‘Pagwali sa Maayong Panahon ug sa Daotang Panahon’

Sumala sa giasoy ni Harold E. Gill

ANG Australianong kabanikanhan nangamay kanako sa dihang ako batan-on nga 19 anyos. Ang unang gubat sa kalibotan nagbilin sa Inglaterra nga kabos kaayo. Ang minilyon, hasta ako, walay nakitang trabaho. Usa ka buntag niana gipakita kanako sa akong amahan ang usa ka anunsiyo sa mantalaan mahitungod sa plano sa gobyerno sa pagtabang sa mga batan-on sa paglalin ngadto sa Queensland, Australia. Busa 25 kanamo migikan sakay sa barko sa London niadtong 1922.

Ang una kong trabaho maoy sa usa ka parrasan. Apan tapos sa pila ka bulan mibalhin ako ngadto sa dakong yuta nga gikaingin aron tamnan ug trigo. Didto nakatuon ako sa daghang butang: unsaon paggatas ang mga baka, unsaon paggamit ang atsa ug serotso, pag-ila sa oras pinaagi sa adlaw ngadto sa sulod sa pulo ka minutos, pagpatayg lala nga halas sa luwas nga paagi, pagdaro pinaagi sa hugpong sa mga kabayo, paggamag mga koral, pagpukan sa kahoy sa dapit nga buot nimong mapukan kana, ug pagbuhat sa daghan pang ubang trabaho nga bahin sa kinabuhi sa kabanikanhan sa Australia.

Didto usab nako masinati ang hampak sa mga dulon. Sila baga kaayo nga ang mga drayber sa trak kinahanglang magtaod ug kadena sa ligid aron makasaka sa mga bungtod. Sa laing panahon may kaliboang ilaga nga nakadaot pag-ayo sa sulod sa kamarin. Apan sa usa ka semana sa ulahi sila kalit namahawa sama sa ilang pag-abot. Ug akong naagian ang makapagun-ob-sa-kasingkasing nga kalisang sa hulaw, nga ang mga karnero—kaliboan kanila—nagbuy-od nga patay sa tanang dapit.

Niadtong 1927 akong giabangan ang wala pa matandog nga yuta haduol sa Gympie, habagatang Queensland, gikaingin kana, ug gitamnan ug saging. Ang akong mga silingan, si Tom ug Alec Dobson, maoy mga Estudyante sa Bibliya, sumala sa pagtawag sa mga Saksi ni Jehova niadtong mga adlawa. Usa ka adlaw akong gihisgotan nga moadto ako sa Brisbane, ang kaulohan sa nasod, alang sa kadiyut nga pagduaw. Gidapit nila ako sa pagduaw sa ilang mga ginikanan. Gibuhat ko kana, nga gigugol ang tibuok adlaw sa paghisgot sa Bibliya uban sa ilang amahan. Ang nakapahingangha kanako mao ang kayano sa dakong gisublisubli nga tema sa Bibliya—ang Gingharian sa Diyos. Naangayan ko usab ang ngalang “International Bible Students.” Kadto mihatag sa hulagway sa internasyonal nga pamilya, ngatanan mga estudyante sa Bibliya, nga ang tanan nagkahiusa sa pagsimba sa Diyos. Sa mibalik ako ngadto sa sagingan, gidala ko na ang libro ni J. F. Rutherford nga Creation. Sa nabasa ko kana, sa kataposan akong nakaplagan ang mga tubag sa daghan kong pangutana ug mao nga mipedido ako sa dugang basahon.

Sa dugang kong pagbasa, sa dugang buot kong isulti sa uban ang bahin sa Gingharian. Ingong sekretaryo sa sosyal ug cricket nga mga klab sa dapit, daghan akog higala ug naneguro ako nga sila madasig usab sa kamatuorang akong nakat-onan. Busa mipalit akog daang motorsiklo aron magamit sa paglakawlakaw. Apan, sa dako kong katingala akong nasayrang ang butang nakapahinam kanako wala makapadasig kanila. Naghunahuna silang ako nabuang na. Tingali mapugsanon kaayo ako, apan nahupong gayod ako sa butang akong natun-an!

