SIMEIHANON

[Kang (Iya ni) Simei].

Mga kaliwat ni Simei nga anak nga lalaki ni Gerson ug apo ni Levi. (Ex 6:​16, 17) Sa dihang gihimo ang unang pagsenso didto sa kamingawan, mikabat ug 7,500 ang narehistro nga mga Simeihanon ug mga Libnihanon (“ang mga banay sa mga Gersonhon”). (Num 3:20b-22) Ang mga Simeihanon nagkampo uban sa mga Libnihanon sa “luyo sa tabernakulo,” nga mao, dapit sa K. Ingong mga Gersonhon, lakip sa ilang mga buluhaton ingong mga Levihanon mao ang pagdala, pagtukod, ug pag-atiman sa tabernakulo ug sa mga tabon niini, ingon man sa mga kortina sa sawang, sa mga tabil (sa ganghaan sa sawang ug sa tolda), ug sa mga pisi sa tolda.​—Ex 26:​1, 7, 14, 36; 27:​9, 16; Num 3:23-26.

Si Simei may upat ka anak nga lalaki​—si Jahat, Zina, Jeus, ug Beria. Apan sanglit ang ulahing duha walay daghang anak nga mga lalaki, sila nag-usa aron mahimong “usa ka balay sa amahan nga usa ka hut-ong nga nangatungdanan.” Kini gihisgotan sa panahon ni David sa dihang mipatim-aw nga ang natudlong buluhaton sa tabernakulo sa mga Simeihanon gibahin taliwala niining tulo ka banay. (1Cr 23:​6, 7, 10, 11) Sa tagna ni Zacarias linaing gilakip ang banay sa mga Simeihanon taliwala niadtong nagminatay sa hilabihan tungod “sa Usa nga ilang gidughang,” usa ka tagna nga nagtumong kang Jesus.​—Zac 12:10-13; Ju 19:37.