Sa Unsang Paagi Kita “Bug-os Kahimut-an” ni Jehova?

KARON pagkadiyutay ang nabalaka kon ang ilang mga hunahuna, mga pulong, ug buhat gikahimut-an ba ni Jehova! Bisan kadtong nag-angkong may kabalaka sa kinatibuk-an mopatim-aw nga nag-alagad sa Diyos sa baba lamang. Sa pagkatinuod, kini ang ikaingon alang sa kadaghanan: “Wala sila makapahimuot sa Diyos.”​—1 Tesalonica 2:15.

Ang ubang nag-angkong mga Kristohanon mibati basta dili lang sila makalapas sa Napulo ka Sugo, sila nakapahimuot na sa Diyos. Apan dili gayod! Ang atong Panig-ingnan si Jesu-Kristo miingon bahin sa Diyos: “Sa kanunay gibuhat ko ang mga butang nga makapahimuot kaniya.” (Juan 8:29) Oo, napahimut-an niya ang iyang Amahan pinaagi sa pagbuhat ug pila ka butang. Gikinahanglan ang positibong aksiyon, sumala sa makita sa pag-ampo ni apostol Pablo alang sa iyang isigkamagtutuo sa Colosas. Siya miampo nga unta sila “maglakaw nga takos kang Jehova nga sa bug-os kahimut-an niya samtang [sila] magmabungahon sa tanang mga maayong buhat.”​—Colosas 1:9, 10.

Apan, tinuod bang imposible nga mahimong “bug-os kahimut-an” ni Jehova? Buweno, tungod kay dili hingpit, ang mga Kristohanon karon dili gayod sa bug-os makapahimuot sa Diyos. Apan, sila sa kamatinud-anon makapangagpas nianang direksiyona, uban sa tumong nga “bug-os kahimut-an” niya. Sanglit naghisgot si Pablo nga “magmabungahon sa tanang mga maayong buhat,” nalangkit ang positibong mga buhat. Siyempre, dili nato ikagambalay dinhi ang tanang mga kalihokan. Apan makapakaon kita sa atong mga hunahuna ug butang nga palandongon. Kon nagpakita kining puntoha nga dunay pila ka luna sa kinabuhi nga kinahanglang imong bag-ohon, makasalig ka nga panalanginan ni Jehova ang imong mga paningkamot sa pagpahimuot kaniya. Ang kamatuoran mao nga aron “bug-os kahimut-an” ni Jehova kinahanglang atong bantayan gayod ang atong mga hunahuna, mga pulong, ug mga lihok.

Komusta ang Atong mga Hunahuna?

Ang Pulong sa Diyos nagsulti kanato nga “sa panan-aw sa Diyos walay butang nga natago, hinunoa ang tanang butang binuksan ug dayag sa mga mata niya kang kinsa magahatag ra unya kitag husay.” (Hebreohanon 4:13) Ang mga tawhanon ug mga demonyo dili makabasa sa atong mga hunahuna apan makabasa ang Diyos. Kon mao, tinguha nato nga ang atong mga hunahuna iyang kahimut-an. Busa maayong mangutana kita sa atong kaugalingon: Unsay akong gustong hunahunaon kon walay laing hunahunaon? Haing direksiyona, ingnon ta, gipunting sa kamot sa kompas ang akong hunahuna?

Mahimong mangutana kita: Gusto ba akong magpanghanduraw ug magdamgong ginatagamtam ang bahandi, kadungganan, o kadayegan tungod sa akong mga kahimoan? Negatibo ba ang akong hunahuna, sama sa paghambin sa nasilong buot, nagabalikbalik niini? May kiling ba ako sa paghunahuna kanunay sa seksuwal nga kalipayan? O gipuno ba nako kanunay ang akong hunahuna sa mga plano ug mga laraw sa pagpanapi?

Karon tagda: Kita ba sa “bug-os kahimut-an” ni Jehova kon atong pun-on ang atong mga hunahuna niining mga butanga? Siyempre dili gayod! Busa, pinaagi sa kinasingkasing nga pag-ampo ug sa tabang sa Diyos, palayasa kini sila pinaagi sa pagpuno sa hunahuna uban sa matarong, positibo, maayo, maputli, ug hiligugmaong mga hunahuna. (Filipos 4:8) Unsa ka maayo kon disiplinahon nato ang atong mga hunahuna aron matisok sa hunahuna ang mga butang nga nalangkit sa atong pagsimba kang Jehova! Hunahunaa ang Gingharian sa Diyos, nga haduol na. Hinumdomi ang mga punto nga bag-o pang nakat-onan gikan sa Pulong sa Diyos. Repasoha ang ulohang hilisgotan sa umaabot nga mga tigom sa kongregasyon, ug ilabina sa imong bahin sa programa. Palandonga kon unsaon nimo sa pagpauswag sa imong pag-alagad sa kanataran. Hinumdomi nga ikaw, una sa tanan, usa ka Kristohanong ministro.

