Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • w99 7/15 p. 29-31
  • Mga Pangutana Gikan sa mga Magbabasa

Walay video nga available.

Sorry, dunay problema sa pag-load sa video

  • Mga Pangutana Gikan sa mga Magbabasa
  • Ang Bantayanang Torre Nagapahayag sa Gingharian ni Jehova—1999
  • Susamang Materyal
  • Mga Pangutana Gikan sa mga Magbabasa
    Ang Bantayanang Torre Nagapahayag sa Gingharian ni Jehova (Tun-anan)—2024
  • Mga Pangutana Gikan sa mga Magbabasa
    Ang Bantayanang Torre Nagapahayag sa Gingharian ni Jehova—1985
  • Tesalonica, Mga Sulat Ngadto sa mga Taga-
    Pagtugkad sa Kasulatan, Tomo 2
  • “Ayaw Paghunong sa Pagbuhat ug Matarong”
    Ang Bantayanang Torre Nagapahayag sa Gingharian ni Jehova—1991
Uban Pa
Ang Bantayanang Torre Nagapahayag sa Gingharian ni Jehova—1999
w99 7/15 p. 29-31

Mga Pangutana Gikan sa mga Magbabasa

Ang ‘pagtimaan’ ba nga gihisgotan sa 2 Tesalonica 3:14 usa ka pormal nga pamaagi sa kongregasyon, o usa kini ka butang nga himoon sa tagsatagsa ka Kristohanon sa paglikay sa mga magubtanon?

Ang gisulat ni apostol Pablo sa mga taga-Tesalonica nagpakita nga ang mga ansiyano sa kongregasyon dunay espesipikong papel sa maong ‘pagtimaan.’ Bisan pa niana, ang tagsatagsa ka Kristohanon human niana mosunod, nga maghimo niana uban ang espirituwal nga mga tumong diha sa hunahuna. Labi natong maapresyar kini pinaagi sa pagkonsiderar sa tambag ni Pablo sa orihinal nga nahitaboan niini.

Si Pablo mitabang sa pagtukod sa kongregasyon sa Tesalonica, nga nag-abag sa mga lalaki ug mga babaye nga mahimong mga magtutuo. (Buhat 17:1-4) Sa ulahi misulat siya gikan sa Corinto sa pagdayeg ug pagdasig kanila. Si Pablo mitanyag usab ug gikinahanglang tambag. Giawhag niya sila nga ‘magkinabuhing malinawon, magatagad sa ilang kaugalingong kalihokan, ug magabuhat pinaagi sa ilang mga kamot.’ Ang uban wala maglihok nianang paagiha, busa midugang si Pablo: “Kami maawhagong nagatambag kaninyo, mga igsoon, pahimangnoi ang badlonganon, pamulong nga mahupayon sa magul-anong mga kalag, buligi ang mga maluya.” Tataw, dihay mga “badlonganon”a taliwala kanila nga nagkinahanglag tambag.​—1 Tesalonica 1:2-10; 4:11; 5:14.

Pipila ka bulan sa ulahi, si Pablo misulat sa iyang ikaduhang sulat ngadto sa mga taga-Tesalonica, uban ang dugang mga komento bahin sa umaabot nga presensiya ni Jesus. Si Pablo naghatag usab ug dugang giya kon unsaon pagdumala sa mga badlonganon nga ‘wala managtrabaho apan nagapanginlabot sa butang nga wala silay labot.’ Ang ilang mga lihok kasukwahi sa panig-ingnan ni Pablo ingong makugihong trabahador ug sa iyang tatawng sugo bahin sa pagtrabaho aron sa pagsuportar sa kaugalingon. (2 Tesalonica 3:7-12) Si Pablo nagsugo nga himoon ang pipila ka lakang. Kining maong mga lakang gihimo human ang mga ansiyano nakapahimangno o nakatambag sa mga badlonganon. Si Pablo misulat:

“Karon kami magahatag kaninyog mga sugo, mga igsoon, . . . nga magpahilayo gikan sa tanang igsoon nga nagalakawng badlonganon ug dili sumala sa tradisyon nga inyong nadawat gikan kanamo. Sa inyong bahin, mga igsoon, ayaw pag-undang sa pagbuhat sa husto. Apan kon adunay dili masinugtanon sa among pulong pinaagi niining sulata, timan-i kini siya, hunong sa pagpakig-uban kaniya, aron siya maulaw. Ug bisan pa ayaw siya pag-isipa nga kaaway, apan padayon sa pagpahimangno kaniya ingong igsoon.”​—2 Tesalonica 3:6, 13-15.

Busa ang dugang mga lakang naglakip sa pagpahilayo gikan sa mga badlonganon, nga magtimaan kanila, nga dili na makig-uban kanila, apan magpahimangno kanila ingong mga igsoon. Sa unsang mga sirkumstansiya nga ang mga membro sa kongregasyon maghimo sa maong mga lakang? Ingong tabang sa pagpatin-aw niini, atong ilhon ang tulo ka kahimtang nga wala ipunting ni Pablo dinhi.

