FILEMON, SULAT KANG

Usa ka sulat nga gisulat mismo ni apostol Pablo ug pangunang gisulat alang kang Filemon. (Flm 1, 2, 19) Lagmit gayod nga kini gisulat human magsugod ang unang pagkabilanggo ni Pablo didto sa Roma (lagmit sa mga 60-61 K.P.), kay ang apostol naglaom nga siya “hatagag kagawasan.”​—Ber 22; tan-awa ang ONESIMO; FILEMON.

Ang katuyoan sa apostol sa pagsulat niini nga sulat maoy aron sa pagdasig kang Filemon nga malulotong dawaton pagbalik ang iyang milayas nga ulipon nga si Onesimo. Inay nga gamiton ang iyang awtoridad ingong apostol sa pagsugo kaniya nga buhaton kana, nangamuyo si Pablo pinasukad sa gugma ug personal nga panaghigala. (Flm 8, 9, 17) Kay nakaila kang Filemon ingong usa ka tawo sa pagtuo ug gugma, si Pablo masaligon nga siya magadawat pagbalik sa iyang kanhing walay pulos apan karon Kristohanon na nga ulipon, nga sama sa iyang himoong pagdawat sa apostol mismo. (Ber 10, 11, 21) Kini ilabinang makaiikag, sanglit si Filemon adunay legal nga katungod sa pagpahamtang ug grabe nga silot kang Onesimo.

Gawas sa pagtagana ug aktuwal nga panig-ingnan nga nag-ilustrar sa katahom sa Kristohanong kalulot, pagpasaylo, ug kaluoy, ang sulat nagsugilon kanato bahin sa unang mga Kristohanon. Sila nagtigom diha sa pribadong mga balay, nagtawag sa usag usa nga “igsoon[g lalaki]” ug “igsoong babaye” (Flm 1, 2, 20), nag-ampo alang sa usag usa (ber 4, 22), ug nadasig tungod sa pagtuo ug gugma nga gipasundayag sa mga isigkamagtutuo (ber 4-7).

[Kahon sa panid 785]

MGA PANGUNANG PUNTO SA FILEMON

Usa ka sulat nga nagdasig nga ang gugma ug kaluoy ipakita ngadto sa milayas nga ulipon nga nahimong Kristohanon

Gisulat niadtong mga 60-61 K.P. samtang si Pablo nabilanggo sa Roma

Komendasyon kang Filemon tungod sa iyang gugma ug pagtuo (ber 1-7)

Si Filemon gitawag ni Pablo ingong usa nga hinigugma ug isigkamagbubuhat

Ang mga taho bahin sa gugma ug pagtuo ni Filemon nagtukmod kang Pablo sa pagpasalamat sa Diyos ug naghatag sa apostol ug tumang kalipay ug kahupayan

Gipadalag balik ni Pablo si Onesimo ingong “labaw pa kay sa usa ka ulipon” (ber 8-25)

Ang nabilanggong si Pablo mihangyo pinasukad sa gugma alang sa milayas nga ulipong si Onesimo, kinsa nahimong Kristohanon tungod sa iyang pagpakig-uban kang Pablo

Tungod kay si Onesimo mapuslanon sa pag-alagad kaniya, gusto siyang hawiran ni Pablo; apan gipadala siyag balik sa apostol sanglit dili siya buot mohimo ug bisan unsa nga walay pagtugot ni Filemon

Giawhag ni Pablo si Filemon nga dawaton si Onesimo ingong usa ka igsoon, nga samag siya ang apostol mismo, ug gipahayag ni Pablo ang iyang pagsalig nga himoon kini ni Filemon nga mas labaw pa gani kay sa iyang gihangyo