Ang Pagsanay sa Kinabuhi—Pinaagi sa Ebolusyon o Gikan sa Diyos?
“MILAGROSONG makalilibog.” Mao kanay paghulagway sa basahong Science News sa sistema sa pagsanay sa usa ka babaye. Apan ang binhi sa obaryo sa babaye dili makapasanay ug kinabuhi sa iyang kaugalingon. Aron kini mahitabo, ang binhi nga gikan sa sistema sa pagsanay sa lalaki kinahanglang matapo sa uyok sa itlog o binhi. Apan unsay himoon sa binhi sa lalaki aron motubo ang itlog? Kanang pangutanaha nakalibog gihapon sa mga siyentista.
Ang pagtuo sa ebolusyon nagbangon ug laing pangutana: Kon resulta sa ebolusyon ang mga organo sa pagsanay sa lalaki ug babaye, sa unsang paagi mitungha ang kinabuhi sa wala pa sa bug-os maporma ang duha?
Ang pagsanay nalangkit ug uban pang mga katingad-anan. Ang genetikanhong materyal sa pertilisadong binhi makita lamang kini pinaagi sa tabang sa usa ka mikroskopyo. Apan kini naglarawan ug “dakong mga librarya sa impormasyon,” sumala sa gipahayag nila ni Propesor Frair ug Davis diha sa ilang librong A Case for Creation. “Walay lain pang pananglitan sa pagkagamitoy nga ikatanding niini,” siya midugang. Kining gamitoy kaayong librarya maoy nagadumala sa pagtubo sa tanang mga bahin sa lawas, lakip sa mga detalye sama sa kolor sa mga mata ug buhok.
Tapos sa pertilisasyon, mobahin ang selula sa duha, ang duha mahimong upat, ug padayon pa, hangtod adunay gamayng masa sa mga selula. Nalangkit sa pagbahin sa selula ang paghulad ug paghan-ay sa milyonmilyong mga molekula. Kaamgid kini sa usa ka pabrika nga awtomatikong mobahinbahin sa duha ka lahing mga establisimento nga kompleto sa kaamgid nga mga makinarya nga motagana sa mao ra nga mga produkto, ug kini nga pagdaghan balikbalikon pag-usab. Dayon laing katingalahang butang ang mahitabo.
Mosugod sa pagporma ang lahi nga dagway nga mga selula—mga selula sa nerbiyos, mga selula sa kaunoran, mga selula sa panit, ug uban pang mga matang nga nagalangkob sa tawhanong lawas. Ang panaglahi sa selula maoy usa ka misteryo. Maingon man sa kinatibuk-an nga selula. “Walay usa ang nasayod,” miingon ang Science Digest, “kon nganong ang pipila ka selula magtipon sa pagporma ug rinyon samtang ang uban moduyog sa pagpormag atay, ug uban pa.” Sa kataposan, modangat ang tawhanong lawas sa bug-os nga pagtubo, nga gilangkoban ug duolan sa 100,000,000,000,000 ka selula.
Sumala sa teoriya sa ebolusyon, ang lawas sa tawo mitungha gikan sa yano gagmayng mga organismo. Apan, dili sama sa tawo, ang kadaghanang gagmayng mga organismo nagagikan sa usa lamang ka ginikanan. Sila mosanay sa ilang kaugalingon. Sa unsang paagi kining pormaha sa pagsanay nabalhin sa mas komplikadong porma nga nagkinahanglan ug duha ka ginikanan? Nalisdan ang mga ebolusyonista niini sa pagtubag, sumala sa makita sa lindog sa nag-unang panid.
Kining dakong paglukso mabaw kaayong pagkabatbat ingong “ang imbensiyon sa seksuwal nga pagsanay.” Apan may kaisog ang pila ka siyentista sa pagsupak. Si Propesor Jaap Kies, sa University of Western Cape, sa Habagatang Aprika, nagbatbat niana ingong “hingaping pagpamanabana.”
Aduna lamay usa ka makatagbawng katin-awan sa pagsanay sa kinabuhi. Kini maoy usa ka gasa nga gikan sa maalamon sa tanan nga Maglalalang, si Jehova nga Diyos. Sumala sa gipamulong sa Bibliya: “Ang tanang maayong gasa ug tanang hingpit nga hatag nagagikan sa kahitas-an.”—Santiago 1:17.
[Kahon sa panid 3]
Kon Unsay Giadmiter sa mga Ebolusyonista Bahin sa Pagsanay
“Wala gani kami masayod sa kataposang hinungdan sa seksuwalidad; nganong motungha ang bag-ong mga tawo pinaagi sa pag-usa sa duha ka seksuwal nga elemento, imbes sa usa ka paagi sa parthenogenesis [pagsanay nga nagkinahanglan lamag usa ka ginikanan] . . . Ang bug-os nga ulohan natago gihapon sa kangitngitan.”—Charles Darwin, 1862.
May labot sa hunahunaa ni Darwin, ang Science News, Septiyembre 8, 1984, midugang: “Hayan nagsulat siya
karon.”
“Kining libroha,” miingon si Propesor George W. Williams sa pasiunang panid sa Sex and Evolution, “gisulat gikan sa pagtuo nga ang kaylap nga seksuwal nga pagsanay sa hataas nga mga tanom ug mga hayop dili-magkatukma sa bag-ong teoriya sa ebolusyon.”
Diha sa iyang librong The Evolution of Sex, si Propesor John Maynard Smith mihatag ug “usa ka laraw sa sinugdanan sa sekso,” nagtawag niana nga “ang labing maayong plano nga akong ikatanyag.” Siya miingon sa pagtapos: “Dili ako makapaaron-ingnong nagsalig niini nga katin-awan.”
“Ang sekso mao ang hara sa mga suliran sa ebolusyonaryong biolohiya. . . . Daw ang pila sa labing sukaranang mga pangutana sa ebolusyonaryong biolohiya panagsang gipangutana . . . Ang labing dako ug labing gamayng ug pagkawalay hibangkaagan ug labing magahi tali ning mga pangutana mao, nganong ang sekso?”—The Masterpiece of Nature, ni Propesor Graham Bell.