1. Kita nahibalo nga ang mga Kristohanon dili hingpit ug dunay mga kasaypanan. Sa gihapon, ang gugma maoy timaan sa matuod nga Kristiyanidad, nga nag-awhag kanato nga magmasinaboton ug magmapinasayloon sa mga sayop sa uban. Pananglitan, ang usa ka Kristohanon duna tingali panagsang pagsilaob sa kasuko, sama sa nahitabo tali kang Bernabe ug Pablo. (Buhat 15:36-40) O tungod sa kakapoy, ang usa makasulti tingalig mapintas ug masakit nga mga pulong. Nianang mga kahimtanga, pinaagi sa pagpasundayag ug gugma ug pagpadapat sa tambag sa Bibliya, atong matabonan ang sala, nga magpadayon sa pagkinabuhi, pagpakig-uban, ug pagtrabaho uban sa atong kaubang Kristohanon. (Mateo 5:23-​25; 6:14; 7:1-5; 1 Pedro 4:8) Tataw, ang kasaypanan nga ingon niini dili mao ang gihisgotan ni Pablo sa 2 Tesalonica.

2. Si Pablo wala magtumong sa usa ka kahimtang diin ang usa ka Kristohanon sa personal mopili sa paglimite sa pagpakig-uban sa lain kansang mga dalan o mga tinamdan dili maayo​—pananglitan, usa nga morag hinobrang nalinga sa lulinghayaw o materyal nga mga butang. O ang usa ka ginikanan maglimite tingali sa pagpakig-uban sa iyang anak sa mga batan-on nga walay pagtagad sa awtoridad sa ginikanan, modula sa mabangis o peligrosong paagi, o wala mag-isip nga ugdang sa Kristiyanidad. Ang ingon mao lamay personal nga mga desisyon nga nahiuyon sa atong mabasa sa Proverbio 13:20: “Siya nga nagalakat uban sa mga manggialamon mahimong manggialamon, apan siya nga dunay pakiglabot sa mga buangbuang dili maayo ang dangatan.”​—Itandi ang 1 Corinto 15:33.

3. Sa lahi kaayo nga sukod sa kaseryoso, si Pablo misulat ngadto sa mga Kristohanon bahin sa usa nga nagbatasan sa grabeng sala ug dili mahinulsolon. Ang maong dili mahinulsolong mga makasasala kinahanglang palagpoton gikan sa kongregasyon. Ang “daotan” nga tawo kinahanglang itugyan ngadto kang Satanas, ingnon ta. Human niana, ang maunongong mga Kristohanon dili angayng makig-uban sa maong mga daotan; si apostol Juan nag-awhag sa mga Kristohanon nga dili gani motimbaya kanila. (1 Corinto 5:1-13; 2 Juan 9-11) Apan, kini dili usab haom sa tambag sa 2 Tesalonica 3:14.

Lahi sa tulo ka kahimtang nga nahisgotan na mao kanang naglangkit sa mga “badlonganon” sumala sa gihisgotan sa 2 Tesalonica. Si Pablo misulat nga kini sila sa gihapon ‘mga igsoon,’ nga pahimangnoan ug tagdon nga ingon. Busa, ang suliran sa “badlonganon” nga mga igsoon dili usa ka personal nga butang lamang tali sa mga Kristohanon ni may igong kaugdang nga ang mga ansiyano sa kongregasyon kinahanglang mosalga pinaagi sa pagpalagpot, sumala sa gibuhat ni Pablo maylabot sa imoral nga kahimtang sa Corinto. Ang mga “badlonganon” dili sad-an sa grabeng sala, sama sa tawo nga gipalagpot sa Corinto.

Ang mga “badlonganon” sa Tesalonica sad-an sa dayag nga pagtipas gikan sa Kristiyanidad. Dili sila motrabaho, kaha tungod kay sila naghunahuna nga haduol na ang pagbalik ni Kristo o tungod kay sila tapolan. Dugang pa, sila nagpahinabog dakong kagubot pinaagi sa ‘pagpanginlabot sa butang nga wala silay labot.’ Lagmit ang mga ansiyano sa kongregasyon sublisubling nagtambag kanila, sumala sa tambag ni Pablo sa iyang unang sulat ug uban sa laing tambag gikan sa Diyos. (Proverbio 6:6-​11; 10:4, 5; 12:11, 24; 24:30-​34) Sa gihapon nagpadayon sila sa usa ka kurso nga nagpakaulaw sa kongregasyon ug mahimong mokuyanap sa ubang mga Kristohanon. Busa ang Kristohanong ansiyano nga si Pablo, nga wala magngalan ug mga tawo, publikong nagdani sa pagtagad sa ilang pagkabadlonganon, nga nagyagyag sa ilang sayop nga dalan.

