Pangandam!
“Pangandam, kay ang Anak sa tawo moabot sa takna nga wala ninyo hunahunaa.”—LUCAS 12:40.
1. Unsay giingon ni Kristo mahitungod sa panginahanglan sa pagbantay?
“GIAWHAG ni Jesu-Kristo ang iyang mga sumusunod nga magtukaw. Pananglitan, siya miingon: “Busa, magbantay kamo; gitug-anan ko na kamong daan sa tanang mga butang. . . . Ug unya makita nila ang Anak sa tawo nga magaabot nga sinapwang sa mga panganod inubanan sa dakong kagahom ug himaya. . . . Apan mahitungod sa maong adlaw o takna, walay nasayod niini, bisan pa sa mga manulonda sa langit ni ang Anak, gawas sa Amaham lamang. Padayon sa pagtan-aw, pagtukaw, kay kamo wala masayod kon kanus-a ang tinudlong panahon. Sama kini sa usa ka tawo nga mobiya sa iyang balay ug mopanaw tapos makahatag ug kagahom ngadto sa iyang mga ulipon, sa matag usa diha sa iyang kaugalingong buluhaton, ug tapos makahatag sa magbalantay sa sugo sa pagtukaw. Busa pagbantay, kay wala kamo masayod kon kanus-a moabot ang agalon sa panimalay, sa gabii ba o sa tunga bang gabii o sa tingtugaok sa manok o sa kabuntagon ba; aron inig-abot niya sa kalit, dili kamo makaplagan niya nga nanagkatulog. Ug ang akong ginaingon kaninyo ginaingon ko na sa tanan, Pagbantay.”—Marcos 13:23-37.
2. Nganong gisugyot sa sulondang pag-ampo ang pagkamabinantayon, apan nganong gipakawalay epekto sa mga iglesya sa Kakristiyanohan ang pagpaabot sa Gingharian?
2 Gihatag sa unang mga artikulo ang daghang ebidensiya gikan sa walay gidapigang mga tuboran nga ang mga iglesya sa Kakristiyanohan wala ‘magbantay.’ Sumala sa The Catholic Encyclopedia, ilang gipawalay epekto ang pagpaabot sa Gingharian pinaagi sa pag-ingon nga “ang gingharin sa Diyos nagkahulogan . . . sa pagmando sa Diyos diha sa atong mga kasingkasing,” nga pinaagi niini nawad-ag kahulogan ang sulondang pag-ampo, o Pag-ampo sa Ginoo. Apan ang The New Encyclopædia Britannica nag-ingon: “Ang mga pangaliya sa Pag-ampo sa Ginoo nagpananglit-daan sa lalom makapabalakang mga sirkumstansiya nga giabusohan ang ngalan ug ang kabubut-on sa Diyos, nga ang iyang Gingharian dili pa moabot.” Oo, gipananglit-daan sa sulondang pag-ampo ang pagkamabinantayon. Ilabina, sa unsang mga butanga nga kinahanglang magbantay ang mga Kristohanon?
“Magbantay”—Alang sa Unsa?
3. Nganong dili makasalikway ang mga Kristohanon sa elemento sa panahon?
3 Ang matukiong pagsusi sa mga tagna sa Bibliya bahin sa “Kataposang mga Butang” nagpadayag sa tinong mga butang diin ang mga Kristohanon gisugo sa “pagbantay.” Una, kinahanglan dili nila wad-on sa ilang panan-aw ang elemento sa panahon, kay naghisgot si Jesu-Kristo sa usa ka “ tinudlong panahon” nga nahibaloan lamang sa iyang Amahan. (Marcos 13:32, 33) Dugang pa, gisultihan ni Jesus ang iyang mga tinun-an nga ang Jerusalem “pagayatakan sa kanasoran, hangtod nga matuman ang tinudlong panahon sa [mga Hentil].” (Lucas 21:24) Tataw, gihatagan ni Jesus ang iyang mga sumusunod niining impormasyona aron matabangan sila sa pag-ila sa panahon sa kataposan, tungod kay bahin kini sa iyang tubag sa pangutana: “Magtutudlo, kanus-a gayod mahitabo kining mga butanga, ug unsa may ilhanan inigkahitabo na niining mga butanga?”—Lucas 21:7.
