Mga Pangutana Gikan sa mga Magbabasa

Kinsay mohimo sa giingon sa 2 Tesalonica 3:14 nga ‘pagtimaan’ o pagmarka? Ang mga ansiyano ba, o ang matag Kristohanon?

Si apostol Pablo misulat ngadto sa mga Kristohanon sa Tesalonica: “Kon naay dili mosunod sa among giingon niining sulata, timan-i [o, markahi] ninyo siya.” (2 Tes. 3:14) Kaniadto miingon ta nga kini maoy direksiyon para sa mga ansiyano. Kon naay igsoon nga padayong magbalewala sa mga prinsipyo sa Bibliya bisag kadaghan na siyang gitambagan, ang mga ansiyano puwedeng modesisyon nga maghatag ug pakigpulong nga magpasidaan sa kongregasyon. Human niana, limitahan sa mga igsoon ang pagpakig-uban kaniya; makig-uban lang sila niya diha sa espirituwal nga mga kalihokan.

Pero naay kinahanglang himoon nga kausaban. Ang tambag ni Pablo klarong nagtumong sa aksiyon nga angayng himoon sa matag Kristohanon ubos sa pipila ka kahimtang. Maong ang mga ansiyano dili na kinahanglang mohatag ug pakigpulong ingong pasidaan sa kongregasyon. Unsay rason niini nga kausaban? Konsiderahon nato ang konteksto sa tambag ni Pablo.

Si Pablo miingon nga ang pipila diha sa kongregasyon mga “badlonganon.” Ilang gibalewala ang tambag nga gibase sa Pulong sa Diyos. Sa miagi niyang duaw, siya nagtambag: “Kon naay dili gustong magtrabaho, ayaw siyag pakan-a.” Pero ang pipila dili gihapon gustong motrabaho aron suportahan ang ilang kaugalingon bisag makahimo ra unta sila. Gawas pa niana, hilabtanon pod sila sa kinabuhi sa uban. Unsay angayng pagtratar sa mga Kristohanon sa maong mga badlonganon?—2 Tes. 3:​6, 10-12.

“Timan-i ninyo siya,” miingon si Pablo. Ang Gregong pulong nga gigamit dinhi naay ideya nga timan-an ang maong tawo aron makalikay sa iyang dili maayong impluwensiya. Gihatag ni Pablo kini nga direksiyon para sa tibuok kongregasyon, dili lang sa mga ansiyano. (2 Tes. 1:1; 3:6) Busa ang matag Kristohanon nga tingali makamatikod sa usa ka igsoon nga wala magsunod sa mga Kasulatanhong tambag puwedeng modesisyon nga ‘dili na makig-uban’ sa maong badlonganon.

Nagpasabot ba ni nga trataron nato ang maong tawo nga sama siyag gitangtang gikan sa kongregasyon? Wala, kay si Pablo miingon: “Padayon siyang tambagi ingong igsoon.” Busa ang matag Kristohanon puwede gihapong makig-uban sa gimarkahan nga igsoon panahon sa tigom ug sa ministeryo, pero dili sila makig-uban niya panahon sa mga tapoktapok o lingawlingaw. Ngano? “Aron maulaw siya,” miingon si Pablo. Ingong resulta sa maong pagmarka, ang badlonganon nga Kristohanon basin maulaw sa iyang binuhatan ug magbag-o.—2 Tes. 3:​14, 15.

Sa unsang paagi mapadapat sa mga Kristohanon karon kini nga tambag? Una, angay natong seguroon nga ang binuhatan sa maong igsoon mohaom sa giingon ni Pablo nga “badlonganon.” Wala siya magtumong sa mga igsoon nga lahi natog panglantaw o desisyon kon bahin sa mga butang nga personal o mga butang nga magdepende sa konsensiya. Wala pod siya magtumong niadtong nakapahiubos nato. Hinuon, ang gipasabot ni Pablo mao kadtong tinuyong misupak sa klarong mga tambag sa Diyos.

Karon, kon mamatikdan nato nga ang usa ka Kristohanon masinupakon sa Kasulatanhong tambag,a modesisyon ta nga dili makig-uban niya sa mga tapoktapok o lingawlingaw. Kay personal man ni nga desisyon, dili nato ni hisgotan sa mga igsoon nga dili membro sa atong pamilya. Ug makig-uban gihapon ta niya sa mga tigom ug ministeryo. Kon mag-usab na siya sa iyang binuhatan, puwede na natong ibalik ang atong normal nga pagpakig-uban niya.