Nadayag nga akong gikinahanglan ang pagbansay ug instruksiyon gikan sa mga Estudyante sa Bibliya. Busa gibaligya ko ang plantasyon sa saging ug miduyog sa usa ka kongregasyon sa Brisbane. Unom ka bulan sa kaulahian, sa Abril 2, 1928, ako nabawtismohan. Unya akong gidawat ang laing trabaho sa uma, apan sa paglabay sa mga bulan ako sa mausbawon wala mahimutang. Ang kinabuhi sa kabanikanhan nga sa nangagi gikahimut-an ko pag-ayo wala na makatagbaw kanako. Ang tinguha nga gugolon ang akong panahon ug kusog sa laing matang sa pagpangani miuswag ug dako sa akong kahiladman. Ang tambag ni apostol Pablo kang Timoteo nasilsil diha kanako: “Iwali ang pulong, buhata kana nga dinalian sa maayong panahon, sa daotang panahon . . . Buhata ang buluhaton sa ebanghelista.”—2 Timoteo 4:2, 5.

Ako, kay maikagong mosugod, misulat ngadto sa Watch Tower Society sa Sydney nga mihangyo nga itudlo ngadto sa espirituwal nga pagpangani ingong bug-os-panahong ministro, usa ka payunir. Gidawat nila ang akong aplikasyon ug sa 1929 gitudlo ako ngadto sa Toowoomba, habagatang Queensland.

Pagwali sa Kabanikanhan

Pila ka bulan sa kaulahian, akong nadawat ang usa ka sulat gikan sa Sosyedad nga nagsulti kanako mahitungod sa usa ka demotor nga sakyanang baligya ug misugyot nga kon paliton ko kana, si George Schuett makakuyog kanako. Ug kana mao ang nahitabo. Si George niadto saysentahon na ug sa tibuok kinabuhi maoy estudyante sa Bibliya. Ako bayentehon pa ug kulang sa kasinatian. Ang iyang tabang, tambag, ug kahibalo sa Bibliya bililhon kaayo alang kanako, bisan pag seguradong sa makadaghan ako nagsulay gayod sa iyang pailob.

Ang among teritoryo maoy 100,000 milya kuwadrado (260,000 sq km) sa halayong kasadpang Queensland. Kana among gisangyawan sa tulo ka beses. Ang mga lungsod gagmay ug lagyo. Bisan ang mga estasyon sa karnero ug baka (mga rantso) maoy 60 ngadto 70 milya (95 ngadto 115 km) gikan sa usag usa. Kadtong nahilit nga katawhan maikagong nagdawat sa mga set sa napulo gahig-haping mga libro nga among gitanyag sa amot lamang nga 10 shillings (mga $2, U.S.). Kay sila maabiabihon kaayo, kami wala mahitabong wala makakaon ug walay higdaan sa gabii.

Sa kabanikanhan, ang mga karsada maoy mga dalandalan lamang. Sa tibuok tuig gidala namo ang mga kadena sa ligid sa pagsagubang sa lapok, alambreng pukot para sa balas, ug makinang igbibira aron birahon kami gikan sa pagkalubong. Sa usa ka okasyon kami wala makaagi sulod sa usa ka semana tungod sa baha. Gamay na lang kaayo ang pagkaon ug tubig, apan kami nabuhi gihapon. Sa laing panahon kami misubay sa usa ka agianan sa kabagnotan duol sa sunog sa lasang. Sa kalit naamgohan namong mibali ang hangin ug ang sunog nagpadulong kanamo. Ang agianan siot kaayo nga dili kami makaliko. Ang nabuhat lamang namo mao ang pag-ampo ug pagtunob sa gasolinador. Igo ra gayod kaming nakaikyas. Ako mangurog gihapon inigpalandong ko unsa namo ka duol sa katalagman.