4. Sa unsang “ilhanan” gipabantay ang mga Kristohanon?
4 Dugang pa sa ilang pagkuhag pagtagad sa elemento sa panahon, gipabantay ang mga Kristohanon sa gihangyong “ilhanan,” nga gihisgotan usab diha sa Mateo 24:3 ug Marcos 13:4. Kining daghang bahin nga ilhanan—lakip sa internasyonal nga mga gubat, mga gutom, linog, kamatay ug paglutos sa tinuod nga mga Kristohanon—motakdo sa katumanan sa panahon sa mga propesiya sa pag-ila sa “kaliwatan” nga “dili gayod mahanaw” hangtod nga mahitabo ang tanang mga butang sa panahon sa kataposan.—Lucas 21:10-12, 32.
5. Sa unsang paagi nagauban si Kristo sa iyang tinuod nga mga sumusunod sa tibuok kasiglohan, apan unsay iyang gipasabot sa dihang mihatag siyag ilhanan sa iyang “presensiya”?
5 Unsang hinungdanong mga hitabo ang nalangkit sa “konklusyon sa sistema sa mga butang” nga magtimaan niini nga ilhanan? Ang mga tinun-an nangutana kaniya: “Unsa may ilhanan sa imong presensiya
[Grego, parou·siʹa]?” (Mateo 24:3) Unsay kahulogan sa “presensiya” ni Kristo? Labaw pa kay sa iyang pagkaanaa sa espirituwal uban sa iyang tinuod nga mga sumusunod kon magtigom o tumanon nila ang ilang sugo sa paghimog mga tinun-an. Magpaluyo siya sa iyang mga tinun-an niining paagiha sa tibuok nga kasiglohan. (Mateo 18:20; 28:18-20) Bisan ang mga teologo sa Kakristiyanohan miadmiter nga ang pulong “presensiya” adunay tagsaong kahulogan. Ang The New International Dictionary of New Testament Theology nag-ingon: “Ang ideya sa parousia karon nalangkit sa pagpaabot sa iglesya sa pagtungha ni Kristo sa kataposan sa panahon.” Gikan sa sinugdanan ngadto sa kataposan, ang Kristohanong Gregong Kasulatan nag-awhag sa mga Kristohanon sa pagkinabuhi sa pagpaabot sa presensiya ni Kristo.—Mateo 24:3, 27, 37, 39; Santiago 5:7, 8; 2 Pedro 3:3, 4; 1 Juan 2:28; Pinadayag 1:7; 22:7.
6. (a) Unsay kahulogan sa presensiya ni Kristo alang niining daotang sistema sa mga butang? (b) Sa unsang paagi makaapekto ang presensiya sa dinihogang mga Kristohanon kinsa namatayng matinumanon ug niadtong buhi pa dinhi sa yuta?
6 Ang kahulogan sa presensiya ni Kristo walay lain kondili ang “konklusyon sa sistema sa mga butang.” (Mateo 24:3; Marcos 13:4) Kini nagkahulogan nga ang presente daotang sistema sa mga butang misulod na ngadto sa iyang “panahon sa kataposan,” o “sa kataposang mga adlaw.” (Daniel 12:4, 9; 2 Timoteo 3:1-5) Nagkahulogan kini nga nadawat na ni Kristo gikan sa iyang Amahan ang sugo sa pagpakanaog sa pagmando sa Gingharian ibabaw sa yuta ‘sa taliwala sa iyang mga kaaway.’ (Salmo 110:2; 2:6-9; Pinadayag 11:15-18) Sa dili pa hukman ang kalibotan sa kinatibok-an, susihon ni Kristo ang iyang kaugalingong kongregasyon ug banhawon ang dinihogang nanghibiling mga Kristohanon nga namatayng matinumanon. (1 Corinto 15:21, 23; 1 Tesalonica 2:19; 3:13; 4:13-17; 2 Tesalonica 2:1) Kadtong dinihogang mga Kristohanong buhi gihapon sa yuta ug matinumanong nagalihok ingong ulipon ni Kristo pinaagi sa pagpabiling nagmata sa espirituwal ug nagtagana sa espirituwal nga “pagkaon sa tukmang panahon” igatudlo ni Kristo “ibabaw sa iyang mga katigayonan,” o sa intereses sa Gingharian dinhi sa yuta. (Mateo 24:45-47; Lucas 12:42-44) Kining “matinumanon ug maalamong ulipon” kinahanglang makigbahin ug magadumala sa tibuok kalibotang buluhatong pagsangyaw sa “kining maayong balita sa gingharian,” ug ‘unya moabot ang kataposan.’—Mateo 24:14.
