HIMBIS

Ang Cebuanong pulong nga “himbis” maoy katumbas sa Hebreohanong pulong nga qas·qeʹseth ug sa Gregong pulong nga lepís.

Ang mga himbis sa hayop maoy lagpad, gahion nga mga palid nga maoy bahin sa panggawas nga tabon sa lawas sa daghang isda ug mga reptilya. Gilatid sa Balaod nga sa seremonyal nga paagi “ang tanan nga adunay mga kapay ug mga himbis diha sa katubigan” maoy hinlo nga pagkaon. Ang mga hayop sa tubig nga wala niini dili pagakan-on; kini “makaluod.” (Lev 11:​9, 10, 12; Deu 14:​9, 10) Busa ang mga himbis (Heb., qas·qas·simʹ, plural sa qas·qeʹseth) maoy usa sa daling makita nga mga ilhanan kon ang isda mahimong kan-on. Bisan tuod adunay upat ka matang sa mga himbis sa isda, ang labing komon mao ang ctenoid nga mga himbis (nga samag-sudlay ang mga kilid) ug cycloid nga mga himbis (nga linginon ang kilid). Kini nahan-ay nga naglut-od, nga nahimong usa ka nipis, gaan, ug malubaylubay nga tabon.

Ang samang Hebreohanong pulong gigamit diha sa Ezequiel 29:​4, diin ang Ehiptohanong Paraon gihubit sa simbolikong paagi ingong sama sa usa ka buaya. Ang tibuok lawas sa usa ka buaya gitabonan sa samag lig-ong mga palid nga sungaysungay nga mitapot sa bagang panit niini. Ang Job 41:15-17 dayag nga nagpunting usab sa mga himbis (AS, NW, MR) sa buaya, nga niining bahina gigamit ang Hebreohanong pulong nga sagad gihubad nga “taming.”​—Tan-awa ang LEVIATAN.

Mga Himbis sa Armadura. Ang usa ka kotamaya lagmit adunay mga himbis (Heb., qas·qas·simʹ, plural sa qas·qeʹseth) nga gitaod diha niana. Kini maoy gagmayng metal nga mga palid nga naglut-od ug nagsilbing malubaylubay nga palid sa armadura.​—1Sa 17:5; tan-awa ang HINAGIBAN, ARMADURA (Kotamaya).

Mga Himbis sa mga Mata ni Pablo. Sa dihang si Pablo naayo sa iyang pagkabuta tungod sa pagpakita ni Jesus kaniya, may natagak gikan sa iyang mga mata nga “maorag mga himbis.” (Buh 9:18) Ang pipila ka eskolar nagtuo nga walay nahulog gikan sa mga mata ni Pablo apan kini maoy mahulagwayong mga pulong lamang nga nagpakitang si Pablo naulian sa iyang panan-aw. Bisan pa niana, ang ubay-ubay nga modernong mga hubad nagpakita nga diha gayoy butang nga nahulog gikan sa mga mata ni Pablo.​—AT, NW, RS, Sd, We.