Sa Hedkuwarter sa Australia

Sa 1931 si Alex MacGillivray, ang magtatan-aw sa sanga, midapit kanako nga moduyog sa pamilyang Bethel sa Sydney. Ako nalipay, bisan tuod nahadlok ug diyutay. Niadtong panahona ang sangang buhatan sa Sosyedad sa Australia mao ang responsable sa pagsangyaw sa maayong balita sa Tsina, sa kadaghanang kayutaan sa Halayong Sidlakan, ug sa kapuloan sa South Pacific—usa ka rehiyong misakop sa un-kuwarto sa globo. Si Igsoong J. F. Rutherford, ang presidente niadto sa Sosyedad, naikag nga aboton ang maong mga dapit sa “maayong balita.” (Mateo 24:14) Si Igsoong Mac, sumala sa pagtawag namong tanan sa magtatan-aw sa sanga, samang naikag bahin niadto. Sa misulod ako sa Bethel, ako wala gayod magdamgo nga sa dili madugay ako mahiadto sa pipila nianang mga dapita mismo.

Ang pag-antos sa mga kalisdanan kanunayng nalangkit sa misyonaryong buluhaton. Apan niadtong mga adlawa una sa Gubat sa Kalibotan II walay Tunghaang Gilead sa pagbansayg mga misyonaryo, ug walay mga balayng misyonaryo. Ang komunikasyon hinay, nga nagpasiugda sa kahilit. Wala usab ing pinansiyal nga suportar gawas sa diyutay nga amot sa mga basahon, nga, tungod sa pagkamanggihatagon sa kaigsoonan, gitagana sa Sosyedad sa ubos nga bili. Kadtong mitubag sa tawag alang sa mga ebanghelista kinahanglang mahimong mga mag-uuna, mga payunir sa labing bug-os nga diwa. Ang buluhaton nagpasabot sa pag-adto, nga kasagaran tinagurha, sa daghag-molupyong mga siyudad sa Sidlakan o sa nahilit nga kapuloan sa Pasipiko, aron itanom didto ang mga binhi sa kamatuoran sa Bibliya diha sa wala-matandog nga yuta. Kinahanglang among sagubangon ang bug-os lahing mga pagtuo, mga pinulongan, ug mga paagi sa kinabuhi, ug kadto nagkinahanglag bug-os nga pagsalig ug pagkamaunongon kang Jehova.

Ngadto sa New Zealand

Ang una kong asaynment nga laing nasod mao ang New Zealand sa 1932. Kinahanglang tagdon ko ilabina ang pag-organisar sa buluhatong pagsangyaw, ilabina ang payunir nga pag-alagad. Busa, dugang sa pagduaw sa mga kongregasyon, ako nagbuhat sa kanataran uban sa mga payunir. Ang pipila kanila nahimong mga grupong tigpanaw, nga nasangkapan sa kasangkapan sa pagkampo ug mga sakyanan, apil ang kasaligang daang bisikleta. Ako mialagad sa taas nga panahon kauban nianang maong grupo sa South Island.

Sa usa ka okasyon among giabangan ang Civic Theatre sa Christchurch sa pagpresentar sa usa ka narekord nga pakigpulong ni Igsoong Rutherford. Ang usa ka batan-ong lalaki, si Jim Tait, mianha ug nagpakitag kaikag. Nahibalag ko siya pag-usab sa sunod gabii ug nakadayeg pag-ayo sa iyang kadasig nga akong gisugyot nga iyang palandongon ang pagkuyog sa among grupo sa mga payunir. Pagkaahat niadtong imbitasyona karong adlawa, kay siya dili pa gani bawtismado niadto! Apan siya mipauli, namutos sa pila niya ka butang ug nagkarga niana sa iyang bisikleta, nanamilit sa iyang mga ginikanan, ug mikuyog sa among malipayong grupo. Hangtod niining adlawa siya nagapabiling maisogong Saksi. Kadto maoy tinuod nga ‘maayong mga panahon.’

