Mga Magmamantala sa Gingharian Nagtaho
Ang Kamatuoran sa Bibliya Nagpatungha sa Pamilyahanong Panaghiusa ug Kalipay
USA ka magtiayon sa India nga sakop sa usa ka simbahan sa Kakristiyanohan kanunayng nag-away. Kanunay nga bukbokon sa bana ang iyang asawa. Ila pa ganing gisulayan ang pagpatay sa usag usa! Usa ka higayon ang asawa nagpabukal ug ghee (tin-awng mantekilya) ug nagdala niana sa iyang bana nga daw kadto tsa ug dayon nagbubo niana sa iyang nawong. Sa kataposan, ang asawa mihukom sa paghikog.
May makapatungha ba sa panaghiusa ug kalipay sa maong magtiayon? Daghan ang moingong wala. Apan sa wala pa maghikog, ang asawa miduaw sa iyang anak babaye ug iyang umagad. Sila may pagtuon sa Bibliya uban sa mga Saksi ni Jehova. Mihukom siya sa pagpamati, ug natandog pag-ayo ang iyang kasingkasing sa iyang nabatian. Human sa pagtuon, gisugilon niya sa mga Saksi ang iyang mga suliran. Gipakita nila kaniya gikan sa Bibliya kon unsa ang iyang mga responsabilidad ingong asawa. Ang bana gipakigkitaan usab ug nasugdan ang pagtuon sa Bibliya uban kaniya. Ang resulta? Pinaagi sa pagpadapat sa bana ug asawa sa mga prinsipyo sa Bibliya, nasulbad ang ilang mga suliran sa pamilya. Karon ang magtiayon nagauswag sa puntong nagpahinungod sa ilang mga kinabuhi kang Jehova, ug sila nabawtismohan.
Ang dimaihap nga ubang magtiayon nakadiskobreng ang dinasig nga Pulong sa Diyos naundan sa solusyon sa mga suliran sa pamilya. Pinaagi sa pagpadapat sa tambag niini, sama nianang hikaplagan sa Colosas 3:12-14 ug Efeso kapitulo 5, ilang nabuntog ang maong mga suliran ug nakab-ot ang panaghiusa ug kalipay.
◻ Ang laing pananglitan sa unsang paagi ang kamatuoran sa Bibliya makapahiusa sa pamilya nagagikan sa Lebanon. Niadtong 1973 usa sa mga Saksi ni Jehova nakasugod ug pagtuon sa Bibliya uban sa usa ka pamilya sa usa ka gamayng balangay. Duha ka batang babaye, nga managsoon, gikan sa silinganan mitambong usab sa pagtuon. Apan sa dihang ang lokal nga pari mitutol sa pagtuon, gihunong kana sa pamilya. Ang duha ka batang babaye nagpadayon sa pagtuon pinaagi sa sulatanay, nga gigamit ang adres sa ilang bayaw nga babaye. Tapos matun-an nila ang mga sulat gikan sa Saksi, kana ilang gihatag sa ilang bayaw nga babaye aron mabasa, bisan pag ang iyang bana sa maong panahon supak. Kon sila may mga pangutana, ilang pangutan-on ang Saksi pinaagi sa sulat.
Ugaling, ang ilang igsoong lalaki mipadayon sa iyang pagsupak. Iyang gigisi ang mga basahon nga nabatonan sa iyang mga igsoong babaye ug sa iyang asawa ug gisunog pa ang ilang mga Bibliya. Apan bisan pa sa grabeng pagsaway sa pamilya, sa pari, ug sa uban sa balangay ang mga batang babaye nagpadayon sa pagtuon. Sa wala madugay, sila nabawtismohan. Ang masupakong igsoong lalaki sa duha ka batang babaye nakakat-on usab sa kamatuoran ug nabawtismohan. Karon siya nagaalagad nga ministeryal nga alagad sa kongregasyon, ug usa ka regular nga auxiliary payunir. Sa kataposan sa 1985, 23 ka membro sa maong pamilya ang nakakat-on sa kamatuoran ug nangabawtismohan!
Dako gayod ang kalipay niadtong duha ka managsoong babaye tungod sa pagpabilin sa kamatuoran bisan pa sa pagsupak! Dako gayod ang ilang kangaya nga makita ang panaghiusa ug kalipay sa ilang pamilya ingong resulta sa ilang pagdawat sa kamatuoran sa Bibliya! Kini nagapamatuod sa mga pulong sa salmista sa mipahayag siya: “Malipayon ang katawhan kansang Diyos mao si Jehova!”—Salmo 144:15.
◻ Ang lain pang kasinatian nagagikan sa New York City, U.S.A. Kining tawhana misugod paggamit ug droga dihang siya 13 anyos pa ug nagiyan kaayo nga siya dili gani makakaon gawas kon siya makatabakog marijuana! Ang gastos sa iyang bisyo sa cocaine maoy $100 sa kada adlaw, ug samtang magbaligyag droga siya kanunayng magdalag duha ka rebolber. Siya naminyo ug nakabatog upat ka anak. Dihang ang iyang asawa nahimong usa sa mga Saksi ni Jehova, siya iyang gisupak. Apan sa kadugayan gipul-an siya sa iyang pagkinabuhi sa pagkahubog sa droga ug “pagngadto-nganhi sa kalye,” sa pagpanapaw.
Tungod sa kanunayng pagdasig sa iyang asawa ug mahigugmaong tabang gikan sa mga ansiano, siya misugot sa pagtuon sa Bibliya usa ka tuig tapos sa bawtismo sa iyang asawa. Kadto nakatabang niya sa pagsagubang sa daghang mga suliran sa pagbulag sa droga apil ang mga handurawan. Siya miuswag ngadto sa punto sa bawtismo ug karon nalipay nga makitang ang iyang pamilya malipayong nahiusa ug ang iyang upat ka anak nagauswag diha sa kamatuoran. Kay may permanenteng trabaho ug maayong kita, siya ug ang iyang asawa nagapanglantaw nga moapil sa pag-alagad nga auxiliary payunir.
[Blurb sa panid 21]
“Malipayon ang katawhan kansang Diyos mao si Jehova!”—Salmo 144:15