Akong ‘Pagkupot sa Daro ug Dili Paglingi sa Likod’
SAMTANG misakay ako sa ayroplano paingon sa bag-o kong pinuy-anan sa Bolivia, ang mga pulong sa akong inahan nga gisulat sa kataposan niyang sulat nagbalikbalik sa akong hunahuna. “Walay tawo, nga nagakupot sa daro, ug nagalingi sa likod, ang takos sa gingharian sa Diyos.” (Lucas 9:62, King James Version) Determinado akong mopadapat nianang mga pulonga.
Bisan tuod ang buluhatong misyonaryo mao unyay bag-ong kasinatian, ako nakapahimulos na sa bug-os-panahong pag-alagad sulod sa mga lima ka tuig. Nakat-onan ko ang kamatuoran gikan sa akong mga ginikanan, kinsa misugod sa pagtuon sa 1923 uban sa mga Estudyante sa Bibliya, sumala sa pagtawag niadto sa mga Saksi ni Jehova. Bisan pag kuwatro anyos pa niadtong panahona, buot ko nang hisabtan ang mga basahon sa Watch Tower Society. Ugaling, sa daghang katuigan ang akong pamilya wala kaayoy gibuhat bahin sa kamatuoran. Ang pipila sa among mga silingan nga mga Estudyante sa Bibliya panalagsa moduaw kanamo. Akong mahinumdoman, usab, nga si Papa moduaw sa mga silingan aron sa pagpamati sa mga diskurso sa radyo ni Huwes Rutherford.
Apan, sa 1938 na lamang nga misugod sa pagbunga ang mga binhi sa kamatuoran. Ang akong inahan—nga niadto diborsiyada ug naminyo pag-usab—misugod sa pagdawat ug maikagong mibasa sa mga basahon gikan sa mga Saksi ni Jehova. Nalipay ako ilabina sa pagkahibalong ang “usa ka dakong panon” maluwas sa pagkalaglag niining presenteng sistema sa mga butang ug mabuhing walay kataposan sa yuta. (Pinadayag 7:9-14) Kining impormasyona kinahanglang ipakig-ambit sa uban!
Wala madugay tapos sa akong bawtismo sa Hunyo 1939, misugod ako paghunahuna sa pagkahimong bug-os-panahong ministro, o payunir. Sa akong pagbalhin ngadto sa Colorado, akong nakaila si Helen Nichols ug ang iyang inahan—duha ka dinihogang igsoong babaye nga regular nga payunir. Ang talagsaong mga kasinatiang ilang gisugid niadto kanako dugang midasig kanako sa pag-alagad ingong payunir. Busa, sa Mayo 1940 akong nadawat ang una kong payunir nga asaynment sa Salida, Colorado.
Pagbansay sa Gilead ug Langyawng Asaynment
Tapos sa pila ka tuig nga pagpayunir sa nagkalainlaing bahin sa Colorado ug sa Indiana, ako gidapit nga motungha sa ikatulong klase sa Gilead. Kini usa ka tunghaang giorganisar sa Watchtower Society sa pagbansayg mga misyonaryo. Sa lima ka talagsaong mga bulan gikalipayan ko ang mga panalangin sa Tunghaang Gilead, apan tapos makagraduwar ako wala dayon makadawat ug langyawng asaynment. Gibugno ang Gubat sa Kalibotan II! Busa ako temporaryong gipadala sa pagbuhat kauban sa pito ka ubang igsoong babaye sa West Haven, Connecticut. Sa 1945 ako giasayn sa pagtrabaho sa Washington, D.C. Bisan pa niana, sa wala madugay ang dalan wala nay babag sa pagpaingon sa akong langyawng asaynment: La Paz, Bolivia.
Sa wala pa ako makadawat sa akong asaynment, ako wala gayod makadungog sa Bolivia! Dili katingalahang ang mga hunahuna sa kabalaka miabot sa akong kaisipan samtang misakay kami sa ayroplano: Unsa kahay akong kahimtang ingong misyonaryo? Makapabilin kaha ako niana? Ang paghinumdom sa tambag sa akong inahan nga ‘mokupot sa daro ug dili molingi sa likod’ naglig-on sa akong hukom nga himoong malamposon ang akong misyonaryong buluhaton. Gawas pa, ako dili mag-inusara sa maong bag-ong nasod. Kuyog nako ang akong igsoong babaye ug bayaw nga lalaki nga migraduwar gikan sa ikaupat nga klase sa Gilead. Sa Hunyo 9, 1946, ang among ayroplano milandig sa La Paz.