Ang uban natabangan pinaagi sa pagrepaso sa mga tekso nga ilang nasag-ulo, maingon man sa paglaylay sa mga awit sa Gingharian. Ingong pahinumdom, nakita sa usa ka Kristohanong ministro nga makatabang ang pagsunod ug sa pagpalandong niining garaya:

“O Diyos ko palihog tabangi akong magpasakop,

Sa itugot sa imong gugma ug pagbuot.

O hinaot dili gayod ako mosupak,

Kay ang tanang butang maayo nimong pagkabuhat.”

Oo, padayon sa pag-ampo sama kang Haring David sa karaan: “Itugot . . . nga ang pagpalandong sa akong kasingkasing makalilipay”​—pagaingon pa, kahimut-anan​—“sa imong atubangan, O Jehova.”—Salmo 19:14.

Komusta ang Atong mga Pulong?

Si David miampo usab: “Itugot nga ang panultihon sa akong baba . . . mahimong kahimut-anan atubangan kanimo, O Jehova.” (Salmo 19:14) Sumala sa atong makat-onan sa Santiago 3:2-12, ang hingpit nga tawo lamang ang bug-os makapugong sa dila. Apan kinahanglang atong kontrolahon kana, kon kita buot nga “bug-os kahimut-an” ni Jehova.

Daghang pulong ang atong masulti sa matag adlaw, ug, siyempre, dili kita makalaom nga pulos Kasulatanhong mga ulohan lamang ang atong hisgotan. Apan, bisan unsa pay atong hisgotan, kinahanglang atong hunahunaon ang pagpahimuot kang Jehova. Pananglitan, kita nasayod nga ang pagpasipala, pagpamalikas, o mahilas o malaw-ayng mga pulong dili gayod makapahimuot sa atong langitnong Amahan. Busa kinahanglang atong likayan kining mga pulonga.​—Efeso 5:3, 4.

Dugang pa, kon buot kita nga kahimut-an sa atong Maglalalang sa bug-os may kalabotan sa atong sinultihan, kinahanglang mag-amping kita sa pagsultig pagbutangbutang, makadaot sa dungog nga mga butang bahin sa uban. Bahin kanato, posible ang pag-ingon: “Siya dili magbutangbutang uban sa iyang dila. Ni magabuhat ug kadaotan sa iyang kauban, ni magpasipala batok sa iyang suod nga higala.” Bisag antoson nato ang mga inhustisya, kinahanglang mag-amping kita sa dili “pagsultig mga butang nga makadaot kang bisan kinsa.”​—Salmo 15:3; Tito 3:2.

Unsang mga kahigayonan ang atong nabatonan aron “bug-os kahimut-an” ni Jehova kon bahin sa atong sinultihan sa panahon sa pangaon? Siyempre, dili kini panahon sa mapintas ug masakit nga mga pulong. Adunay daghang maayong mga butang nga hilisgotan! Ilabinang mag-amping kita niining mga higayona kon kita dinapit o may gidapit. Sa kasagaran ang tabian imbes ang hamtong nga mga Kristohanon ang mangibabaw sa panagsultihanay. May Kristohanong bisita ka ba nga adunay daghang tuig nga eksperyensiya sa bug-os panahong ministeryo? Daghan ba siyag kahibalo sa Pulong sa Diyos? Nan gamita ang kaalam sa pagpasulti kaniya. “Ang tambag diha sa kasingkasing sa tawo ingon sa halalom nga tubig, apan ang usa ka tawo nga may salabutan magatimba niini,” sa kaayohan sa tanang presente.​—Proverbio 20:5.

Dugang pa, aron “bug-os kahimut-an” ni Jehova ang atong panultihon, kinahanglang alisto kita sa mga higayon alang sa dili pormal nga pagsangyaw bahin sa ngalan ug Gingharian sa Diyos. Sa pagkatinuod, may mga panahon nga ang Kristohanong ministro daghag mahimo sa dili pormal nga pagsangyaw. Apan, ang pangunang paagi aron mapahimut-an si Jehova sa atong panultihon, samtang magapanalangin sa uban, mao ang pagpamalaybalay uban sa balita sa Gingharian.​—Buhat 20:20.

Aron ang atong mga pulong “bug-os kahimut-an” ni Jehova kon makigbahin kita sa Kristohanong pag-alagad sa kanataran, kinahanglang maningkamot kita sa pagpauswag sa atong presentasyon sa balita sa Gingharian. Sanglit gisaligan sa “maayong balita,” kita, sama kang apostol Pablo, nagatinguha sa “pagsulti, sa pagpahimuot, dili sa tawo, kondili sa Diyos, nga nagabadlong sa atong mga kasingkasing.” Ug angay dili hikalimtan mao ang obligasyon sa paggamit sa atong mga ngabil sa pagpahayag sa katilingban sa atong pagtuo diha sa Kristohanong mga tigom, diin atong madasig ang uban sa paghigugma ug sa maayong mga buhat.​—1 Tesalonica 2:4; Hebreohanon 10:23-25.

