Unsaon Nimo sa Pagpilig Libro Alang sa Tanang Katawhan?
BISAN pa sa tanang adlaw-adlawng mga butang nga kinahanglan nimong buhaton, kon makapanahon ka sa pagbasag usa ka libro sa usa ka semana, ikaw makabasag kapin sa 3,000 ka tomo sa tibuok nimong kinabuhi. Bisan pag daw tagsaon kini, usa lamang kini ka tulo sa tubig sa balde kon imong isipon nga sa usa ka tuig kapin sa napulo ka pilo ka bag-ong mga publikasyon ang napatik sa Tinipon Bansa lamang. Ug wala gani kana maglakip sa libolibo sa sukdanang klasikal nga mga basahon nga ginaingong nabasa sa tanang edukadakong tawo.
Sa matin-aw, kon bahin sa mga libro, usa ka pahayag nga gipamulong sa miaging 3,000 ka tuig tukma gihapon karon: “Sa pagbuhat ug daghang mga basahon walay kataposan, ug ang paggugol ug daghang panahon kanila mabudlay sa unod.”—Ecclesiastes 12:12.
Apan bisan pa sa pagkadaghan sa libro, aduna bay usa ka libro nga bililhon ug hinungdanon kaayo nga nangibabaw sa tanan ingong libro nga kinahanglang basahon sa tanan? Aduna bay usa ka libro nga nakalagbas sa tanang kababagan sa nasodnon, kultural, ug pinulongan ug takos nga matawag nga libro alang sa tanang katawhan?
Ang pangutana kon unsa ang angay natong basahon maoy usa lamang ka akademikong kaikag tungod kay kini sa kaulahian makaimpluwensiya sa atong paagi sa paghunahuna, sa atong mga prinsipyo, ug sa atong paghukom. Kini nakakuhag pagtagad sa mga edukador, sa mga ginikanan, ug sa uban—sa miagi ug sa karon. Daghang surbi ang gihimo bahin sa kon unsay naglangkob sa hinungdanong pagbasa, ug madayganon kaayo ang mga resulta.
Ang Gipili sa mga Eksperto
Sa 1890, kining ulohana maoy gihisgotan sa usa ka magpapatik sa libro uban sa daghang iladong mga magsusulat niadtong panahona. Iyang gipangutana sila sa pagngalan sa mga libro nga ilang gituohang labing bililhon. Ang resulta? “Ang Bibliya, kang Shakespeare, ug Homer mao ang labing kinaham sa kadaghanan sa mga magsusulat sa panahon sa ikadisinuybeng siglo,” mitaho ang usa ka reperensiyang basahon. “Ug,” kini midugang, “kining han-aya nagpabiling wala mausab hangtod karon.”
Ang mas bag-ong mga surbi miuyon niini. Pananglitan, sa Septiyembre 1982, ang magasing Time mipatik sa pagtubag sa walo ka iladong mga propesor, mga manalaysay, ug mga libraryan sa pangutana, “Unsang lima ka libro nga kinahanglang basahon sa tanang tawong edukado?” Bisag wala bug-os magkahiusa ang mga eksperto, lima sa walo—nga dakong mayoriya—naglakip sa Bibliya sa ilang mga rekomendasyon. Bahin sa sama nga surbi, ang Psychology Today mitaho nga “gikan sa 165 ka libro nga gingalan, ang Bibliya mao ang nakakuhag labing daghang butos: 15. Walay laing libro ang misunod pa niini.”
Ilabinang makaikag mao ang mga nadiskobrehan sa surbi nga gihimo sa The Korea Times sa pagtino kon unsay paglantaw sa dili-Kristiyanong nasod sa Kristiyanong mga relihiyon. “Ang taho sa surbi nagpakita nga ang mga Kristiyano kon itandi sa dili mga Kristiyano, mas mapahitas-on, mas hinapi ug dili kaayo kugihan,” miingon ang mantalaan. Apan, ang taho mipadayon: “Bisan pa sa ilang pagkawalay pagtuo, 70 porsiento sa mga gipangsurbi may dakong pagtamod sa pagkahalangdon sa Bibliya.”
Ang Labing Maayong Pagpili
Mahimong makutlo ang susamang mga surbi sa pagpakita nga, sa matag karon ug unya, ang Bibliya napili ingong libro nga nangibabaw sa tanan. Sa nagkalainlaing mga katarongan, napamatud-an kini nga mao ang labing maayong pagpili taliwala sa mga libro, sa miagi, ug sa karon, sa silangan ug sa kasadpan.
Apan, labing hinungdanon, unsay imong personal nga hunahuna? Kon nagpuyo ka sa nasod sa Kasadpan, ikaw ba tingali, mobati nga ang Bibliya karaan na sa atong moderno, siyentipikanhong kalibotan ug nga kini wala nay bili sa pagsulbad sa mga problema karon? Kon nagpuyo ka sa nasod sa Silangan gilantaw mo ba ang Bibliya nga usa ka libro sa Kasadpan ug busa dili bililhon kanimo? O ang Bibliya ba may balita nga kinahanglang madunggan sa tanang katawhan? Makasulbad ba kini sa mga problema nga ginaatubang sa katawhan karon sa tanang dapit? Kini ba maoy tinuod nga libro alang sa katawhan?