Ang Halayong Sidlakan

Sa 1936 ako miuli sa Australia aron hatagag instruksiyon alang sa usa ka biyahe ngadto sa Batavia (karon Djakarta) ug sa Singapore. Akong irekomendar kon haing siyudara ang mas angayang himoong opisina sa pagtaganag mas suod nga kontak sa among mga misyonaryo sa Halayong Sidlakan. Gipili ko ang Singapore ingong mas maayong sentro ug nagpabilin didto sa pagdumala sa opisina ug sa pagsangyaw sa siyudad. Gipanalanginan ni Jehova ang buluhaton, ug sulod sa 18 ka bulan ang kongregasyon sa Singapore natukod.

Sa kaulahian ang 52-tiil (16-m) nga sakayan sa Sosyedad nga Lightbearer gipasukad sa Singapore. Ang tripulante niana nga mga ministro nagduaw ug nagsangyaw sa daghang dunggoanan sa gitawag karong Indonesia ug Malaysia. Ang usa sa akong mga trabaho mao ang pagsuplay kanila sa mga basahon. Akong mahinumdomang sa 1936 lamang, sila nakapanagtag sa 10,500 ka basahon diha sa napulo ka pinulongan.

Kapuloan sa Pasipiko

Sa Hulyo 1937 ako gipabalik sa Sydney ug gipadala sa Fiji. Sanglit ang among basahon gidili didto, among gibutang ang bug-os nga pagtagad sa pagsangyaw pinaagig sakyanang may trompa, nga gigamit ang Pihianong hubad sa mga pakigpulong ni Igsoong Rutherford nga gihimo ni Ted Heatley, nga taga-Fiji. Siya mikuyog kanako aron siya ang mosulti sa mikropono. Among giadto ang tanang balangay sa Viti Levu (Dakong Fiji), ang pangunang pulo, ug kami giabiabi pag-ayo. Dugang pa, mitabang kami sa pagtukod sa kongregasyon sa Suva ug sa pagpauswag sa balay-balay nga pagsangyaw.

Sa 1938 si Igsoong Rutherford miduaw sa Australia ug New Zealand nga may dako kaayong publisidad. Bisan pag ang kinadak-an niana maoy masupakon, kadto nakapukaw lamang sa pagkamausisaon. Miadto ako sa New Zealand aron hikayon ang iyang pagduaw didto. Samtang gihatod ko siya sa sakyanan ngadto sa Auckland Town Hall alang sa tigom, giawhag ko ang iyang pagtagad ngadto sa usa ka placard sa mantalaan nga nagdalag tinuis nga ulohan sa pakigpulong iyang gihatag katuigang miagi. Ang placard mabasa, “Milyonmilyong buhi karon mopalabi nga mamatay inay mamati kang Huwes Rutherford.” Kusog kaayo ang iyang katawa. Kadto maayong kaayong publisidad. Napuno ang Town Hall.

Balik sa Fiji

Usa ka adlaw sa 1940 ako nagtrabaho sa opisina sa Sydney sa nangutana kanako si Igsoong Mac, “Maayo ra ba ang imong pasaporte?” Giingnan ko siyang maayo ra man. “Adunay barko nga molarga paingon sa Fiji sa tulo ka adlaw. Buot kong moadto ka didto ug hagita ang gobyerno diha sa mga korte mahitungod sa pagdili sa atong mga basahon.” Niana, akong giempake ang usa ka karton sa nakapasakit nga mga basahon ug mibalik sa Fiji. Ang girekomendar nga abogado hadlokan, busa wala ko siya gamita ug nangitag lain nga dili kaayo hadlokan. Siya miingong iyang andamon ang kaso apan dili kana ipresentar sa korte. Ingong resulta, ako ang nagkupot sa kaso nga ang Abogado Heneral mao ang akong kontra. Sumala sa misangpot, kami napildi sa usa ka teknikalidad bahin sa paniempo tungod sa paglangan sa unang abogado.

