Nganong Piho nga Matapos ang Pag-abuso sa Gahom

ANG karaang Haring Solomon miingon bahin sa pag-abuso sa gahom sa iyang adlaw: “Unya ako mipauli ug nakita ko ang tanang mga pagdaogdaog [pag-abuso sa gahom] nga ginahimo ilalom sa adlaw, ug, tan-awa! ang luha niadtong mga dinaogdaog, ug sila walay maglilipay; ug niadtong mga madaogdaogon kanila diha ang gahom.”​—Ecclesiastes 4:1.

Tingali mangutana ka, ‘Sanglit dugay nang naglungtad ang pag-abuso sa gahom, magpabilin ba kini kanato sa walay kataposan?’ Dili, kini dili magpabilin. Tungod kay, sumala sa gisulat ni Solomon ilalom sa pagdasig, adunay Usa nga nakamatikod niining tanan: “Kon makakita ka nga daogdaogon ang mga kabus ug ang paghikaw sa hustisya ug pagkamatarong [imong] makita sa lalawigan ayaw kahibulong sa maong butang, kay ang usa nga anaa sa kinatas-an nagasud-ong, oo ang Labing Hataas ibabaw kanila.”​—Ecclesiastes 5:8, Rotherham.

Ang Pulong sa Diyos, ang Balaang Kasulatan, nagpakita nga si Jehova, nga Labing Hataas, walay kinutuban ang gahom ug kaalam, ug hingpit sa hustisya, ug siya ang larawan sa gugma. Sanglit ingon siya niining matanga sa Diyos, dili niya tugotang magpadayon kining walay hustisyang mga kahimtang. Ang salmistang si David misulat: “Ayaw pagkasuko nga gumikan niana makahimo ka ug daotan. Kay ang mamumuhat ug daotan pagalaglagon, apan ang mga nagahulat kang Jehova mao ang magapanunod sa yuta.”​—Salmo 37:8, 9.

May dugang kitang pasalig gikan sa mga pulong ni propetang Isaias: “Ug pagasilotan ko . . . ang mga daotan tungod sa ilang kaugalingong kasal-anan. Ug pahunongon ko ang garbo sa mga mapagawalon, ug pagapaubson ko ang pagkamapahitas-on sa mga mahariharion [mga tig-abuso sa gahom].”​—Isaias 13:11.

Apan dugay nang kasiglohan sukad nga gisulat kadtong mga pulonga, busa nganong makapiho kita nga tumanon ni Jehova nga Diyos ang iyang saad sa pagtapos sa tanang pag-abuso sa gahom? Tungod kay siya sa nangaging panahon nakapasundayag sa iyang determinasyon sa paghimo sa ingon. Sa wala pa ang Lunop sa mga adlaw ni Noe, dihay dakong pag-abuso sa gahom. Atong mabasa nga “ang yuta napuno sa kapintasan.” (Genesis 6:5, 11) Apan unsa kana nga kapintasan kondili ang pag-abuso sa gahom? Tinuod usab kana sa daotang mga siyudad sa Sodoma ug Gomorra sa mga adlaw ni Lot. (Genesis 18:20, 21; 19:24-29) Ning duha ka hitabo gitapos ni Jehova ang pag-abuso. Busa atong nakita nga si Jehova nga Diyos dili usa nga motugot sa pag-abuso sa gahom sa walay kataposan.

Ingong dugang basehanan aron kita makapiho nga molihok si Jehova mao ang kamatuoran nga siya abughoan sa iyang ngalan, ug ang tanang pag-abuso sa gahom maoy insulto sa iyang pagkahalangdon. Matikdi ang kalangkitan niining mga tekstoha: “Kadtong nagadagmal sa kabus nagatamay sa iyang Magbubuhat.” “Kadtong nagayubit sa kabus nagatamay sa iyang Magbubuhat.”​—Proverbio 14:31; 17:5.

Nan, kita makaseguro nga ang Labing Hataas dili sa tanang panahon motugot nga mayubit. Nagbilin kana ug usa na lamang ka pangutana: Kanus-a matapos ang pag-abuso sa gahom?

Kanus-a Kini Matapos?

Ang Pulong sa Diyos nagpahibalo kanato nga “adunay panahon alang sa tanang butang, gani adunay panahon alang sa tagsatagsa ka kalihokan ilalom sa langit.” (Ecclesiastes 3:1) Tingali kulang ug pailob ang uban sa orasan sa Diyos, apan kita gisultihan: “Ang Diyos dili langaylangayan bahin sa iyang saad, . . . hinunoa siya mapailobon kaninyo tungod kay wala siya magtinguha nga adunay malaglag.”​—2 Pedro 3:9.

Ang katumanan sa tagna sa Bibliya nagpakita nga kita nagkinabuhi na sa kataposang mga adlaw sa daotang kalibotan, o sistema sa mga butang. Kining kaliwatana nakakita sa katumanan sa dakong tagna ni Jesus mahitungod sa iyang presensiya ug sa konklusyon niining sistema sa mga butang: mga gubat, linog, kagutmanan, kamatay, pagdagsang sa kadaotan, ug ang pagsangyaw sa maayong balita sa Gingharian sa Diyos. (Mateo 24:1-35; Lucas 21:10, 11) Nagpunting kana sa atong panahon ingon nga mao ang kataposang mga adlaw ning daotang kalibotan.

Sanglit kataposang mga adlaw na man karon, kita makalaom sa dili madugay sa pagkakita sa tagna sa Sofonias 3:8 nga matuman: “‘Paghulat kamo kanako,’ nagaingon si Jehova, ‘hangtod sa adlaw nga ako motindog alang sa inagaw, kay ang akong hukom mao ang pagtigom sa tanang kanasoran, ug pagatigomon ko ang mga gingharian, aron ibubo ko sa ibabaw nila ang akong kayugot, ang akong nagadilaab nga kasuko; kay ang tibuok kalibotan lamyon sa kalayo sa akong pangabugho.’”

Tinuod, kadtong mga pulonga maoy pasalig nga taposon ni Jehova nga Diyos ang pag-abuso sa gahom.