Mga Magmamantala sa Gingharian Nagtaho

Pagtultol sa Manulonda sa Atong Ministeryo

SUBSOB ginapakita sa mga kasinatian nga ang Kristohanong ministeryo gitultolan sa manulonda. (Pinadayag 14:6, 7) Dili ba usa ka manulonda ang mitultol kang Filipe ngadto sa sinserong Etiopianhong eunuko nga buot makasabot sa Bibliya? (Buhat 8:26, 27) Ug sa dihang ang matarog-kasingkasing nga Hentil si Cornelio tim-os miampo sa Diyos alang sa panabang, dili ba usa ka manulonda ang gisugo sa pagtabang kaniya? (Buhat 10:3-33) Ang mosunod nga kasinatian gikan sa Denver, Colorado, U.S.A., motabang kanato sa pagpabili nga ang atong ministeryo karong adlawa gitultolan sa manulonda samtang atong pangitaon kadtong sinserog kasingkasing.

◻ Sa ilang balay-balay nga ministeryo, duha ka Saksi ni Jehova ang giingnan sa ginang sa balay nga siya puliki kaayo. Ang usa ka Saksi nangutana kaniya kon siya naghunahuna bang ang usa makahimo sa pagpakigsulti sa mga patay. Gipadayon ang mga Saksi ug gibasa ang mga kasulatan mahitungod sa hinungdan sa kamatayon, ug ang paglaom sa pagkabanhaw. (Ecclesiastes 9:5, 10; Juan 5:28, 29) Ang babaye naikag ug nahikay ang pagtuon sa Bibliya. Tapos sa tulo ka bulan nga pagtuon iyang gihangyo ang mga Saksi nga sa umaabot moanha sa 4:30 s.h. alang sa pagtuon. Sila misugot niana.

Sa sunod semana ang babaye ug iyang bana naghulat na sa mga Saksi, kay ang bana buot mahibalo kon unsay gitun-an sa iyang asawa. Siya nangutanag daghan, nga usa niana mao: “Kinsa ang antikristo ug ang tawo sa kalapasan?” Kining pangutanaha gitubag nga matagbawon gikan sa Bibliya sa mga Saksi, ug unya mihangyog unom ka kopya sa librong Ang Kamatuoran nga Motultol sa Kinabuhing Dayon, nga gipatik sa mga Saksi ni Jehova.

Sa sunod semana ang bana ug iyang asawa, uban sa unom nila ka anak diha na alang sa pagtuon. Ang mga anak maayog pamatasan ug masinugtanon. Sa wala madugay silang tanan misugod sa pagtambong sa mga tigom sa mga Saksi ni Jehova sa Kingdom Hall.

Ang bana mihangyo sa mga Saksi sa pagduaw sa iyang minyong anak babaye ug sa iyang bana ug usab sa iyang iyaan ug iyang anak babaye. Kadto gihimo ug nahikay ang mga pagtuon sa Bibliya uban sa duha ka pamilya.

Tapos ang usa ka tuig nga pagtuon sa Bibliya, kining tawhana, iyang asawa, ug duha ka tin-edyer nga anak babaye mihangyo nga magpabawtismo ingong simbolo sa ilang pagpahinungod kang Jehova. Niadto lamang nahibaloan nga ang maong tawo maoy Metodistang ministro. Apan tapos sa duha ka bulan nga pagtuon sa Bibliya uban sa mga Saksi, siya ug iyang pamilya mibulag sa iglesya. Nahibaloan usab nga sa panahon sa unang pagduaw, ang asawa nagplano sa paghikog ug nag-ampo sa Diyos nga atimanon ang iyang pamilya tapos niadto.

Gikan niadtong unang pagduaw, napulo ka tawo ang midawat sa kamatuoran. Ang lalaki karon usa ka ansiano, ang usa sa iyang mga anak babaye maoy payunir, ug ang iyang umagad nga lalaki maoy ministeryal nga alagad.

Dayag nga ang ministeryo sa maong duha ka Saksi gitultolan sa manulonda. Karon kining napulo ka tawo nga natabangan sa pagbatog kahibalo sa kamatuoran ngatanan malipayong nagaalagad kang Jehova, nga nahigawas na sa mga gapos sa bakak nga relihiyon.