7. Bisan sa panahon sa presensiya ni Kristo, unsang ubang ilhanan nga kinahanglang bantayan sa mga Kristohanon, ug nganong kinahanglang magpadayon sila sa pag-ampo nga “umanhi” ang Gingharian sa Diyos?
7 Ang tinuod nga Kristohanon kinahanglang “magbantay” sa mga butang nga magpamatuod nga sila nagkinabuhi sa panahon sa presensiya ni Kristo ug sa “konklusyon sa sistema sa mga butang.” Apan bisan pa sa yugto sa “panahon sa kataposan,” kinahanglang magbantay sila sa “ilhanan sa Anak sa tawo,” sa iyang “pag-abot” sa pagpakanaog sa silot batok sa daotang sistema ni Satanas. (Mateo 24:30, 44; Marcos 13:26, 35; Lucas 12:40; 21:27; 2 Tesalonica 1:7-10) Busa, bisag ‘presente’ na siya ug natukod na ang iyang Gingharian, siya ug ang iyang Gingharian “moabot” pa aron sa “pagdugmok ug sa pag-ut-ot” sa tanang kanasoran ug mga gingharian sa kalibotan ni Satanas. (Daniel 2:44) Kini mao ang hinungdan kon ngano nga human sa paghatag sa mga elemento sa “ilhanan” sa iyang presensiya, si Kristo midugang: “Inigkakita ninyo niining mga butanga nga magakahitabo, sayri nga nagakahiduol na ang gingharian sa Diyos.” (Lucas 21:31) Oo, bisan sa panahon sa presensiya ni Kristo, kinahanglang mag-ampo gihapon ang mga Kristohanon nga moabot ang Gingharian sa Diyos, ug nagkinahanglan gihapon sila sa “pagpadayon sa pagtan-aw” ug sa “pagtukaw” nianang tinudlong panahon sa “kataposan” ug sa ilang “kaluwasan.”—Marcos 13:7, 29, 32-37; Lucas 21:9, 28.
Kinsa ang Napamatud-ang ‘Mabinantayon’?
8. Subaya sa laktod ang mga butang nga kinahanglang bantayan sa mga Kristohanon.
8 Karon atong nakita nga kinahanglang magkinabuhi ang mga Kristohanon sa pagpaabot sa kataposan sa “tinudlong panahon sa mga kanasoran.” Kinahanglang magbantay sila sa ‘ilhanan sa presensiya ni Kristo ug sa konklusyon sa sistema sa mga butang.’ Kinahanglang magpaabot sila sa pagkabanhaw sa dinihogang nanghibiling mga Kristohanon kinsa namatayng matinumanon ug usa ka tin-awng pagpaila sa “matinumanon ug maalamong ulipon” nga matang nga igatudlo ibabaw sa yutan-ong mga intereses sa Gingharian ni Kristo. Sa kataposan, kining maong “ulipon” magpadayon sa pagtagana sa espirituwal nga pagkaon, samtang manguna sa pagsangyaw “niining maayong balita sa gingharian . . . diha sa tanang pinuy-anang yuta” sa dili pa “moabot ang kataposan.” “Ang ilhanan sa Anak sa tawo” motungha pinaagi sa iyang “pag-abot” sa paglaglag sa daotang sistema sa mga butang ni Satanas.
