Mga Propesyonal nga Nakakaplag ug Tinuod Tibuok-Kinabuhing Trabaho

ANG hangin sa kagabhion matugnaw ug ang kabugnaw sa tubig daw sa yelo. Duha ka gatos ka batan-ong lalaki ug babaye, nga nagsul-ob ug maputing biste ug nagkupot sa mga kandila ibabaw sa ilang mga ulo, miubog sa tubig nga abot sa dughan. Usa ka rituwal aron makaentra sa usa ka misteryosong kulto? O tingali pasipat sa batan-on?

Ang maong mga batan-ong graduwado sa hayskul ug kolehiyo miduyog sa libolibo pa nga pareho nilag edad sa maisip nga usa ka rituwal sa pagsulod sa propesyonal nga karera uban sa usa ka dakong kompaniya sa Hapon. Ang tugnaw kaayong masa nga bawtismo gituyo sa pagwagtang gikan sa umaabot nga mga empliyado sa independenteng mga kiling nga tingali nakuha sa tunghaan ug sa paglig-on sa ilang bugkos sa pagkamaunongon ngadto sa kompaniya.

Propesyonalismo ug Dedikasyon

“Sa Hapon ang trabaho mao ang katilingban. Ang katilingban mao ang trabaho,” misulat si Frank Gibney diha sa iyang librong Japan: The Fragile Superpower. Ang ipasabot niini mao nga inigsulod sa usa ka tawo sa usa ka kompaniya, ang tibuok niyang kinabuhi masentro niana. “Kon siya nagatrabaho alang sa Mitsubishi, siya tawo sa Mitsubishi. Ang kadaghanan sa iyang mga higala nagagikan sa Mitsubishi. Siya makig-inom uban kanila, makigdula sa golf o bowling uban kanila, ug makig-ambit sa iyang mga suliran uban kanila. Siya makig-indig batok kanila, tinuod, apan sama sa mga anak nga mag-indigay sulod sa usa ka pamilya walay mausa ang maghunahuna sa pagbiya. Gawas sa iyang mga paryente, ug lagmit sa pila ka higala sa tunghaan, ang kadaghanan niyang mga pakig-uban​—ug ang kadaghanan sa iya sa iyang pamilya​—magpadayon sulod sa gambalay sa kompaniya.”

Ilis sa maong dakong dedikasyon ug pagsakripisyo-sa-kaugalingon, ang mga trabahante hatagag kasegurohan diha sa dagway sa tibuok-kinabuhing trabaho. Kini nagaapil sa walay-pagkatapos nga pagbansay, mga pagpasinati, mga pagbalhin, ug, siyempre, mga promosyon.

Ang kadaghanang batan-on sa Hapon daling modawat niining pormula sa kalamposan ug mahimong bahin sa kahikayan. Ang uban, bisan tuod wala magtinguhang moasenso diha sa korporasyon, nagapakigbisog sa ubang propesyonal nga natad. Apan ang maong kahikayan mohatag bag kalipay ug katagbawan? Ang tibuok-kinabuhing trabaho nagkahulogan ba sa tibuok-kinabuhing kalipay? Dugang ug dugang ang nakakaplag nga may butang labi pang maayo ug magantihon kay sa pagtinguhang moasenso diha sa korporasyon o makigbisog aron makab-ot ang personal nga bahandi ug kabantog.

Ang Iyang Trabaho Mao ang Iyang Kinabuhi

Si Junichi migraduwar gikan sa Tunghaan sa Komersiyo sa Keio University sa 1961. Sa pagsunod sa mga lakang sa naandang mga graduwado sa unibersidad, siya miduyog sa usa ka dungganong korporasyon. Sa iyang kahimtang kadto ang kinadak-ang kompaniya sa kotse nga may mga 4,700 ka empliyado niadtong panahona. Inanay ang iyang pag-asenso sa korporasyon. Sa kataposan, siya nahimong pangulo sa seksiyon sa iyang departamento. Bisan tuod tungod sa iyang trabaho, nga kadaghanan gikan sa buntag hangtod sa tungang gabii, siya halos wala nay panahon alang sa iyang asawa ug lima ka anak, iyang gidawat kanang tanan ingong gikinahanglang sakripisyo alang sa kaugmaong may kasegurohan.

Apan may nahitabo sa Oktubre 1974. Nadiskobrehan ni Junichi nga ang iyang asawa ug mga anak nagtuon sa Bibliya uban sa mga Saksi ni Jehova ug nagtambong sa Kristohanong mga tigom. Siya naningkamot sa iyang maarangan sa pagpugong kanila, apil ang pagbiya kanila, apan kana wala molampos.

Usa ka adlaw sa nahiuli siya gikan sa trabaho, ang pamilya nangadto na sa mga tigom: “Nakit-an nako nga andam na ang lamesa alang sa akong panihapon, ug dihay usa ka sulat alang kanako,” matud ni Junichi. “Sa sulat, gisultihan ako sa akong pamilya nga dili gayod nila isurender ang ‘kamatuoran,’ nga kadto sa pagkamatuod alang usab sa akong kaayohan, ug may adlaw rang ako makasabot.” Kadto nakatandog kang Junichi. “Nakahunahuna ako nga tingalig kini mao ang kamatuoran, ug mihunong ako sa pagsupak kanila.”