Sa Tunga sa Rebolusyon
Sa adlaw mismo sa akong pag-abot, may misulay sa pagsugod sa rebolusyon pinaagi sa paghulog ug bomba diha sa Palasyo sa Gobyerno. Ang bomba napakyas, sama sa rebolusyon. Apan walay duha ka bulan sa ulahi, misilaob ang laing rebolusyon, ug daghan ang nabiling patay ug samdan. Ang presidente sa nasod, uban sa pipila niya ka ministro, gibitay gikan sa usa ka poste sa suga sa prinsipal nga plasa. Sa ingon ako gipailaila sa Bolivia.
Bisan pa niana, tapos niadtong makalilisang nga pag-ulag dugo, kami nakahimo sa ‘paglipay niadtong nagbalata,’ ug daghan sa mapaubsanong mga taga-Bolivia andam sa pagtuon sa Bibliya uban kanamo. (Isaias 61:1, 2) Niadtong mga adlawa, kanunay namong gamiton ang naplakang mga wali ingong paagi sa pagsangyaw sa katawhan. Kadto nagkahulogan sa pagdalag ponograpo ug bag sa libro sa pagtungas ug pagdulhog sa tag-as nga mga bukid sa La Paz sa makapautas-sa-gininhawang gihabogong 12,000 ka tiil (3,660 m). Tungod sa akong limitadong Kinatsila, ang pila ka tawo naghunahunang ako namaligyag ponograpo ug mga plaka!
Daghang kasinatian ang akong napahimuslan ingong misyonaryo. Usa ka adlaw, samtang namabalay-balay sa usa sa maarang-arang nga mga seksiyon sa La Paz, usa ka sulugoong babaye ang miabli sa pultahan ug mipadayon kanako. Ang ginang sa balay nagpatalinghog sa akong wali ug misuskribir sa Ang Bantayanang Torre. Nganong misanong dayon? Siya bag-o pang naoperahan, ug samtang didto sa klinika, siya nagbasa sa Bibliya. Iyang nasayrang ang mga doktrina sa Bibliya lahi sa gitudlo sa iyang simbahan, mao nga siya maikagong mobasa sa basahong akong gibilin kaniya. Sa wala pa ako makabalik sa pagduaw kaniya, hinunoa, siya ang nangita kanako, nga sa kataposan nakit-an ako sa usa ka eskina sa dalan nga nagtanyag sa mga magasing Bantayanang Torre ug Pagmata! ngadto sa lumalabay. ‘Palihog duawa ako!’ siya namugos. Kusog ang iyang pag-uswag sa iyang pagtuon sa Bibliya ug sa wala madugay nabawtismohan. Karon, 30 anyos sa ulahi, siya usa gihapon ka matinumanong alagad ni Jehova.
Usa ka Bulingit nga Monyeka
Tapos sa pagtrabahog 11 anyos sa La Paz, kami gihatagag asaynment sa habagatang bahin sa Bolivia. Busa, ang akong igsoong babaye ug iyang bana, ang akong kaubang si Esther Erickson, ug ako mipadulong sa usa ka gamayng lungsod nga ginganlag Tupiza. Kadto niadtong Pebrero 1957. Ang Tupiza nahimutang duol sa linya sa tren tali sa Bolivia ug Argentina. Ang katawhan didto mahigalaon, ug sayon ang pagsugod sa pagtuon sa Bibliya. Ngani, wala madugay nga naorganisar namo ang regular nga mga tigom, nga gitambongan sa ubay-ubay nga taga-Tupiza.
Usa ka adlaw, nakaplagan namo ang usa ka bulingit nga monyeka sa among tugkaran sa atubangan. Unsay kahulogan niadto? Lagmit ang pari misugod sa pagpasidaan sa katawhan batok sa mga Saksi ni Jehova, mao nga may misulay sa paghimog hechizo, o barang kanamo! Apan, ang ilang hechizo napamatud-ang walay gahom.
Tungod kay ang Tupiza gamay man kaayong lungsod, si Esther ug ako sa wala madugay gibalhin ngadto sa Villazón, laing gamayng lungsod sa utlanan sa Bolivia ug Argentina. Ang maong rehiyon maoy umaw, kusog ug hangin, ug tugnaw! apan kami wala maluya, kay masaligon kaming madawat namo ang panalangin ni Jehova.
Sa gisugdan ni Esther ug nako ang pagtrabaho sa lungsod, among namatikdang ang katawhan may mga tarheta sa ilang mga bentana nga nag-ingon: “Ang mga Saksi ni Jehova ug mga Ebanghelista Dili Dawaton.” Apan ang katawhan sa Villazón walay ideya kon kinsa ang mga Saksi ni Jehova! Sama didto sa Tupiza, ang usa ka pari nanghilabot, nga nanghatag ug mga tarheta sa simbahan aron itaod sa mga tawo sa ilang mga bentana. Bisan pa sa mga tarheta sa bentana, maayo ang sanong sa katawhan, ug daghang basahon ang among napahimutang ug nasugdan ang daghang pagtuon sa Bibliya. Sa inanay ang mga tarheta nangawala sa mga bentana.