9. Kinsa ang napamatud-ang nagbantay sa kataposan sa “tinudlong panahon sa kanasoran,” ug sa unsang paagi nakatabang ang Zion’s Watch Tower sa mga Kristohanon sa pagtukaw sa espirituwal nga paagi?
9 Kinsa ang napamatud-ang “nagbantay” niining tanang mga butanga? Ingon ka sayo sa 1876, si Charles T. Russell sa Pittsburgh, Pennsylvania, matagarong nagbantay sa kataposan sa “tinudlong panahon sa kanasoran,” o “panahon sa mga Hentil.” (King James Version) Nianang tuiga iyang gipatik ang usa ka artikulo nga nag-ulohang “Panahon sa mga Hentil: Kanus-a Sila Matapos?” Didto siya miingon nga ang “pito ka panahon matapos sa A.D. 1914.” Sukad sa 1880 paunahan, kanang mao gihapong impormasyona gipatik sa mga tudling sa Zion’s Watch Tower. Ang Marso 1880 nga isyu miingon: “Ang Panahon sa mga Hentil nagpadayon hangtod sa 1914, ug dili magsugod sa bug-os hangtod nianang panahona ang langitnong gingharian.” Tinuod, ang mga estudyante nga misulat niadtong mga artikuloha wala, niadtong panahona, makatagamtam sa tukma Biblikanhon ug makasaysayanhong pagsabot kon unsay kahulogan sa kataposan niadtong “tinudlong panahon sa kanasoran,” sumala sa atong pagsabot niining mga butanga karon.a Apan ang hinungdanong punto mao nga sila “nagbantay” ug nakatabang sa isigka-Kristohanon nga magmaigmat sa espirituwal.
10. Sa unsang paagi napatin-aw ang tinuod nga kahulogan sa “presensiya” ni Kristo?
10 Kanang mao gihapong grupo sa mga estudyante sa Bibliya nga nalangkit kang Charles Russell ug sa magasing Zion’s Watch Tower nakatabang usab sa matinud-anong mga Kristohanon sa pagsabot nga ang “presensiya ni Kristo” kinahanglang sabton ingong dili makita, ug nga siya dili mobalik sa yuta sa pagmando ingong unodnong hari. Kanunay nilang gihatagag pagtagad ang “panimalay” sa Agalon sa mga hitabo sa kalibotan may kalabotan sa “ilhanan” sa presensiya ni Kristo ug sa “panahon sa kataposan.”
11. (a) Unsa ang wala masabti sa bug-os nianang panahona may kalabotan sa yutan-ong mga gingharian ug mahitungod sa dinihogang mga Kristohanon nga “pagasakgawon”? (b) Unsa ang mas matin-awng pagsabot ang atong nabatonan karon bahin sa Daniel 2:44 ug sa 1 Tesalonica 4:15-17?
11 Sa pagkatinuod, gituohan kaniadto nga ang pagkatukod sa Gingharian sa langit magkahulogan ug dihadihang kalaglagan sa yutan-ong mga gingharian ug nga ang dinihogang mga Kristohanon “sakgawon” aron makig-uban sa mga nangamatayng dinihogang mga Kristohanon nga hapit nang banhawon sa panahon sa presensiya ni Kristo. (2 Tesalonica 2:1) Apan kinsay makabasol kanila tungod kay wala makabaton sa bug-os nga pagsabot nianang panahona nga ang dakong buluhatong pagpanigom kinahanglang mahitabo tali sa sinugdanan ug sa kataposan sa katumanan sa Daniel 2:44, o nga ang pagkahimong “sakgawon” nga gihisgotan sa 1 Tesalonica 4:15-17 nagpasabot sa dihadihang pagkabanhaw sa dinihogan kinsa namatay human sa sinugdanan sa unang pagkabanhaw?—1 Corinto 15:36, 42-44; Roma 6:3.
12. (a) Unsay gilaoman nga makaplagan ni Kristo nga ginabuhat sa iyang matinumanong “ulipon” inig-abot niya sa pagsusi sa iyang panimalay, ug kinsay iyang nakaplagan nga nagabuhat sa ingon? (b) Unsay padayong ginabuhat sa “ulipon” nga matang sukad niadto?
