FILEMON

[Mahigugmaon].

Usa ka Kristohanon nga tag-iyag ulipon nga nakig-uban sa kongregasyon sa Colosas. Ang iyang balay nga nahimutang niini nga siyudad sa habagatan-kasadpan sa Asia Minor nagsilbing usa ka tigomanan sa kongregasyon didto. Si Filemon nahimong tuboran sa kahayahay sa mga isigka-Kristohanon ug usa ka panig-ingnan sa pagtuo ug gugma. Giisip siya ni apostol Pablo nga usa ka hinigugmang isigkamagbubuhat. (Flm 1, 2, 5-7; itandi ang Col 4:9 sa Flm 10-12.) Ang tinguha ni Pablo nga moestar uban kang Filemon nagpakita gayod nga maabiabihon kining tawhana.​—Flm 22; itandi ang Buh 16:​14, 15.

Si Apia ug Arquipo lagmit maoy mga membro sa panimalay ni Filemon, sanglit gihisgotan sila diha sa personal nga sulat ni Pablo ngadto kang Filemon. Si Apia tingali mao ang asawa ni Filemon, ug si Arquipo tingali mao ang iyang anak nga lalaki.​—Flm 2.

Mopatim-aw nga si Filemon nahimong Kristohanon pinaagi sa mga paningkamot ni Pablo. (Flm 19) Apan, sanglit si Pablo wala magwali sa Colosas mismo (Col 2:1), si Filemon tingali nakakat-on sa Kristiyanidad ingong resulta sa duha ka tuig nga kalihokan sa apostol didto sa Efeso, sa dihang “ang tanang nagpuyo sa distrito sa Asia [nga naglakip sa Colosas] nakadungog sa pulong sa Ginoo.”​—Buh 19:10.

Sa usa ka panahon sa wala pa madawat ang sulat ni Pablo, gilayasan si Filemon sa iyang ulipong si Onesimo. Kining milayas nga ulipon lagmit nga nangawat ug salapi gikan sa iyang agalon aron iplete sa iyang pagbiyahe paingon sa Roma, diin sa ulahi nahibalag niya si Pablo ug nahimong usa ka Kristohanon.​—Flm 10, 11, 18, 19; tan-awa ang ULIPON.