Gipahibalo usab niya ang kongregasyon nga haom alang kanila ingong indibiduwal nga mga Kristohanon nga ‘timan-an’ ang mga badlonganon. Nagpasabot kini nga ang tagsatagsa magtimaan niadtong kansang mga lihok katumbas sa dalan nga bahin niana ang kongregasyon gipasidan-an sa publiko. Si Pablo nagtambag nga sila “magpahilayo gikan sa tanang igsoon nga nagalakawng badlonganon.” Kana tinong wala magpasabot ug bug-os nga pagsalikway sa maong tawo, kay sila kinahanglang ‘magpadayon sa pagpahimangno kaniya ingong igsoon.’ Sila magpadayon sa pagpakigkita kanila isip Kristohanon diha sa mga tigom ug tingali diha sa ministeryo. Sila makalaom nga ang ilang igsoon mosanong sa tambag ug mobiya sa iyang makapatugaw nga mga dalan.

Sa unsang diwa nga sila “magpahilayo” gikan kaniya? Dayag, kini maoy sa pagpakighugoyhugoy. (Itandi ang Galacia 2:12.) Ang ilang paghunong sa pagpakighugoyhugoy ug paglulinghayaw uban kaniya magpakita tingali kaniya nga ang de-prinsipyong mga tawo wala makaangay sa iyang mga dalan. Bisan pag dili siya maulaw ug dili magbag-o, labing menos ang uban lagmit nga dili makakat-on sa iyang mga dalan ug mahimong sama kaniya. Sa samang higayon, kining tagsatagsa ka Kristohanon kinahanglang magtumong sa pagtagad diha sa makapalig-ong mga butang. Gitambagan sila ni Pablo: “Sa inyong bahin, mga igsoon, ayaw pag-undang sa pagbuhat sa husto.”​—2 Tesalonica 3:13.

Tataw, kining tambag sa apostol dili pasikaranan sa pagtamay o paghukom sa atong mga igsoon kinsa nakahimog ginagmayng sipyat o kasaypanan. Hinunoa, ang tumong niini mao ang pagtabang sa usa nga nagasubay sa makapatugawng dalan nga dayag nga kasukwahi sa Kristiyanidad.

Si Pablo wala maghatag ug detalyadong mga lagda nga daw nagsulay sa pagpatungha ug komplikadong pamaagi. Apan tin-aw nga ang mga ansiyano kinahanglang motambag una ug maningkamot sa pagtabang sa tawong badlonganon. Kon dili sila molampos ug ang maong tawo magpadayon sa paagi nga makapatugaw ug dunay kalaoman nga mokuyanap, sila makahinapos tingali nga ang kongregasyon kinahanglang pasidan-an. Makahikay sila sa usa ka pakigpulong kon sa unsang paagi pagalikayan ang pagkabadlonganon. Dili sila maghisgot ug mga ngalan, apan ang ilang pasidaan nga pakigpulong motabang sa pagpanalipod sa kongregasyon tungod kay ang mga tawong mosanong mag-amping pag-ayo nga limitehan ang pagpakighugoyhugoy uban kang bisan kinsa nga tatawng nagpakita ug pagkabadlonganon.

Hinaot, ngadtongadto ang badlonganon maulaw sa iyang mga dalan ug matukmod sa pagbag-o. Samtang makita sa mga ansiyano ug sa uban diha sa kongregasyon ang pagbag-o, sila sa indibiduwal makahukom nga dili na limitehan ang personal nga pagpakighugoyhugoy kaniya.

Nan, sa pagsumaryo: Ang mga ansiyano sa kongregasyon manguna sa pagtanyag ug tabang ug tambag kon dunay maglakawng badlonganon. Kon dili niya makita ang pagkasayop sa iyang dalan apan magpadayon sa pagkahimong dili-maayong impluwensiya, ang mga ansiyano magpasidaan tingali sa kongregasyon pinaagi sa usa ka pakigpulong nga nagpatin-aw sa panglantaw sa Bibliya​—bahin kaha sa pagpakigdeyt sa mga dili-magtutuo, o sa bisan unsang dili-hustong dalan. (1 Corinto 7:39; 2 Corinto 6:14) Ang mga Kristohanon sa kongregasyon nga sa ingon gipasidan-an sa tagsatagsa makahukom sa paglimite sa bisan unsang pagpakighugoyhugoy sa mga tawo nga tatawng nagasunod sa dalan sa pagkabadlonganon apan mga igsoon gihapon.

[Footnote]

a Ang Gregong pulong gigamit maylabot sa mga sundalo nga wala motuman sa kahikayan o mosunod sa disiplina, maingon man sa ligoy nga mga estudyante, kadtong mipalta sa ilang mga klase sa tunghaan.

[Mga hulagway sa panid 31]

Ang Kristohanong mga ansiyano magpahimangno sa mga badlonganon apan maglantaw gihapon kanila ingong mga isigkamagtutuo

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa