Kinabuhi ug Ministeryo ni Jesus

Daghang Samarianhon Nanagpanuo

SA NAMAULI gikan sa Sicar nga nagdalag pagkaon, nakita sa mga disipulo si Jesus sa atabay ni Jacob sa ilang gibiyaan siya. Apan karon nakigsulti siya sa usa ka babayeng Samarianhon. Sa miabot ang mga disipulo milakaw ang babaye, gibiyaan ang iyang banga, ug miadto sa siyudad.

Naikag kaayo sa mga butang nga gisulti kaniya ni Jesus, siya miingon sa mga tawo sa siyudad: “Umari kamo, tan-awa ninyo ang usa ka tawo nga mitug-an kanako sa tanan kong nabuhat.” Dayon, aron mapukaw ang kaikag, siya nangutana: “Mao ba kaha kini ang Kristo?” Napukaw ang kaikag ning pangutanaha​—ang mga tawo nangadto sa pagtan-aw sa ilang kaugalingon.

Kasamtangan, giagda sa mga disipulo si Jesus sa pagkaon sa kalan-ong ilang gidala gikan sa siyudad. Apan siya mitubag: “Ako adunay kalan-on nga wala ninyo mahibaloi.”

“Walay nakahatod kaniyag pagkaon, di ba?” nangutana ang mga disipulo sa usag usa. Si Jesus miingon: ‘Ang akong pagkaon mao ang pagbuhat sa kabubut-on sa nagpadala kanako ug sa pagtapos sa iyang buluhaton. Dili ba magaingon man kamo, upat pa ka bulan ug unya mao na ang ting-ani?’ Nagpunting sa espirituwal nga pag-ani, si Jesus miingon: ‘Ang mag-aani magadawat ug suhol ug magahipos ug bunga sa kinabuhing walay kataposan.’

Hayan nalantaw nang daan ni Jesus ang dakong epekto sa pagsangyaw sa babayeng Samarianhon​—nga daghan ang mituo kaniya tungod sa iyang pagpamatuod. Sa giduol si Jesus sa mga tawo sa Sicar sa atabay, ilang gihangyo siya sa pagpabilin ug sa pagpakigsulti pa kanilag dugang. Gidawat ni Jesus ang imbitasyon ug nagpabilin sa duha ka adlaw.

Sa namati ang mga Samarianhon kang Jesus, daghan ang nanagpanuo. Dayon miingon sila sa babaye: “Kami mituo na karon dili tungod sa imong gisulti; kay kami na gayod mismo mao ang nakadungog kaniya ug among naila nga siya sa pagkatinuod mao ang manluluwas sa kalibotan.” Siempre ang babayeng Samarianhon nahimong maayong panig-ingnan sa atong pagpamatuod bahin kang Kristo pinaagi sa pagpukaw sa interes aron ang mga mamiminaw motuki pag dugang!

Hinumdomi nga upat pa ka bulan sa dili pa ang ting-ani​—hayan ting-ani sa sebada, diin sa Palestina mahitabo kini sa tingpamulak. Karon tingali mga Nobyembre o Disyembre. Nagkahulogan kini nga tapos sa Paskua sa 30 K.P. si Jesus ug ang iyang mga disipulo miestar ug walo ka bulan o kapin pa sa Judea nga nagapanudlo ug nagapamawtismo. Migikan na sila karon sa ilang lumad nga teritoryo sa Galilea. Unsay naghulat kanila didto? Juan 4:27-42.

◆ Unsang pagpamatuod ang gihimo sa babayeng Samarianhon ug unsay resulta?

◆ Sa unsang paagi nalangkit ang pagkaon ni Jesus sa pag-ani?

◆ Sa unsang paagi atong matino ang sukod sa ministeryo ni Jesus sa Judea tapos sa Paskua sa 30 K.P.?

[Bug-os panid nga Letrato sa panid 25]