“Sa lakaw sa panahon, ang mga Saksi manganha ug moduaw kanako ug magdasig kanako sa pagtuon sa Bibliya. Dinha na magsugod sa pagbabag ang akong propesyonal nga kinabuhi. Okupado kaayo ako sa trabaho nga gibati kong dili gayod ako makahatag ug panahon alang sa pagtuon sa Bibliya ug sa mga tigom. Dayon akong nasayrang kon ako motuon, kinahanglang hunongon ko ang sinuwitik nga mga buhat ug subsob gabii na kaayong pag-abiabi nga konektado sa trabaho. Sanglit kana makadaot sa negosyo, ako nagpanuko sa pagtuon.”

Apan tungod sa pagdasig sa mga Saksi, si Junichi misugod sa pagtuon ug sa wala madugay miuswag ngadto sa puntong nagpahinungod sa iyang kinabuhi sa Diyos ug nagpabawtismo. Bisan pag siya duna gihapoy tibuok-panahong trabaho, nakaplagan ni Junichi ang giisip niyang tinuod tibuok-kinabuhing trabaho. Sukad sa Marso 1978, siya mapinadayonong nagaalagad nga usa ka auxiliary payunir, nga nagagugol ug 60 ka oras sa usa ka bulan sa pagsangyaw.

Nabatonan ba ni Junichi ang kaayohan gikan sa iyang bag-ong paagi sa kinabuhi? “Oo, nabatonan ko. Akong nadiskobrehang labi pa akong mabungahon sa maadlaw aron malibre ang mga gabii sa pag-alagad sa intereses sa Gingharian uban sa akong pamilya. Nabatonan ko ang daghang kahigayonan sa pagsangyaw ngadto sa kauban kong mga trabahante ug pagtuon sa Bibliya uban sa ubang lalaki nga puliki sa ilang sekular nga mga trabaho sama kanako sa nangagi. Nabawtismohan na ang duha, ug ako nagatuon uban sa tulo pa. Nagapasalamat ako kang Jehova tungod sa iyang pagpailob kanako.”

Gusto Niyang Daling Madato

Ingong usa sa unom ka anak sa pamilya, si Takafu naluwas sa mga pangatake sa ayroplano sa Nagoya City uban sa sininang tapot ra sa lawas ug sa pilosopiyang madato sa madali. Sa pag-awhag sa iyang uyoan, misulod siya sa propesyonal nga tunghaan sa lumba sa bisikleta sa edad 15. Sa pagka 22 na niya, siya milampos ingong primera-klaseng maglulumbag bisikleta, nga makita siya sa tanang lumba sa tibuok nasod. Nakadumdom siyang nakit-an niya ang iyang inahang naghalad sa iyang daog sa halaran sa pamilya ingong timaan sa pasalamat. Daw nakab-ot ni Takafu ang iyang tumong sa kinabuhi ug ang tanan nagmauswagon.

Unya ang usa ka misyonaryo sa mga Saksi ni Jehova miduaw sa iyang balay ug mihatag kang Takafu ug diyutayng pagkaon sa hunahuna. Ang mga pulong sama niini, nga gipamulong ni Jesus, nagpabilin sa iyang hunahuna ug kasingkasing: “Unsa bay kapuslanan kon maangkon sa usa ka tawo ang tibuok nga kalibotan apan mawad-an sa iyang kalag?” (Mateo 16:26) Sa nahaigong panahon, si Takafu miuswag sa kahibalo sa Bibliya ug nakaamgong kinahanglang himoon ang pila ka kausaban.

“Ingong propesyonal nga siklista, ako nasayod nga ang lumba sa bisikleta ug ang pagsugal nagakuyog,” matud ni Takafu. “Sa gihapon dili sayon ang desisyon. Gideboto ko ang pito ka tuig sa akong kinabuhi sa dula, ug ang akong kita maorag kinahanglanon sa kaayohan sa akong pamilya. Apan akong nahibaloan gikan sa Bibliya nga si Moises ug sa Pablo nag-atubang sa susamang mga desisyon ug nagpili sa mas maayong dalan. Kana usab ang akong gibuhat.” Mientra si Takafu sa usa ka bag-ong lumba​—ang lumba sa kinabuhi​—ug iyang gipadayon kini hangtod niining adlawa, nga nagatabang sa mga kongregasyon sa pila na ka tuig ingong nagapanawng magtatan-aw.