12 Nasabtan nato kining mga butanga karon, gumikan sa nagauswag nga kahayag nga midan-ag sa Pulong sa Diyos pinaagi sa “matinumanon ug maalamong ulipon” nga matang. (Proverbio 4:18) Mahitungod nianang maong “ulipon,” si Jesus miingon: “Kinsa ba ang matinumanon ug maalamong ulipon nga maoy itudlo sa iyang agalon sa pagdumala sa iyang panimalay, sa paghatag kanila sa ilang pagkaon sa hustong panahon? Malipayon kadtong ulipona nga sa pag-abot sa iyang agalon mahiabtan nga nagabuhat sa ingon. Sa pagkatinuod magaingon ako kaninyo, iyang igatudlo siya nga maoy magadumala sa tanan niyang mga katigayonan.” (Mateo 24:45-47) Sa dihang gisusi sa naentronong Ginoong Jesus ang iyang panimalay sa 1919, iyang nakita ang grupo sa mga Kristohanon nga nalangkit sa Watchtower nga magasin nga maunungong naningkamot sa “pagbantay” uban sa tabang sa espirituwal nga “pagkaon sa hustong panahon.” Hangtod karong adlawa, kanang “ulipon” nga matang matinumanong nagpadayon sa pagtaganag espirituwal nga pagkaon aron makahimo ang “mga panimalay” sa Agalon ug ang ilang kaubanan sa “pagpadayon sa pagtan-aw, sa pagtukaw.”—Marcos 13:33.
Pagkamabinantayon o Pagkamapinasagdanon?
13. Unsang mga pangutana ang ibangon sa ilang kaugalingon niadtong nagatamay sa mga Saksi ni Jehova?
13 Madali alang sa establisadong mga iglesya sa Kakristiyanohan ug sa ubang mga tawo sa pagyubit sa mga Saksi ni Jehova tungod kay ang ilang mga publikasyon, usahay, mopahayag nga adunay mga butang nga mahitabo niana nga petsa. Apan dili ba ang maong buhat kaharmonya sa sugo ni Kristo sa “pagbantay”? (Marcos 13:37) Sa laing bahin, gidasig ba sa mga iglesya sa Kakristiyanohan ang Kristohanong pagkamabinantayon pinaagi sa pagtudlo nga ang Gingharian maoy “pagmando sa Diyos diha sa atong mga kasingkasing”? Dili ba sila, hinunoa, nagdasig ug espirituwal nga pagkamapinasagdanon pinaagi sa paglantaw sa pagpaabot sa “kataposan” nga “walay kahulogan” o “walay kapuslanang sugilambong”? Ang mga apostata ba nga nagpatuo nga nagsugod “ang kataposang mga adlaw” sa Pentekostes nga nagkobre sa bug-os Kristohanong Panahon nag-awhag ug Kristohanong pagkamabinantayon? Dili ba sila, hinuon, nagsugyot ug espirituwal nga pagkakatulogon?
14. Unsa ang mga panig-ingnan sa mga matinumanong alagad ni Jehova sa nangagi kinsa maikagon kaayo sa pagtan-aw sa katuyoan sa Diyos nga matuman?
14 Tinuod, ang ubang mga gipaabot nga daw gipaluyohan sa kronolohiya sa Bibliya wala matuman sa gidahom nga petsa. Apan dili ba mas maayo nga makahimog sayop tungod sa sobrang kaikag sa pagtan-aw sa katuyoan sa Diyos nga matuman imbes matulog sa espirituwal nga paagi kon bahin sa katumanan sa tagna sa Bibliya? Dili ba nasayop si Moises sa pag-ihap ug 40 ka tuig sa pagpaningkamot sa paglihok ug una sa panahon sa pagwala sa kasakit sa Israel? (Genesis 15:13; Buhat 7:6, 17, 23, 25, 30, 34) Dili ba maikagon kaayo ang mga apostoles ni Kristo nga makakita sa Gingharian nga matukod, bisag dili na hisgotan pa ang ilang sayop nga pagsabot kon unsa gayod ang Gingharian sa Diyos? (Buhat 1:6; itandi sa Lucas 19:11; 24:21.) Dili ba naghiwasa ang dinihogang mga Kristohanon sa Tesalonica sa pagtan-aw sa “presensiya sa atong Ginoong Jesu-Kristo” ug sa “adlaw ni Jehova”?—2 Tesalonica 2:1, 2.
