Kasagarang Sayop nga mga Pagtuo

Sayop nga pagtuo: Ang mga tig-abusar ug bata kasagaran maoy mga estranghero, buangon nga mga dili-makapahaom kinsa mokidnap ug mga bata ug mogamit sa pisikal nga kusog aron sa pag-among-among kanila.

Sa kinabag-ang kaso​—gikan sa 85 ngadto sa 90 porsiento sa pila ka banabana—​ang tig-among-among mao ang usa ka tawong nailhan ug gisaligan sa bata. Inay mogamit ug kusog, ang mga tig-among-among kasagaran nga magmaneobra sa inanay sa bata aron makigsekso, nga pahimudsan ang diyutayng kasinatian ug katakos sa bata nga mangatarongan. (Itandi ang 1 Corinto 13:11 ug Proverbio 22:15.) Ang maong mga tig-among-among dili mao ang buangong mga tawo nga mopalabi nga dili makig-uban sa uban. Daghan ang relihiyoso kaayo, respetado, ug naangayan pag-ayo sa komunidad. Sumala sa Pederal nga Buro sa Imbestigasyon sa T. B., “ang pagtuo nga ang usa dili mahilig nga makigsekso ug bata tungod kay siya maayohon, tigsimba, kugihan sa trabaho, maluluton sa mga hayop, ug uban pa, maoy kataw-anan.” Ang bag-ong panukiduki nagpaila nga sayop usab ang pagtuo nga ang tanang tig-among-among maoy lalaki o ang tanang biktima maoy babaye.

Sayop nga pagtuo: Ang mga bata manghanduraw o mamakak bahin sa seksuwal nga pag-abusar.

Ubos sa kasagarang mga kahimtang ang mga bata kulang ug kasinatian o kaalam sa seksuwal nga mga butang aron sa pag-imbento sa tatawng mga pangangkon sa pag-among-among, bisan pag ang pila ka gagmayng bata tingali malibog mahitungod sa mga detalye. Bisan ang labing maduhaduhaong mga tigdukiduki mouyon nga ang kadaghanang pangangkon sa pag-among-among maoy katuohan.a Tagda ang librong Sex Abuse Hysteria​—Salem Witch Trials Revisited, nga gitumong sa bakak nga mga pangangkon sa pag-among-among. Kining libroha miangkon: “Ang tinuod nga pag-among-among sa sekso sa mga bata kaylap ug ang kinabag-an sa giingong pag-among-among sa sekso sa kabataan . . . lagmit nga makataronganon (tingali 95% o labaw pa).” Ang mga bata malisdan sa hilabihan sa pagtaho sa pag-among-among. Sa dihang mamakak sila bahin sa pag-among-among, kasagaran kaayo nga kini maoy aron dili dawaton nga nahitabo kini bisan pag kini tinuod nga nahitabo.

Sayop nga pagtuo: Ang mga bata parayegon ug kadaghanan magpahinabo sa pag-abusar diha sa ilang kaugalingon tungod sa ilang kagawian.

Kining ideyaha sa linain tinuis, sanglit, sa pagkamatuod, gibasol niini ang biktima alang sa pag-abusar. Ang mga bata walay tinuod nga ideya bahin sa seksuwalidad. Sila walay ideya kon unsay ipasabot nianang buhata o kon sa unsang paagi mousab kini kanila. Busa dili sila makaarang sa pag-uyon niana sa makahuloganong paagi. Ang tig-abusar, ug ang tig-abusar lamang, ang mabasol sa pag-abusar.​—Itandi ang Lucas 11:11, 12.

Sayop nga pagtuo: Inigbutyag sa mga bata nga nahitabo ang pag-abusar, ang mga ginikanan angay motudlo kanila sa paglikay sa paghisgot ug ‘pagkalimot niana.’

Kinsay labawng makabentaha kon ang bata maghilom bahin sa pag-abusar? Dili ba ang tig-abusar? Sa pagkamatuod, ang mga pagtuon nagpakita nga ang dili-pagdawat pinaagi sa pagpugong sa emosyon tingali mao ang labing dili epektibong paagi sa pagsagubang sa kasakit sa pag-abusar. Sa siyam ka paagi sa pagsagubang nga gigamit sa usa ka grupo sa mga nakalabang sa pag-unay nga natun-an sa Inglaterra, ang mga wala magdawat, naglikay, o nagpukgo sa isyu nakaagom sa labawng suliran sa emosyon ug kagul-anan sa kinabuhi ingong hamtong. Kon nakasinati ka ug makalilisang nga pag-atake, buot ba nimo nga ingnan ka nga dili kana hisgotan? Nganong sultihan niana ang usa ka bata? Ang pagtugot sa bata sa kasagarang pagsanong ngadto nianang makalilisang nga hitabo, sama sa kaguol, kasuko, pagbangotan, mohatag kaniyag higayon nga makasugod sa pagkaayo sa kadugayan.

[Footnote]