Pag-abuso sa Gahom—Matapos ba Kini?
LAKIP sa mga paagi nga makita ang pagkadalo sa dili-hingpit nga mga tawo mao ang ilang tinguha nga makabaton ug gahom. Ang iladong magsusulat nga taga Britanya si Malcolm Muggeridge mipunting nga ang mga tawo mahigugmaon ug gahom “tungod kay [sila] wala mahibalo nga ang pundasyon sa tawhanong kinabuhi mao ang gugma . . . Apan ang pagtinguha ug gahom peligroso kaayo. Usa kini ka tinguha nga gidumilian ni Jesu-Kristo nga mahuptan.”
Tungod sa pagkakaylap sa pagtinguha ug gahom, uban sa kadaot nga moresulta niini, ang Founding Fathers sa Tinipong Bansa mihimog batakan-balaod nga nagbahin sa mga gahom sa kagamhanan sa tulo ka seksiyon: ehekutibo, legislatibo, ug hudisyal. Kining bahina gimugna sa pagsumpo sa mga pag-abuso sa gahom.
Bisan pa sa halandong tinguha sa Founder, dunay kaylap nga pag-abuso sa gahom nianang yutaa. Apan tingali nahibalo ka gikan sa personal nga kasinatian ug obserbasyon nga dunay pag-abuso sa gahom sa tanang bahin sa kalibotan. Ang kasaysayan napuno sa mga rekord sa mga lalaki nga nag-abuso sa gahom aron sa pagtuboy sa ilang kaugalingon ug sa kadaot sa ilang isigkatawo. Palandonga, pananglitan, si Alejandro nga Bantogan, si Carlomagno, Napoleon, ug Hitler.
Kanus-a Kini Nagsugod?
Apan, may maayo kang katarongan sa pagpangutana, kon kanus-a nagsugod kining pag-abuso sa gahom? Ang kasaligang tubag makita sa libro sa labing sayo nga kasaysayan sa tawo, nga mao ang Bibliya. Didto imong mabasa ang bahin sa mga hitabo sa tanaman sa Eden. Si Satanas nga Yawa, nga gipakita sa Bibliya nga usa ka tinuod nga linalang, nga nangandoy ug gahom. Iyang gitintal ang tawhanong rasa sa pagsugod diha sa dalan sa kasal-anan. Ang usa ka timaan sa sala mao ang kaylap nga pangibog sa gahom, ug sa pag-abuso niana. (Genesis 3:1-19; Roma 5:12) Si Satanas sa dugay nang panahon mipahinabo sa kanasoran nga nailalom sa iyang gahom, nga sa ingon nakatanyag siya sa iyang pagmando kanila ngadto kang Kristo. (Mateo 4:8-10) Ang Yawa, nakalimbong hapit sa tanang tawo, nga mahimong ikaingon nga “ang kalibotan anaa sa gahom sa usa nga daotan.”—1 Juan 5:19; Pinadayag 12:9.
Aniay hunahuna nga tingali makakurat kanimo: Ang panguna niadtong nakaalagad sa katuyoan sa Yawa mao ang daghang relihiyosong mga pangulo. Sa unsang paagi? Buweno, ilang giabusohan ang ilang gahom pinaagi sa pagtudlog bakak nga mga doktrina, ug busa nagpaulipon sa mga tawo. Ang mini nga relihiyosong mga pangulo nakaabuso usab sa ilang mga gahom pinaagi sa paglutos sa tinuod nga mga alagad sa Diyos. Si Esteban, ang unang Kristohanong gipatay, nagpunting sa makasubong rekord sa relihiyosong mga pangulo sa Israel: “Mga gahig-ulo ug mga walay sirkunsisyon sa kasingkasing ug mga igdulongog . . . Kinsa ba sa mga propeta ang wala lutosa sa inyong mga ginikanan? Oo, ilang gipamatay ang nanaghimog propesiya mahitungod sa pag-abot sa Usa nga matarong, kang kinsa kamo karon nahimong iyang mga magbubudhi ug mga mamumuno.”—Buhat 7:51, 52.
Si Esteban ang usa sa una sa hataas nga linya sa matinumanong mga Kristohanon nga gilutos. Ang mga pulong ni apostol Pablo nakitang tinuod: “Pagalutoson gayod ang tanang nagatinguha sa diyosnon nga pagkinabuhi diha kang Kristo Jesus.” (2 Timoteo 3:12) Ang rekord sa mga Saksi ni Jehova sa modernong panahon nagpamatuod niini. Bisan karon, diha sa mga 40 ka kayutaan nabati niining mga Kristohanon ang pag-abuso sa gahom tungod kay ang ilang ministeryo gipugngan sa mga awtoridad.
Ug pagkadaghan pa sa mga pag-abuso sa gahom! Bisan asa kita motan-aw, atong makita ang mga tawo nga nagaagulo tungod niana. Ang pag-abuso sa mga empliyado maoy nakapukaw sa kalihokan sa pamuo. Apan karon matin-aw nga ang pipila ka lider sa organisadong pamuo sad-an usab sa pag-abuso sa gahom. Ang minoridad nga mga grupo nag-antos sa pag-abuso sa gahom sa mayoriya. Laing porma sa pag-abuso mao kanang ginahimo sa mga lalaki sa hataas nga mga posisyon nga nagapahimulos sa mga empliyadong babaye, nga mapugos sa pagpasakop tungod sa kahadlok nga mawad-an sa ilang mga trabaho. Pananglitan, gitanyagan ang usa ka may maayong palaabutong baylerina ug dakong bahin sa produksyon sa ballet kon siya mosugot sa pakigdulog sa prodyuser.
Oo, ang kalibotan puno sa mga tawo nga nagaabuso sa ilang gahom. Ang tanang nagahimo niini sa mahakogon nagapamatuod nga sila walay kahadlok sa Diyos. Nganong tinuod kana? Tungod, kay sumala sa gipahayag sa Pulong sa Diyos, “Ang kahadlok ni Jehova maoy pagdumot sa daotan.” (Proverbio 8:13; Salmo 97:10) Ang pag-abuso o paggamit sa dili maayong paagi sa gahom daotan gayod, apan ang ingon nga pag-abuso dili magpabilin sa tanang panahon.