Mga Pangutana Gikan sa mga Magbabasa

◼ Kon bation sa Kristohanon nga adunay usa sa kongregasyon nga dili labing maayong ikauban tungod sa batasan ug sa tinamdan nianang tawhana, siya ba makahimo sa kinaugalingon sa ‘pagtimaan’ nianang indibiduwala sumala sa 2 Tesalonica 3:14, 15?

Kadtong mahimong bahin sa Kristohanong kongregasyon makahimo niini tungod kay ilang gimahal si Jehova ug sa matinuoron nagtinguha sa pagkinabuhi sumala sa iyang mga prinsipyo. Mas maayo pang makig-uban kanila kay sa kalibotanong mga tawo. Tingali mas komportable kitang makig-uban sa ubang mga Kristohanon, sama nga ‘labing gimahal’ ni Jesus si apostol Juan ug mas suod sa 3 sa 12. Apan, siya mipili, maikagon, ug gimahal silang tanan. (Juan 13:1, 23; 19:26; Marcos 5:37; 9:2; 14:33) Bisan tuod ang tanang mga igsoon adunay mga kahuyangon nga kinahanglang magpakita kitag pagkamasinabuton ug mapinasayloon, kita nasayod nga sa dakong bahin ang isigkamagtutuo maoy maayong mga kauban. (1 Pedro 4:8; Mateo 7:1-5) Ang gugma alang sa usag usa maoy usa sa timaan sa Kristohanong kongregasyon.—Juan 13:34, 35; Colosas 3:14.

Apan, usahay, adunay usa nga may tinamdan o paagi sa kinabuhi nga kita sa personal dili makauyon. Si apostol Pablo misulat bahin sa personal nga mga panglantaw sa pipila diha sa Corinto bahin sa pagkabanhaw nga dili tukma ug tingali adunay ‘kumaon ug uminom ug paglipaylipay’ nga tinamdan. Ang hamtong nga mga Kristohanon sa kongregasyon kinahanglang magmainampingon bahin kanila, kay si Pablo mitambag: “Ayaw pagpahisalaag. Ang daotang panag-uban makadaot sa mapuslanong pamatasan.”—1 Corinto 15:12, 32, 33.

Kining tambag alang sa tanan balido gihapon karon. Pananglitan, tingali makita sa Kristohanong magtiayon nga ang ilang anak naapektohan ug dako kon makig-uban sila sa pipila ka batan-on, kinsa dili pa kaayo seryoso sa pagdawat sa kamatuoran o kaha kalibotanon ug hunahuna. Tingali kining mga bataa nagkinahanglan pag diyosnong pagbansay. Apan hangtod nga adunay pamatuod niana, tingali dumilian sa magtiayon ang ilang anak sa pakigdula kanila o sa pagbisita niadtong mga batan-ona. Dili kini ‘pagtimaan’ sama sa gipadayag diha sa 2 Tesalonica kapitulo 3. Ang mga ginikanan sa yano nagapadapat lamang sa tambag ni Pablo sa paglikay sa “daotang panag-uban.”

Ang mga situwasyon nga nagkinahanglan sa ‘pagtimaan’ mas seryoso kay sa pananglitan nga gihatag sa ibabaw may kalabotan sa kabataan. Usahay adunay tawo diha sa kongregasyon nga magpadayon sa dili-kasulatanhong dalan nga makatugaw kaayo, apan dili pa kini takos nga aksiyonan nga ipalagpot sumala sa gihisgotan diha sa 1 Corinto 5:11-13. Kining batasana nahitabo sa kongregasyon sa karaang Tesalonica, busa si Pablo misulat: “Nakabalita kami nga adunay pipila kaninyo nga badlongon, nga walay ginahimo kondili sa pagpanghilabot sa uban.”—2 Tesalonica 3:11.

Unsay gibuhat sa mga Kristohanon sa Tesalonica? Si Pablo misulat: “Kami naghatag kaninyog mga sugo, mga igsoon, sa ngalan ni Ginoong Jesu-Kristo, sa pagpalayo gikan sa igsoong badlongon ug dili sumala sa pagtulon-an nga inyong nadawat gikan kanamo. Kay kamo, mga igsoon, ayaw pagkataka sa pagbuhat ug maayo. Apan kon adunay magadumili sa pagtuman sa among ginatugon niining sulata, timan-i ninyo kanang tawhana, ug hunong na sa pakig-uban kaniya, aron siya mobatig kaulaw. Apan ayaw siya isipang usa ka kaaway, kondili tambagi ninyo siya ingon sa igsoon.”—2 Tesalonica 3:6, 13-15.