Tapos nianang kakulian, akong gihangyo nga makigkita sa Gobernador, si Sir Harry Charles Luke, nga iyang gitugot. Presente uban sa Gobernador mao ang Primer Ministro ug ang Hepe sa Polisiya. Miampo ako kang Jehova nga magauban siya kanako. Sa pagpresentar sa among kaso, akong gitagana ang ebidensiya nga nagpakita nga ang Iglesya Romana Katolika maoy responsable sa panguna sa pagdili. Sa pagkatapos sa panaghisgot, ang Gobernador miduol kanako, mitunol pagbalik sa gidili nga mga libro nga akong gipakita ingong ebidensiya, ug sa hinay miingon, “Abi mo, Gn. Gill, ako dili ignorante sa mga paagi sa herarkiya Romana Katolika sumala sa imong paghunahuna. Ang akong tambag kanimo mao nga ipadayon ang inyong buluhaton sa pag-ebanghelyo.” Gipasalamatan ko siya ug milakaw aron sa pagtelegrama sa Sydney alang sa usa ka kargamento sa mga basahon.

American Samoa

Sunod gipadala ako ngadto sa American Samoa. Sulod sa akong tulo ka bulan didto, ako mipuyo uban sa Hataas nga Pangulo si Taliu Taffa, pangulong maghuhubad sa gobyerno ug respetado kaayong tawo. Ang iyang pag-umangkong babaye, usa ka Saksi sa Fiji, nagpahibalo daan. Busa ang iyang mapahiyomong nawong misugat kanako sa pag-abot sa barko. Sa tibuok kong pagpuyo, siya labing maabiabihon. Siyempre, ang iyang panimalay nagkinabuhi sa nitibong kalan-on, nga kadaghanan kinilaw nga isda ug mga ubi. Ang mga taga-Samoa nabuhi ra niana, apan sa wala madugay kadto makapuol na alang kanako. Ako gipanghubagan ug nangandoy ug dako sa Uropanhong pagkaon, apan ako walay salaping ipalit niana. Aw, niadtong panahona naanad na ako nga mabuhi sa ‘daotang mga panahon.’

Ang gitudlo kanakong buluhaton sa American Samoa mao ang pagpanagtag sa 3,500 ka kopya sa bag-ong nahubad nga pulyetong Where Are the Dead? Sa pag-abot, ako mihimog pagduaw ingong kortesiya sa Gobernador aron ipasinati kaniya ang pulyeto ug hatagan siyag kopya. Siya naghunahuna nga igo na ang relihiyosong representasyon sa pulo—ang padre sa navy, ang London Missionary Society, ang Seventh-Day Adventists, ug ang mga Romano Katoliko. Bisan pa niana, misugyot siyang ipakita ko ang pulyeto ngadto sa matag usa kanila ug ipahibalo nila sa Abogado Heneral kon sa ilang hunahuna kadto maayo bang ipanagtag. Ang padre matamihiron pero dili mabatokon. Ang mga Adventista walay pagtagad kon unsay akong buhaton basta dili ko kuhaan ang ilang panon. Ang parson sa Missionary Society maayohon ra sa dihang kami may gikahiusahan—ang papado. Ako wala gayod makahibalag sa Katolikong pari kay nahitabo ang katingad-anang butang.

Nakahatag akog kopya sa pulyeto ngadto sa taga-Samoa nga polis nga mikuyog kanako ngadto sa Gobernador. Sa nakit-an ko ang polis sa pila ka adlaw sa ulahi, ako siyang gisukna kon nagustohan ba niya kadto. Siya miingon: “Ang akong boss [Abogado Heneral] miingon kanako, ‘Adtoa ang imong pari ug pangutan-a siya kon kini maayo bang basahon.’ Ako mipasilong sa usa ka kahoy ug mibasa sa basahon. Ako miingon, ‘Kini maayo kaayong basahon, pero kon ako kining ipakita sa pari, siya moingon, “Dili maayong basahon.”’ Ako miingon sa akong boss, ‘Boss, miingon ang akong pari, “Maayo kaayong basahon.”’”