15. Unsang pananglitan ang nagpakita nga kasulatanhon ang paggamit sa kronolohiya sa pagtino kon kanus-a matuman ang kabubut-on sa Diyos, ug unsa ang gipangsinggit sa kadaghanang mga matinumanong mga Saksi ni Jehova, sa nangagi ug sa karon?
15 Dili supak sa kasulatan ang paggamit sa kronolohiya sa pagpaningkamot sa pagkakat-on “sa tinudlong panahon” sa katumanan sa mga katuyoan sa Diyos. (Habakuk 2:3) Gibanabana ni Daniel kon kanus-a matapos ang kalaglagan sa Jerusalem. (Daniel 9:1, 2) Ang unang siglong matinumanong mga nanghibiling Hudiyo nagpaabot sa pag-abot sa Mesiyas tungod kay ilang gibanabana ang kataposan sa usa ka panahon, pinaagi sa tagna. (Daniel 9:25; Lucas 3:15) Sa ulahing ika-19ng siglo ug sa unang ika-20ng siglo nakahimo ang mga Kristohanon sa pagkinabuhi sa pagpaabot sa pagmando sa Gingharian una pa sa 1914 tungod kay ilang gibanabana kon kanus-a matapos ang “tinudlong panahon sa kanasoran.” (Lucas 21:24; Daniel 4:16, 17) Busa, kadto, masabtan kon nganong dihay paningkamot sa paggamit sa ubang mga timailhan sa Bibliya sa pagsusi kon kanus-a matuman ang dugay nang gipaabot nga mga paglaom. Ang matinumanong mga alagad ni Jehova sa nangagi nanagsinggit: “Kanus-a pa, O Jehova?”—Isaias 6:11; Salmo 74:10; 94:3.
Nganong “Mangandam”?
16. (a) Nagpasabot ba ang Marcos 13:32 nga kinahanglang dili kita magpakitag kaikag kon kanus-a moabot ang kataposan? (b) Unsang “ilhanan” ang makita, apan unsang ubang “ilhanan” ang atong gihulat?
16 Sanglit tin-awng nagpahayag si Jesus nga walay tawong nahibalo “nianang adlawa” o “sa takna” kon kanus-a sugoon sa Amahan ang iyang anak sa ‘pag-abot’ batok sa daotang sistema sa mga butang ni Satanas, hayan may mangutana: ‘Nganong dinalian man kaayo ang pagkinabuhi sa pagpaabot sa kataposan?’ Dinalian kini kaayo tungod kay sa maong panahon, si Jesus midugang: “Padayon sa pagtan-aw, sa pagtukaw . . . pagbantay.” (Marcos 13:32-35) Ang “ilhanan” sa parousia ni Jesus makita na sukad sa 1914. Kita karon naghulat sa “ilhanan sa Anak sa tawo,” inig ‘abot’ niya ingong Tigpahamtang sa Silot ni Jehova.
17, 18. (a) Nganong gisugo ni Kristo ang unang siglong mga Kristohanon sa pagkalagiw gikan sa Jerusalem inigkakita nila sa ilhanan sa umaabot nga kalaglagan niini? (b) Nganong peligroso ang pagpangatarongan mahitungod sa pagkadinalian sa atong panahon?
17 Sa dihang gihatagan ang unang siglong Hudiyohanong mga Kristohanon ug ilhanan nga pinaagi niini ilang mahibaloan nga miabot na ang panahon sa pagkalagiw gikan sa Jerusalem, iyang giinsister ang panginahanglan sa paglihok dayon. (Lucas 21:20-23) Nganong adunay pagkadinalian, sanglit duolan na sa upat ka tuig ang milabay sukad nga mitungha ang ilhanan sa 66 K.P. ug sa aktuwal nga kalaglagan sa Jerusalem sa 70 K.P.? Tungod kay nasayod si Jesus nga kon sila maglangan pa, magpadugaydugay unya sila sa ilang pagkalagiw ug sa ulahi madakpan sa mga sundalong Romano.