Apan, diin namo himoon ang among mga tigom? Among gihimo ang usa ka kuwarto sa among gamay kaayong apartment nga Kingdom Hall. Alang sa mga lingkoran among gibutang ang mga kahoy tali sa mga karton sa mga libro. Wala pay bawtismadong mga igsoong lalaki didto, busa si Esther ug ako magbutang ug tabon sa among mga ulo ug magdumala sa mga tigom mismo. Sa among kalipay, sa unang Memoryal sa kamatayon ni Kristo nga among gihimo didto, kami may kapin sa usa ka gatos nga tumatambong! Tinuod, ang pipila nanganha tungod sa pagkamausisaon sa pagtan-aw sa unsang paagi dumalahon sa gringas (langyawng mga babaye) ang ilang mga tigom. Apan ang pipila niadtong unang nanganha tungod sa pagkamausisaon maoy mga Saksi karon.
Gitrabaho usab namo ang gamayng lungsod sa La Quiaca, Argentina, diin kami nakasugod ug ubay-ubayng pagtuon sa Bibliya uban sa mga tawong interesado. Tungod sa kanunay namong pagtabok sa utlanan, namatikdan kami sa polis sa utlanan. Usa ka adlaw, sa nagpauli kami gikan sa La Quiaca, ang polis mihangyo kanamo nga dili kami magbuhat nga dayag kaayo, sanglit ang buluhaton sa mga Saksi ni Jehova gidili man sa Argentina. Giingnan ko siya, “Nasabtan kong ang inyong gobyerno nagagarantiya sa kagawasan sa pagsimba.” Ang iyang tubag mao nga ang mga pari nag-impluwensiya sa mga ministro sa gobyerno, nga misangpot sa pagdili. Sa bisan unsang paagi, tapos niadto, siya motalikod matag panahong kami motabok sa utlanan paingon sa Argentina!
Sa upat ka tuig among gitrabaho ang Villazón. Ang akong kauban may pagtuon sa usa ka lalaki kansang asawa may chichería, usa ka taberna diin gibaligya ang mga ilimnong gikan sa gipaaslom nga mais. Kadtong tawhana nakakat-on sa kamatuoran ug sa ulahi nabawtismohan, nga sa kadugayan nag-alagad nga ansiano hangtod sa iyang pagkamatay. Ang chichería? Karon kini usa ka Kingdom Hall! Sa mibiya kami sa Villazón, may usa ka kongregasyon nga may 20 ka magmamantala. Karon adunay mga 60 ka Saksi, nga mga 110 ang nagatambong sa mga tigom sa hinapos sa semana.
Wala Gayoy ‘Paglingi sa Likod’
Tapos sa Villazón miabot ang asaynment sa Santa Cruz, usa ka siyudad sa silangang bahin sa Bolivia. Dako gayod nga kalipay ang pagtan-aw nga ang buluhaton mitubo gikan sa gamayng kongregasyon nga may 20 ka magmamantala ngadto sa siyam ka mauswagong mga kongregasyon. Dayon, sa 1965, ako mibalik sa pagpuyo sa La Paz sa usa sa mga misyonaryong balay, diin ako nagapuyo sukad niadto.
Sa Pebrero 1978 ako natumpagan sa usa ka sementong paril samtang ako nanaog sa usa ka bus sa siyudad. Nabaling seryoso ang akong tuo nga batiis nga kinahanglang ako makatuon sa paglakaw pag-usab. Apan karon ako makasangyaw na usab ug makadumalag mga pagtuon sa Bibliya.
Dili, dili kanunayng masayon ang bug-os-panahong pag-alagad. May mga kalamposan ug kapakyasan, mga kaguol ug kahiubos. Apan ang kalipay sa pagkaplag sa mga tawong karnerohon ug pagtabang kanila sa pag-alagad kang Jehova labawng nakabakwi sa bisan unsang mga kahiubos. Karon, tapos sa duolag 44 ka tuig sa bug-os-panahong pag-alagad, ako sama gihapong determinado sa padayong ‘pagkupot sa daro’ ug pagpakig-ambit sa buluhatong buhatonon pa.—Sumala sa giasoy ni Betty Jackson.
[Hulagway sa panid 28]
Si Betty Jackson nagsangyaw sa maayong balita sa Bolivia