Sa ulahi, samtang ako nagsangyaw ubay sa pantalan, miduol ang Abogado Heneral ug midapit kanako ngadto sa iyang opisina. Didto akong gilaraw ang mensahe sa pulyeto samtang kana iyang gihiling. Unya iyang gikuha ang telepono ug gimando nga luwatan kana. Ang panahon ‘maayo’ gayod kaayo niadto! Mipalit akog bisikleta ug misugod sa pagpanagtag sa mga pulyeto. Sa tulo ka bulan akong napanagtag ang tanan gawas sa usa ka karton sa 350 ka pulyeto.

Western Samoa

Gidala ko kadtong nabiling mga pulyeto ngadto sa Western Samoa, pila ka oras kon sakyon pinaagig barko. Apan ang balita nag-una na, kay sa akong pag-abot giingnan ako sa usa ka polis nga ako dili tugtang mokawas. Akong gipakita ang akong pasaporte ug gibasahan siya sa may pagkahalangdong preambola nga nagahangyo sa tanang hingtungdan nga tugotan ang sakop sa Iyang Britanikong Kamahalan “sa pagsulod nga libre nga walay kababagan ug paghatag kaniya sa tanang ayuda ug panalipod.” Tungod niadto akong nabatonan ang interbiyo uban sa Gobernador, kinsa mitugot nga ako mopabilin hangtod molarga ang sunod barko sa lima ka adlaw. Ako miabang ug bisikleta ug milibot sa pulo, nga nagbilin sa mga pulyeto sa haluag nga dapit.

Unya kadto maoy balik na sa American Samoa. Ang gubat nagsilaob sa Pasipiko, nga dako ang mga pagbating pagkamakinasod. Sanglit ang mga awtoridad wala makasabot sa among hugot neyutral nga baroganan, kami ilang gidid-an diha sa daghang dapit. (Juan 15:19) Bisan pa niana, ako ilang gihangyong matinahoron nga mobiya sa Samoa, ug ako mibalik sa Australia.

Balik Ngadto sa New Zealand

Sa maong panahon ang “daotang panahon” miabot na sa akong mga igsoon sa New Zealand. Kadto mao ang sunod kong asaynment. Apan sa Oktubre 1940, wala madugay tapos sa akong pag-abot, ang among buluhaton gidili usab didto. Daghang sulat ug telegrama ngadto sa gobyerno wala tubaga. Nahiapil niadto ang telegrama nga among gipadala ngadto sa Abogado Heneral: “IHIKAW BA SA INYONG GOBYERNO KANAMO ANG KATUNGOD ISIP MGA KRISTOHANON SA PAGTIGOM UG PAGSIMBA SA DIYOS PINAAGI SA AWIT, PAG-AMPO, PAGTUON SA KASULATAN? PALIHOG TUBAGA OO KUN DILI.”

Sa sunod adlaw ang sekretaryo sa Primer Ministro mitelepono sa pagtanyag kanamog interbiyo, nga gidawat nako ug ni Igsoong Robert Lazenby. Uban sa Primer Ministro, si Peter Fraser, mao ang Abogado Heneral ug usa ka taas nga opisyal sa kapolisan. Sila maayohon ug matinahoron pero mihatag kanamo sa impresyong sila walay mahimo. Hinuon, sa Mayo 8, 1941, giusab sa gobyerno ang pagdili mao nga kami gitugotan sa among mga tigom, bisan pag gihimo namo kana sukad sa sinugdan sa ginagmayng mga grupo sa pribadong mga balay. Kami makasangyaw usab nga walay kababagan basta dili kami managtag sa among mga basahon. Sa ulahi, sa Marso 1945, samtang ang gubat sa Pasipiko init pa, ang pagdili bug-os giwagtang.

Balik sa Inglaterra

Ako mibalik sa Sydney sa 1941. Sa maong panahon kami gidid-an usab sa Australia. Tapos sa panaghisgot, si Igsoong Mac misugot nga ako moadto sa London sa pagsusi kon may mahimo ba didto mahitungod sa mga pagdili. Ako misakay sa barko sa Oktubre 2, 1941. Apan tungod sa mga kapeligrohan sa gubat, nakaabot ako sa Liverpool sa Disyembre 22 na lamang, duolag tulo ka bulan sa ulahi.

