni Jehova ug magsusulat sa ikaupat nga basahon sa gitawag nga gagmayng mga basahon sa tagna. (Abd 1) Walay nahibaloan bahin sa pagkatawo niini nga manalagna sa ikapitong siglo W.K.P.​—Tan-awa ang ABDIAS, BASAHON NI.

9. Usa ka Levihanon nga mipauli gikan sa Babilonya ug mipuyo sa Jerusalem. (1Cr 9:​2, 3, 14, 16) Siya dayag nga gitawag ug Abda sa Nehemias 11:17. Lagmit mao ra ang Num. 13.

10. Usa ka kaliwat ni David human sa yugto sa pagkadestiyero.​—1Cr 3:​5, 9, 10, 21.

11. Pangulo sa balay sa amahan ni Joab nga nangulo sa 218 ka lalaki niini nga banay balik sa Jerusalem kauban ni Esdras niadtong 468 W.K.P.; anak nga lalaki ni Jehiel.​—Esd 8:​1, 9.

12. Usa sa mga saserdote (o iyang kaliwat) kinsa miuyon sa pakigsaad sa pagkamatinumanon nga gihimo sa namalik nga mga destiyero ubos sa pagkagobernador ni Nehemias.​—Neh 9:38; 10:​1, 5, 8.

13. Usa ka Levihanong magbalantay-sa-ganghaan sa mga adlaw ni Nehemias ug Esdras. (Neh 12:​25, 26) Lagmit mao ra ang Num. 9.