Hikaya ang Espirituwal nga mga Tumong

¹ Pagkadakong pribilehiyo ang pagdayeg kang Jehova hangtod sa kahangtoran! Aron matabangan kita sa pagkab-ot sa maong tumong, atong mahikay ang espirituwal nga mga tumong niini gayong panahona ug manlimbasog nga kab-oton kana. Kini magpaarang kanato sa paggamit sa atong mga kusog sa maalamong paagi. (1 Cor. 9:26) Unsang mga tumong ang arang nimong makab-ot?

² Pagtuon sa Bibliya: Nangandam ka ba alang sa matag tigom sa kongregasyon? Kon mao, naggahin ka ba ug panahon alang sa pagpanukiduki ug pagpamalandong sa dihang ikaw magtuon? Pananglitan, sa dihang mangandam alang sa senemanang Pagtuon sa Bantayanang Torre ug Pagtuon sa Libro sa Kongregasyon, badlisan mo ba lamang ang mga tubag o tan-awon mo ang gisitar nga mga teksto ug usab palandongon ang mga katarongan sa gihatag nga mga katin-awan? Mahimo mo bang imong tumong ang pagpanukiduki ug pipila ka punto matag semana gikan sa giasayn nga pagbasa sa Bibliya alang sa Teokratikanhong Tunghaan sa Ministeryo? Ang maong espirituwal nga pagpanukiduki nagkinahanglag panahon ug paningkamot, apan mopatungha kinig dagayang mga ganti.​—Prov. 2:​4, 5.

³ Mga Tigom sa Kongregasyon: Ang laing tumong mao ang regular nga pagtambong sa tanang lima ka tigom sa kongregasyon. Ang pag-abot nga may igong kasayo aron makapakig-uban sa mga isigkamagtutuo ug makaambit sa unang awit ug pag-ampo motabang sa pagpalig-on sa espiritu sa kongregasyon. Makapaningkamot usab kita sa pagkomento sa matag tigom ug manlimbasog sa pagpauswag sa atong mga komento. Hayan ikapakita mo kon sa unsang paagi nalangkit sa panaghisgot ang usa ka teksto diha sa parapo o ipasiugda kon sa unsang paagi mapadapat ang maong butang sa adlaw-adlaw nga pagkinabuhi.​—Heb. 10:​24, 25.

⁴ Pag-alagad sa Kanataran: Mouswag pa gayod ang atong ministeryo kon hikayon ta ang mga tumong. Aduna ka ba ing personal nga tumong sa oras nga giplanohan mong gugolon diha sa pag-alagad sa matag bulan? Nakaplagan kana sa pipila nga makatabang. O mapauswag mo ba ang pipila ka bahin sa imong ministeryo, sama sa paggamit sa Bibliya diha sa buluhatong pagpamalaybalay, sa paghimog mas makahuloganong mga balikduaw, sa pagpaningkamot nga makasugod ug pagtuon sa Bibliya, o sa mas epektibong pagpanudlo diha sa mga ginatun-an?

⁵ Mga ginikanan, gidasig ba ninyo ang inyong mga anak sa paghikay ug mga tumong diha sa pag-alagad kang Jehova? Tabangi sila sa pagsabot nga ang pag-alagad ingong payunir, misyonaryo, o membro sa pamilyang Bethel maoy maayo kaayong paagi sa pagpakita sa katim-os sa ilang pagpabili kang Jehova.​—Eccl. 12:1.

⁶ Samtang atong susihon ang atong mga kalihokan, hikaya ang espirituwal nga mga tumong, ug dayon manlimbasog sa pagkab-ot niana, atong makaplagan ang mas dakong kalipay diha sa atong pag-alagad ug mahimong tinubdan sa pagdasig ngadto sa uban.​—Roma 1:12.