18 Maingon man usab karon, peligroso gayod kaayo alang sa mga Kristohanon sa pagpangatarongan mahitungod sa pagkadinalian sa atong panahon ug sagopon ang “langaylangayang” tinamdan nga nagpabanaag ug pagduhaduha bahin sa pagkaduol sa kataposan.
19. Unsang pasidaan ang gihatag ni Pedro ug ni Jesus?
19 Ang parousia, o presensiya ni Kristo karon midagan nag 70 ka tuig, ug ang iyang “pag-abot” alang sa “adlaw ni Jehova” sa pagpakanaog sa silot batok sa kalibotan ni Satanas haduol na kaayo. Si apostol Pedro nag-ingon nga kining adlawa “moabot sama sa usa ka kawatan,” ug siya midugang nga kita kinahanglang ‘maghulat ug maghinumdom kanunay sa presensiya sa adlaw ni Jehova.’ (2 Pedro 3:10-12) Si Jesus mipasidaan usab kanato: “Bantayi ang inyong kaugalingon aron ang inyong mga kasingkasing dili mabug-atan sa sobrang pagkaon o sa sobrang pag-inom o sa mga kabalaka sa kinabuhi, ug sa kalit lamang kanang adlawa moabot diha kaninyo ingong usa ka lit-ag. . . . Pagtukaw.”—Lucas 21:34-36.
20. Alang sa unsa nga kinahanglang magmapasalamaton kita, ug sa unsang paagi ang tukmang Kristohanong pagpaabot makapanalipod kanato?
20 Unsa ka malipayon ug unsa ka mapasalamaton ang mga Saksi ni Jehova nga kanunayng gipabantay sa espirituwal pinaagi sa matinumanon ug mabinantayong “ulipon” nga matang! Ang tukmang Kristohanong pagpaabot magabantay kanato niining peligrosong “kataposang mga adlaw” ug mopalihok kanato nga mopakigbahin nga madasigon “niining maayong balita sa gingharian.” Pinaagi niini matabangan nato ang uban nga magbantay ug maluwas ngadto sa bag-ong sistema sa mga butang diin “magapuyo ang pagkamatarong.”—2 Timoteo 3:1-5; Mateo 24:14; 2 Pedro 3:13.
[Mga footnote]
a Tan-awa ang librong “Let Your Kingdom Come,” kapitulo 14, ug sa maayong pagkadokumentong apendise nianang kapituloha sa kataposan sa libro.
Makahinumdom Ka Ba?
◻ Nganong dili makasalikway ang mga Kristohanon sa elemento sa panahon sa kronolohiya sa Bibliya?
◻ Unsa ang talagsaong kahulogan sa pulong “presensiya”?
◻ Nganong tukma gihapon ang pag-ampo nga moabot ang Gingharian sa Diyos?
◻ Unsaon nimo sa pagtubag niadtong motamay sa mga Saksi ni Jehova mahitungod sa kronolohiya?
◻ Nganong peligroso ang pagpangatarongan mahitungod sa pagkadinalian sa atong panahon?
[Kahon sa panid 18]
Mga Butang nga Bantayan sa mga Kristohanon
Ang kataposan sa “tinudlong panahon sa mga kanasoran.”—Lucas 21:24.
“Ang ilhanan” sa presensiya ni Kristo “ug sa konklusyon sa sistema sa mga butang.”—Mateo 24:3–25:46.
Ang tin-awng identipikasyon sa “matinumanon ug maalamong ulipon” nga matang—Mateo 24:45-47.
Ang “ilhanan sa Anak sa tawo,” inig ‘abot’ niya sa pagpahamtang sa silot ni Jehova.—Mateo 24:30.
[Hulagway sa panid 17]
Padayong nagbantay si C. T. Russell ug ang iyang kaubanan