MONTURA

Usa ka lingkoranan nga ipahimutang sa bukobuko sa usa ka hayop alang sa mosakay niini. Daghang teksto sa Bibliya ang naghisgot sa mga asno nga monturahanan (Gen 22:3; Num 22:21; 2Sa 17:23; 19:26; 1Ha 2:40; 13:​13, 27; 2Ha 4:24), apan walay gihatag nga kahubitan bahin sa mga montura. Sumala sa mga ebidensiya sa karaang mga monyumento, mopatim-aw nga ang unang mga montura alang sa mga kabayo maoy usa lamang ka gamayng piraso sa panapton o hanig nga panit. Ang Hebreohanong berbo nga “montura” sa paninugdan nagkahulogang “higot,” nga nagpakita nga ang mga montura gihigot diha sa mga hayop. Ang usa ka karaang linilok naghulagway sa samag-kahon nga montura nga gihigot diha sa bukobuko sa usay-bugdo nga kamelyo. Walay tinong detalye bahin sa “pangmonturang bukag sa kamelyo nga pangbabaye” nga gihisgotan sa Genesis 31:34. Ang Hebreohanong ekspresyon nga kar hag·ga·malʹ gihubad sa nagkalainlaing paagi ingong “bag diha sa kamelyo” (NE), “lingkoranan diha sa kamelyo” (JB), ug “montura sa kamelyo” (AT).

Ilalom sa Balaod, ang usa nga makahikap sa montura nga gisakyan sa usa nga may inagas mahimong mahugaw, sama sa usa ka tawo nga makahikap sa usa ka butang nga nalingkoran sa usa ka babaye nga may regla.​—Lev 15:​9, 19-23.