Ang Inigsoong Gugma Nagalihok
Mga Pangunang Punto Gikan sa Filemon
SI Jesu-Kristo naghatag sa iyang mga sumusunod ug “bag-ong sugo” nga sila maghigugmaay sa usag usa sama nga siya nahigugma kanila. (Juan 13:34, 35) Tungod niana nga gugma, sila gani magpakamatay alang sa usag usa. Oo, ang inigsoong gugma ingon niana kalig-on ug nagalihok.
Segurado si apostol Pablo nga ang inigsoong gugma magtukmod kang Filemon, usa ka Kristohanon nga nagpasakop sa kongregasyon sa Colosas, usa ka siyudad sa Asia Minor. Ang gugma nag-agda na kang Filemon sa pagpagamit sa iyang balay ingong usa ka Kristohanon tigomanang dapit. Ang ulipon ni Filemon nga si Onesimo milayas, tingali nangawat ug salapi aron magamit sa pag-adto sa Roma, diin siya sa ulahi nahinagbo ni Pablo ug midawat sa Kristiyanidad.
Samtang nabilanggo sa Roma sa mga 60-61 K.P., si Pablo misulat nga sa paninugdan gipahinungod ngadto kang Filemon. Kini naghangyo kang Filemon nga dawaton pagbalik si Onesimo diha sa usa ka espiritu sa inigsoong gugma. Basaha kining sulata, ug makita nimo nga kini maoy usa ka maayong panig-ingnan sa pagbati ug kaugdang—usa nga angayng sundogon sa katawhan ni Jehova.
Komendasyon Alang sa Gugma ug Pagtuo
Nagtumong kang Filemon ug sa uban, gihatag una ni Pablo ang komendasyon. (Bersikulo 1-7) Ang apostol padayong nakadungog mahitungod sa gugma nga nabatonan ni Filemon alang kang Kristo ug sa tanang mga balaan ug mahitungod sa iyang pagtuo. Kini nag-agda kang Pablo sa pagpasalamat kang Jehova ug naghatag kaniya ug dakong kasadya ug kalipay. Kita ba sa tinagsatagsa nagadayeg sa mga isigkamagtutuo kinsa mga sumbanan sa gugma ug pagtuo? Angay natong buhaton kana.
Ang tambag nga gipasukad sa gugma sa kanunay tilinguhaon sa pagpakiglabot uban sa mga isigka-Kristohanon, ingon sa gipakita sa mga pulong ni Pablo. (Bersikulo 8-14) Human sa iyang tukma nga pagsugod, ang apostol miingon nga bisag iyang kamandoan si Filemon “kon unsay angay niyang buhaton,” iyang gipili hinoon nga motambag kaniya. Sa pagbuhat sa unsa? Aw, sa pagdawat pag-usab sa ulipon nga si Onesimo diha sa usa ka maluluton nga paagi! Buot ni Pablo nga magpadayon ang hinungdanon mga serbisyo ni Onesimo apan dili mobuhat niana nga walay pagtugot ni Filemon.
Ang daw dili maayong kaugmaran napamatud-an kanunay nga makaayo, ingon sa sunod nga gipaila ni Pablo. (Bersikulo 15-21) Sa pagkatinuod, maayo ang sangpotanan sa paglayas ni Onesimo. Ngano man? Tungod kay si Filemon makabaton kaniya pag-usab ingong usa ka andam, matinud-anon Kristohanong igsoon, dili ingong pinugos, hayan dili kapiyalang ulipon. Gihangyo ni Pablo si Filemon nga abiabihon pag-usab si Onesimo sama unya sa pag-abiabi kang Pablo. Kon si Onesimo makasala kang Filemon sa bisan unsa nga paagi, ang apostol ang magabayad. Aron mosamot pa ang pag-uyon ni Filemon, gipahinumdoman siya ni Pablo nga siya mismo nakautang sa apostol sa pagkahimong usa ka Kristohanon. Busa, segurado si Pablo nga buhaton ni Filemon ang labaw pa sa iyang gihangyong buhaton. Unsa ka ugdang, mahigugmaong hangyo! Sa pagkatinuod, kini maoy paagi nga kita angayng makiglabot uban sa mga isigka-Kristohanon.
Gitapos ni Pablo ang iyang sulat uban ang usa ka paglaom, mga pangomosta, ug maayong mga panghinaot. (Bersikulo 22-25) Siya naglaom nga pinaagi sa mga pag-ampo sa uban alang kaniya, siya sa dili madugay makagawas gikan sa pagkabilanggo. (Ingon sa gipakita sa ikaduhang sulat ni Pablo ngadto kang Timoteo, kadto nga mga pag-ampo gitubag.) Nagtapos sa iyang sulat, nagpadala si Pablo ug mga pangomosta ug nagpahayag ug panghinaot nga ang dili takos nga kalulot ni Jesu-Kristo maanaa unta sa espiritu nga gipakita ni Filemon ug sa iyang mga isigkamagsisimba kang Jehova.
[Kahon/Hulagway sa panid 23]
Labaw pa sa Usa ka Ulipon: Bahin sa paghibalik sa milayas nga ulipon ni Filemon nga si Onesimo, si Pablo miingon: “Tingali . . . siya nagpahilayo sa usa ka oras, nga ikaw makabaton kaniya pag-usab sa walay kataposan, dili ingon nga usa ka ulipon kondili ingon nga labaw pa sa usa ka ulipon, ingong usa ka hinigugmang igsoon, ilabina alang kanako, apan ilabina gayod alang kanimo diha sa relasyon sa unod ug diha sa Ginoo.” (Filemon 15, 16) Diha sa Romanong empiryo, ang pagkaulipon gipadapat sa empiryal nga kagamhanan, ug giila ni Pablo ang maong “labaw nga mga awtoridad.” (Roma 13:1-7) Wala niya labani ang pag-alsa sa usa ka ulipon apan nagtabang sa maong mga indibiduwal nga makabatog espirituwal nga kagawasan aron magpasakop sa ilang mga agalon, gipadala ug balik ni Pablo si Onesimo ngadto kang Filemon. (Colosas 3:22-24; Tito 2:9, 10) Si Onesimo karon labaw na sa usa ka kalibotanong ulipon, Siya usa na ka hinigugmang isigkamagtutuo kinsa may relatibong pagpasakop ngadto kang Filemon ingong usa ka mas maayong ulipon, usa nga gimandoan sa diyosnong mga prinsipyo ug sa pagpasundayag sa inigsoong gugma.