“Bug-os Pahimut-i” si Jehova Pinaagi sa Atong Batasan ug Buhat

Aron kita “bug-os kahimut-an” ni Jehova, kinahanglang mag-amping usab kita sa atong adlaw-adlawng batasan, lakip sa atong kalingawan. Oo, bisag mangita kitag kalingawan, dili gayod kita makahimo sa pagsalikway sa Diyos. Paghingapin ra ba kana? Dili, kay si Pablo miingon: “Bisan magakaon kamo ug magainom o magabuhat ug bisan unsa, buhata kana alang sa kahimayaan sa Diyos.” Kinahanglang atong ibutang sa hunahuna ang pasidaan nga “kadtong nagkinabuhi sumala sa unod dili makapahimuot sa Diyos.” Busa, labaw sa tanang butang, ang atong kalingawan kinahanglang makaayo.​—1 Corinto 10:31; Roma 8:8.

Dili usab nato hikalimtan ang bahin sa pagkakasarangan ug panempo. Aron “bug-os kahimut-an” ni Jehova, kinahanglang ibutang nato sa hustong lugar ang kalingawan, ingong usa ka butang nga lumalabay ug nga dili hinungdanon. Kinahanglang dili gayod kita mangagpas ug kalingawan, kon magtanaw ug espesyal nga programa sa TV o manan-awg mga dula, sa punto nga makabalda kini kay sa atong pagtambong sa Kristohanong mga tigom o sa pakigbahin sa regular sa pag-alagad sa kanataran.​—Mateo 6:33.

Nalakip usab aron “bug-os kahimut-an” ni Jehova ang pagbuhat ug maayo sa atong Kristohanong mga igsoon, kon kita makakitag higayon ug panginahanglan. Bahin niini, atong mabasa: “Ayaw paghikalimti ang pagbuhat ug maayo ug ang pagkamanggihatagon, kay ang maong mga halad makapahimuot sa Diyos.” Si apostol Pablo miingon nga ang kalulot nga gipakita diha kaniya sa mga Kristohanon sa Filipos maoy “madawat nga halad, nga makapahimuot sa Diyos.”​—Hebreohanon 13:16; Filipos 4:18.

Sa unsang paagi ang mga anak “bug-os kahimut-an” ni Jehova kon mahitungod sa ilang batasan? Si Pablo nagpakita nga ang hinungdanon kaayong paagi mao ang pagsunod sa ilang mga ginikanan “diha sa Ginoo.” Siya miingon usab: “Kamong mga anak, magmasinugtanon sa inyong mga ginikanan sa tanang butang, kay kini kahimut-anan sa Ginoo.”​—Efeso 6:1-3; Colosas 3:20.

Ang tanang dedikadong mga alagad sa Diyos nakaagi ug daghang mahigugmaong kalulot gikan kang Jehova ug sa iyang yutan-ong mga alagian nga, tungod sa dakong gugma ug pagtan-awg utang kabubut-on, angay nga mabalaka kita nga “bug-os kahimut-an” niya. Sa pagkatinuod, ang mahigugmaong pagtan-awg utang kabubut-on nagkinahanglan nga dili kita “modawat sa dili takos nga kalulot sa Diyos ug masayloan ang katuyoan niini.” (2 Corinto 6:1) Ang pagkabalaka sa pagpahimuot kang Jehova sa bug-os matarong usab, hustong butang nga buhaton, sanglit siya ang Soberano sa Uniberso. Dugang pa, ang pagpangagpas nga “bug-os kahimut-an” ni Jehova mao ang labing maalamong dalan, kay ang pagbuhat niini makaayo kanato karon ug may saad sa kinabuhi nga umaabot.​—1 Timoteo 4:8.

Oo, gusto natong panalipdan ang atong mga hunahuna, atong mga pulong, ug atong batasan ug mga buhat. Pinaagi sa tabang ni Jehova, mahimo nato kini aron sa pagpahimuot pa kaniya sa bug-os. Ug sa pagbuhat niini, dili kita mohunong. Apan, hinaot nga atong sundon kanunay ang tambag ni apostol Pablo sa mga Kristohanon sa Tesalonica: “Sa kataposan mga igsoon, kami nagahangyo ug nagapangamuyo kaninyo diha sa Ginoong Jesus, maingon nga kamo nagpakakat-on man gikan kanamo unsaon sa pagkinabuhi ug sa pagpahimuot sa Diyos, sumala sa inyong nang ginabuhat karon, nga unta magahimo niini sa bug-os pa gayod.”​—1 Tesalonica 4:1.

[Hulagway sa panid 23]

Ayaw itugot nga mabalda sa kalingawan ang Kristohanong buluhaton