Gikuha sa Iyang Negosyo ang Tanan Niyang Panahon

Si Satoshi may negosyo sa sinina sa kababayen-an. Ingong malamposong tag-iya sa upat ka tindahan, siya walay suliran sa kuwarta. Apan ang iyang pagpakiglabot sa kalibotan sa patigayon miagak usab kaniya sa konklusyong ang tibuok-kalibotang polusyon, kanihit sa pagkaon, ug gubat sa dili madugay magkahulogan sa kalaglagan sa kinabuhi sa tawo. Busa, sa miduaw ang usa ka Saksi nga may usa ka pulyetong mihatag sa pasalig nga kini dili itugot sa Diyos, napukaw ang interes ni Satoshi.

Apan nakababag kaniya ang iyang negosyo. “Tungod sa grabeng kompetisyon, ang paghinayhinay magkahulogan nga mawad-an sa negosyo,” matud ni Satoshi. “Kini maoy kaso nga ‘kaon o kaonon ka.’ Ang panultihon sa negosyo mao nga kon ikaw dili tinuod nga okupado ikaw nahapay.” Mao nga gidangtag duha ka tuig, dugang sa dako kaayong panlimbasog, una si Satoshi sa kataposan mohukom sa pagtuon sa Bibliya.

Sa nahimo siyang Saksi ni Jehova, iyang gibaligya ang duha niya ka tindahan ug gipaatiman niya ang duha sa ‘mga agalon sa tindahan.’ Bisan tuod karon si Satoshi nagatrabaho lamang sa duha o tulo ka adlaw sa usa ka bulan ingong accountant ug konsultant, siya nagaingon: “Igo gihapon ang akong kita. Buot nakong unahon ang akong pag-alagad kang Jehova nga Diyos.” Karon iyang ginasunod ang tinuod niyang propesyon sa tibuok-panahong ministeryo, nga nagaalagad nga usa ka payunir. Siya ug ang iyang pamilya nagahimog maayong espirituwal nga pag-uswag.

Ang Iyang Propesyon Nakatabang Niya sa Pagkaplag sa Diyos

Si Hiroshi nagtrabaho sa buhatan sa lata sa iyang pamilya. Apan ang tinuod niyang interes mao ang pagpangletrato sa kinaiyahan. Nahimo siyang maayo kaayong letratista nga nahipatik ang pipila sa mga letrato niya sa mga insekto. Sa nag-edad siyag 29, siya nahimong propesyonal nga letratista sa kinaiyahan.

“Sa akong pagtuon sa mga insekto,” nahinumdom si Hiroshi, “ako naghunahuna nga kon may Diyos, siya siawan gayod. Kana mitultol kanako sa pagduhaduha sa teoriya sa ebolusyon, ug ako nainteresado ug diyutay sa Bibliya.”

Usa ka adlaw sa tingtugnaw, duha ka Saksi miduaw kang Hiroshi. “Dihang akong gidawat gikan kanila ang duha ka magasing may mga artikulo mahitungod sa mga hayop, mitanyag sila sa pagtuon sa Bibliya uban nako diha sa akong balay,” matud ni Hiroshi. “Gihunahuna ko nga sanglit dili kinahanglang moadto ako sa simbahan aron sa pagtuon, dili kinahanglang ako mamembro. Busa misugot ako.” Bisan tuod siya natingala sa nasayran niya kon unsay ginasulti sa Bibliya mahitungod sa Maglalalang, gidawat dayon niya kana. Ang kaikag niya sa kalalangan nahimong ikaduha sa gugma niya kang Jehova.

Si Hiroshi karon nagabuhi sa iyang pamilya ingong nagkinaugalingong letratista. Apan ang tinuod niyang propesyon mao ang pagkabug-os-panahong ministro.

Nakaplagan Nila ang Butang Labi Pang Maayo

Ang listahan makapadayon ug makapadayon mahitungod sa mga propesyonal sa Hapon nga nagbag-o sa ilang mga kinabuhi​—ug, usahay, sa ilang mga trabaho​—dihang ilang nailhan si Jehova ug ang iyang mga katuyoan. Ang ilang pundok nagaapil sa mga doktor, mga dentista, mga arkitekto, mga tigprograma sa kompiyutir ug mga tigdesinyo sa sistema, mga magtutudlo, mga beterinaryo, mga biyutisyan, mga ehekutibo, ug uban pa.

Sa usa ka panahon, kining tanang propesyonal bug-os dedikado sa ilang trabaho. Sa pagkahibalong ang kahikayan karon sa mga butang haduol na sa iyang kataposan, ilang gihimo ang propesyonal nga desisyon. Ilang gibutang ang ilang mga trabaho diha sa ilang tukmang dapit ug gisugdan ang pagpatunhay sa butang labi pang maayo​—ang Gingharian sa Diyos ug ang gisaad niana nga mga panalangin. (Mateo 6:33) Sa pagluwat sa ilang gihunahuna sa nangagi nga ilang tibuok-kinabuhing trabaho, sila nangahimong mga propesyonal sa usa ka bag-ong natad. Ilang gidawat ang tibuok-kinabuhing trabaho ingong payunir nga mga alagad sa Labing Hataas, si Jehova nga Diyos.

[Hulagway sa panid 23]

Kampeyong siklista si Takafu Yamaguchi