PISTASYO, LISO SA

[Heb., bot·nahʹ].

Ang bunga sa kahoyng Pistacia vera. Kini nga kahoy nga mangadagdag ang mga dahon sa popanahon mabuhi diha sa uga nga mga dapit ug panagsa rang moabot sa gitas-ong kapin sa 9 m (30 p). Ang gitas-on sa bunga niini maoy 1.5 hangtod sa 2 sm (0.6 hangtod sa 0.8 pul.) ug kini mahimong dagko nga mga pungpong. Ang nipis, apan gahi, pus-aw ug kolor nga bayanan sa hinog nga mga bunga sa pistasyo giputos pinaagig kunoton nga panit. Ang matag bunga adunay usa ka dalag-berde nga liso nga giputos sa nipis ug pulahong panit. Kini nga liso dili kaayo tam-is ug sagad kaonon nga hilaw o sinangag. Usahay ang mga liso pug-on aron makuha ang lana, ug ang ginaling nga liso himoong mga dulse.

Ang mga liso sa pistasyo maoy lakip sa “labing maayong mga produkto sa yuta” sa Canaan nga gidala ingong gasa sa mga anak nga lalaki ni Jacob ngadto sa usa ka magmamando sa Ehipto. (Gen 43:11) Bisan sa modernong mga panahon daghang liso sa pistasyo ang gibaligya gikan sa mga dapit sa Tungang Sidlakan.

Ang siyudad sa Betonim, nga nahimutang sa S sa Jordan sa teritoryo sa Gad, mopatim-awng ginganlan pinasukad sa mga liso sa pistasyo.​—Jos 13:​24, 26.