Busa, bisag wala nganli ang tapolang mga hilabtanon, giladlad ni Pablo ngadto sa kongregasyon ang ilang makuyawng dalan. Ang tanang Kristohanong nakaila sa badlongon makatagad kanila ingong “tiniman-an.” Ang tambag, “timan-i kini siya,” migamit ug Gregong pulong nga nagkahulogang “pagbutang ug karatula,” nga mao, ‘pagpakitag linaing pagtagad sa usa ka tawo.’ (New World Translation Reference Bible, potnot) Si Pablo miingon, “Hunong na sa pakig-uban” sa tiniman-an “aron siya mobatig kaulaw.” Dili bug-os nga isalikway siya sa mga igsoon, kay si Pablo mitambag kanila sa “pagtambag kaniya ingong igsoon.” Apan ang ilang kinutohan nga pagpakig-uban kaniya, tingali mopabati kaniyag kaulaw ug makapukaw kaniya sa panginahanglan sa pagsunod sa mga prinsipyo sa Bibliya. Sa samang higayon ang mga igsoong lalaki ug babaye mapanalipdan gikan sa iyang dili maayong impluwensiya.—2 Timoteo 2:20, 21.

Ang Kristohanong kongregasyon karon nagpadapat usab niining tambaga.a Ang The Watchtower sa Pebrero 1, 1982, panid 31, nagpasiugda nga ang pagtimaan dili ipakita sa mga kinaugalingong mga opinyon lamang o kon ang Kristohanon sa kinaugalingon mopili sa paglikay sa pakigsuod sa usa ka tawo. Sumala sa gipakita sa kahimtang sa Tesalonica, ang pagtimaan naglangkit ug seryosong mga kalapasan sa mga prinsipyo sa Bibliya. Kinahanglang maningkamot una ang mga ansiano sa pagtabang kanunay sa mga maglalapas pinaagi sa pagtambag kaniya. Kon magpadayon ang problema, sila makahimo nga walay pagngalan sa tawo, sa paghatag ug pagsidaan pinaagig pakigpulong diha sa kongregasyon bahin sa dili maayong batasan, sama sa pagpasidaan ni Pablo sa mga taga Tesalonica. Human niana, ang tagsatagsa ka Kristohanon makahimo sa “pagtimaan” sa nakasalang tawo.

Ang maayong paghukom ang gikinahanglan inay kay sa giplanong daang mga lagda mahitungod sa tanang bahin sa pagtimaan. Wala mohatag si Pablo ug detalyadong mga lagda bahin nianang problemaha sa Tesalonica sama sa pagbanabana kon unsa ka dugaya timan-an ang tawong modumili sa pagtrabaho. Maingon man, ang mga ansiano kanunayng makig-uban sa panon ug makagamit sa pagkatimbang ug pagkamasinabuton sa pagtino kon ang partikular nga situwasyon may igong ka seryoso ug makatugaw nga magkinahanglag pakigpulong sa pagpasidaan sa kongregasyon.b

Ang usa ka katuyoan sa pagtimaan mao ang pagpalihok sa badlongong Kristohanon nga mobatig kaulaw ug mohunong sa iyang dili-kasulatanhong dalan. Ang mga indibiduwal nga magtimaan kaniya, ilabina ang mga ansiano magpadayon sa pagdasig kaniya ug panid-an ang iyang tinamdan sa ilang makita siya diha sa mga tigom ug sa kanataran sa pag-alagad. Kon ilang makita nga ang problema ug ang tinamdam nga maoy hinungdan sa pagtimaan nausab sa maayo, makahunong sila sa ilang paglimiti sa pakig-uban kaniya.

Busa, ang pagtimaan kinahanglang dili pakasaypon uban sa personal o pamilyahanong pagpadapat sa tambag sa Diyos sa paglikay sa daotang panag-uban. Samtang dili kanunay nga gikinahanglan ang pagtimaan, kinahanglang matin-aw nga ang pagtimaan maoy Kasulatanhong lakang nga himoon kon kini gikinahanglan, nga maoy gibuhat sa atong mga igsoon sa Tesalonica.

[Mga footnote]