Mga Magmamantala sa Gingharian Nagtaho
‘Ang Nakakaplag sa Kaalam Nakakaplag sa Kinabuhi’
“ANG KAMATUORAN nagadani sa ‘tanang matang sa tawo,’ gikan sa nagkadaiyang komunidad nga naglangkob sa modernong Estado sa Israel,” misulat ang sangang buhatan sa Watch Tower Society nianang nasora. Kining buotan-ug-kasingkasing nga mga nangita sa kamatuoran gipasaligan: “Ang nakakaplag kanako [kaalam nga gipersonipikar] makakaplag gayod sa kinabuhi, ug makabaton sa maayong kabubut-on gikan ni Jehova.” (1 Timoteo 2:4; Proverbio 8:35) Ang kasinatian sa usa ka babaye sa Israel nagailustrar niini.
◻ Usa sa mga Saksi ni Jehova miduaw sa usa ka suskritor sa Bantayanang Torre ug mihikay nga dumalahon ang usa ka pagtuon sa Bibliya uban kaniya. Nalipay ang babaye nga magbaton ug pagtuon. Ang iyang silingan nakadungog niana ug mitambong. Ang silingan “nakaila dayon niini ingon nga mao ang butang iyang gipangita sa milabayng pila ka tuig,” matud sa taho. Ug pagkadagko sa kausabang iyang gihimo sa iyang kinabuhi! Siya ug ang iyang bana sa pila ka adlaw magdiborsiyo na unta apan gikanselar kadto ug nag-uli. Siya dulot nalangkit sa astrolohiya ug kaanib sa usa ka kulto apan iyang gilabay ang mahalong mga libro ug tanang butang nalangkit sa demonismo. Misugod siya sa pagtambong sa mga tigom sa mga Saksi ni Jehova ug nakigsulti sa mga paryente ug mga higala mahitungod sa iyang bag-ong nakaplagang pagtuo. Mahitungod sa mga higalang nawala kaniya ingong sangpotanan, siya miingon: “Dayag, sila dili tinuod nga mga higala.”
Karon kining bayhana madasigong nagasangyaw ngadto sa mga suki sa tindahang gipanag-iya sa pamilya ug regular nagapakig-ambit sa pagsangyaw sa maayong balita sa balay ug balay. Pagkamalipayon niyang iyang nakaplagan ang kaalam ug nasayran ang kahibulongang mga tagana ni Jehova alang sa kinabuhing dayon diha sa iyang bag-ong sistema! Ang iyang silingan nga sa sinugdan mao ang nagsuskriber nagpadayon usab sa pagtuon ug may pag-uswag.
◻ Si Lloyd nagapuyo sa Guyana. Ang iyang martsa ngadto sa relihiyosong kagawasan hataas. Iyang gisugdan ang iyang panaw ingong Presbyteriano. Siya naminyo sa usa ka Hindu ug ang babaye nahimo usab nga Presbyteriano. “Ako nalisang sa pagkasalingkapaw nga naglungtad” sa maong iglesya, siya mipadayag sa kaulahian. Busa siya miliso ngadto sa Islam, apan kadto wala makatagbaw sa iyang pagpangitag kagawasan. Sunod iyang gisulayan ang Hinduismo. Tapos sa pagkakat-on ug daghan mahitungod sa reinkarnasyon ug sa mga kasugoan sa Karma, misugod siya sa paglalis sa maong mga doktrina. Siya mibalhin ngadto sa okultismo, mitukod sa usa ka altar ug nagdoktrina sa iyang pamilya sa maong pagtulon-an. “Apan ang makahahadlok ug makalilisang nga mga kasinatiang akong nabatonan ug sa akong pamilya maoy hinungdang akong gibiyaan ang maong relihiyon,” siya miingon. Gisagop niya ang materyalistikanhong pagkinabuhi, apan ang iyang pamilya “nagkabungkag.” Busa miingon siya: “Miampo ako sa Diyos, Amahan, Allah, ug Ram ug ako siyang gisultihang ako nagapakigsulti sa Maglalalang sa tanang butang. Ako siyang gipahibalong buot ko siyang pahimut-an ug dili ang tawo.”
Sa maong punto ang “maayog-pamiste, hinayon-mosulti, malumo” nga Saksi ni Jehova miabot sa ganghaan ni Lloyd ug mitubag sa iyang mga pangutana sa makapatagbawng paagi. Ang Saksi nagbilin kaniya sa librong Ang Kamatuoran nga Motultol sa Kinabuhing Dayon ug sa usa ka Bibliya. Sa wala madugay nasugdan ang usa ka pagtuon sa Bibliya uban kang Lloyd ug sa iyang asawa, sila miuswag sa kahibalo, mibulag sa Dakong Babilonya—ang tibuok-kalibotang sistema sa bakak nga relihiyon. Sa nahaigong panahon sila nagpahinungod sa ilang kaugalingon ug nabawtismohan. Matud ni Lloyd: “Ang gugma, ang tinuod nga gugma nagpuli sa pagdumot ug kasuko ug labaw sa tanan, ang kahulogan ug katuyoan nahidugang sa among kinabuhi.”
Karon sila nagakalipay sa ‘kamatuoran nga nagapagawas kanila.’—Juan 8:32.
◻ Ang usa ka batan-ong babaye sa Seychelles nakakat-on usab mahitungod kang Jehova, nga misangpot sa panalangin gikan niya. Ang babaye nakigpuyopuyo sa usa ka lalaki ug daghan silag anak. Gipabilhan sa babaye ang kamatuorang iyang nakat-onan gikan sa Bibliya apan nalisdan nga mobarog aron mahimong kuwalipikado alang sa pag-alagad kang Jehova. Siya nagpuyo sa nindot nga balay uban ang kahamugaway nga gipahimuslan sa pila ra ka tawo. Tapos sa pag-ampo ug pagdasig sa magtatan-aw sa sirkito, iyang gipapili ang lalaking iyang gipuyopuyo—kinahanglang sila magpakasal o magbulag. Nagpanuko ang lalaki nga mohimo sa bisan haing lakang, mao nga siya mipahawa. Pagkamalipayon niyang siya sa maong panahon kuwalipikadong mosangyaw sa maayong balita ug magpahinungod sa iyang kinabuhi kang Jehova ug mabawtismohan! Kana iyang gibuhat. Makaiikag, ang lalaking iyang gipuyopuyo nakadayeg kaayo sa iyang maisogong pagbarog dapig sa mga prinsipyo sa Bibliya nga misugod siya sa paghimog kahikayan sa paghiusa sa pamilya pinaagi sa legal nga kaminyoon.
Ang salmista miila: “Kay ikaw [Jehova] ang tinubdan sa kinabuhi.” (Salmo 36:9) Giila, usab, kini sa maong mga tawo ug nangita sa kaalam aron mailhan si Jehova ug ang iyang mga kinahanglanon alang sa kinabuhi. Gipabilhan gayod nila ang kamatuorang “ang nakakaplag sa [kaalam] nakakaplag gayod sa kinabuhi”!