Maghimo ug mga Tumong aron Paglig-on sa imong Pagtuo
1 Ang malig-on nga pagtuo kang Jehova gikinahanglan kon buot nato nga kahimut-an sa Diyos. (Heb. 11:6) Apan sama sa gisaysay ni Pablo, “ang pagtuo wala mabatoni sa tanang mga tawo.” Sanglit kay nasayod man kita nga kon walay pagtuo imposible ang pagpahimuot sa Diyos ug ang mga kinabuhi maoy napuhal, may maayong katarongan nga huptan nato ang malig-on nga pagtuo samtang ginaatubang nato “ang kataposan sa sistema sa mga butang.”—2 Tes. 3:2; Mat. 24:3, 36.
2 Unsa may makatabang nato nga magbaton ug lig-on nga pagtuo sa 1989 nga tuig sa pag-alagad? Ang teokratikong mga tumong makatabang. Kon ang makataronganon nga mga tumong ginahimo alang sa ministeryo sa kanataran ug ubang bahin sa kinabuhi, daghan ang mahimo alang sa atong kaayohan ug sa kahimayaan sa atong langitnong Amahan.
SA MINISTERYO UG SA PERSONAL NGA PAGTUON
3 Ang atong nahimo sa ministeryo nagkalainlain. Apan, ang idlot nga pag-alagad, bisan pa ug limitado, makapahimuot kang Jehova. (Lucas 21:1-4) Dugang pa, daghang mga paagi nga ang matag usa makagugol pa ug oras sa ministeryo sulod sa bag-ong tuig sa pag-alagad. Pananglitan, makahikay ka ba ug iskedyul aron makasulod nga auxiliary payunir ug usa ka bulan o kapin pa sa usa ka tuig? O mahikay ba nimo nga makasulod sa regular payunir nga buluhaton?
4 Ang lain pang importante nga tumong mao ang pagpahimulos pa sa atong personal nga pagtuon. Aron mahimo kini, imong mahikay nga mabasa ang tibuok Biblia sulod sa usa ka panahon. Imong magahin ang espesipiko nga oras matag semana alang sa personal nga pagtuon ug dayon huptan kanang maong iskedyul. Gamita sa kanataran ang imong makat-onan sa pag-alagad, hisgoti kana sa uban, o himoa ang personal nga pag-aplikar sa ubang mga paagi.
MGA BATAN-ON UG MGA GINIKANAN
5 Usa ka tumong nga angay palandongon sa uban mao ang paghatag ug epektibo nga pamatuod sa mga magtutudlo ug mga kaiskuwela. Bahin sa “School brochure, ang usa ka batan-ong Saksi miingon: “Mas napasayon alang kanamo nga makig-istorya sa mga magtutudlo ug mga kaiskuwela bahin sa among pagtuo.” Imo bang nasulayan kining maong paagi?
6 Kamong mga batan-on, himoa ninyong tumong nga dili maapektahan sa daotang panagkauban, droga ug imoralidad sa umalabot nga mga bulan! Gamita ang School brochure nga tabangan ka nga makalahutay sa mga pagsulay sa pagkamatinumanon nga imong maatubang sa tunghaan.
7 Ang paghimo ug mga tumong alang sa imong kaugalingon ug sa imong pamilya nagkinahanglan ug igong sakripisyo. Sanglit kay ang kalibotan “lumalabay lamang,” buot nimo nga maningkamot pa nga makabaton sa pag-uyon sa Diyos. (1 Juan 2:17) Busa samtang magalantaw ka sa 1989 nga tuig sa pag-alagad, magdeterminado ka nga huptan ang imong pagtuo ug ang sa imong pamilya nga malig-on. Paghimo ug mga tumong alang sa imong kaugalingon, ug paningkamoti nga makab-ot kana.