Sa London ako misulay nga makabaton ug interbiyo uban kang Lord Alexander, ang unang Lord of the Admiralty ug usa ka higala sa akong amahan. Apan tungod sa kainit sa gubat kadto dili posible. Ngani, giisip sa London nga ang among mga suliran katungdanan ra sa mga gobyerno nga natungdan.

Tapos sa usa ka biyahe ngadto sa hedkuwarter sa Sosyedad sa New York, ako mibalik sa Inglaterra ug nakabatog tiket alang sa Australia. Gisusi ang akong kargamento ug giselyohan sa London ug miadto ako sa barko. Ang mga igsoong akong gipuy-an mihatag kanakog pila ka gasa alang sa biyahe, nga akong gibutang sa akong gamay nga bag. Sa misaka na ako, gisukna ako sa usa ka opisyal sa aduwana, “Nganong kini wala man selyohi?” Ang yano kong katin-awan wala makatagbaw kanila; mao nga ako ilang gidakop, gikuhaan sa tanan, ug, bisag walay nakitang makadahig kanako sa usa ka sala, gibutangbutangan ako nga milikay sa pagsusi. Migugol akog usa ka bulan sa prisohan sa Walton. Hangtod niining adlawa ako nakatinong ako gimaneobra aron mapugngan ang akong pagbalik sa Australia.

Tapos niadto dili na mahimo ang pagbiyahe. Busa ako mipuyo sa Inglaterra. Sa sinugdan akong napahimuslan ang mabungahong ministeryo sa Alfreton, Derbyshire. Sa ulahi ako nagduaw sa mga kongregasyon isip magtatan-aw sa sirkito. Unya ako miadto sa Malta sa pag-alagad diin dako kaayo ang panginahanglan. Karon ako nahibalik sa Sheffield, ang siyudad nga akong gibiyaan ingong batan-on 62 anyos nga miagi. Akong pribilehiyo ang pag-alagad nga sekretaryo sa Ecclesall nga Kongregasyon, usa sa 15 sa siyudad. Ug sulod sa ulahing katuigan, akong napahimuslan ang maayong pagpaluyo sa akong asawa, si Joan, nga sakop sa usa ka pamilya si kinsa akong gitun-an 35 ka tuig nga miagi.

Ako karon makalingi sa tunga sa siglong pag-alagad ingong ebanghelista, sa ‘maayong panahon ug sa daotang panahon.’ Gimahal ko gayod pag-ayo ang duha ka hiyas nga pagsalig ug pagkamaunongon! Oo, salig kang Jehova, bisan unsa ang kahimtang. Salig nga siya ug ang iyang dako kaayong panon sa mga manulonda nagauban kanato. Wala gayod kita mag-inusara.

Ug magpabiling maunongon. Hupti ang pagkamaunongon dili lamang ngadto kang Jehova ug kang Jesu-Kristo kondili ngadto usab sa yutan-ong organisasyon sa Diyos nga nagamatuto ug nagamahal kanato. Sa pagkatino, ang atong pagkamaunongon masulayan gayod tungod sa mga pagpasibo sulod sa organisasyon, tungod sa sulirang mahidangat kanato, o tungod nianang moabot tungod sa atong kaugalingong kabuangan. Apan ang bililhong mga hiyas sa pagkamaunongon ug pagsalig modala kanato latas—latas sa ‘maayong panahon ug sa daotang panahon’ usab.

[Hulagway sa panid 26]

Ang pagpayunir sa kabanikanhan, Queensland, Australia

[Hulagway sa panid 28]

Uban sa tripulante sa Lightbearer—Singapore

[Hulagway sa panid 29]

Ang akong tagbalay sa Samoa, ang Hataas nga Pangulo si Taliu Taffa