Mga Magmamantala sa Gingharian Nagtaho

Panalangin sa Diyos Dayag sa Venezuela

ANG kalihokan sa mga Saksi ni Jehova sa Venezuela gipanalanginan gayod. (Salmo 3:8) Sulod sa 1985 ang gidaghanon sa mga magmamantala miuswag ug 16 porsiento kay sa miaging tuig ug sa Pebrero 1986 nakaabot sa tanang-panahong kinatas-ang ihap, nga 31,247 ka magmamantala sa maayong balita. Ang regular nga mga payunir miuswag ngadto sa 2,291 sa Pebrero, ang ika-38 sunodsunod nga kinatas-ang ihap! Ang total nga 50,659 ka pagtuon sa Bibliya gidumala uban sa mga tawong interesado. Ang pila sa maong mga indibiduwal nakakontak sa kamatuoran ilalom sa talagsaong mga kahimtang.

◻ Ang usa ka bag-ong minyong lalaki nagbaton sa dungog sa pagkabohemyo. Ang kahimtang nagkadaotdaot alang niya. Siya nakapanegurong ang iyang asawa miadto sa usa ka barangan ug siya gibarang tungod sa iyang pagpangabit. Busa siya nangita sa usa ka barangan sa pagsumpo sa barang ug gipaadto sa usa ka babaye. Apan, ang babaye nagtuon na diay sa Bibliya uban sa mga Saksi ni Jehova ug mibiya na sa iyang pagpamarang. Siya miingon kaniya nga siya dili na makatabang kaniya apan iya siyang hatagag adres diin siya makaadto ug makapangayog tabang. Kadto ang adres sa Kingdom Hall. Siya mitungha​—taas ug buhok, walay pamalbas, ug dili maayog pamiste. Naangayan niya kaayo ang tigom nga siya mibalik niadtong hinapos sa semana, uban sa tulo niya ka anak. Sa maong panahon ang iyang buhok gialotan, ug siya maayog pamiste ug namalbas na. Karong adlawa, siya usa ka magmamantala sa maayong balita. Nalipay ba ang iyang asawa nga siya mihunong sa pagkabohemyo? Wala, siya hinuon nahimong masupakon kaayo! Apan ang kausabang iyang gihimo sa iyang kinabuhi nakapahibulong kaayo sa daghan nga uban nga iyang kaila, nga nag-abli sa dalan nga sila makadungog usab sa mensahe sa kamatuoran.

◻ Sa usa ka lungsod duol sa utlanan sa Colombia, ang lokal nga pari mipasiugda sa usa ka kampanya batok sa mga Saksi. Iyang gibutang ang ngalang “Mga Saksi ni Jehova” sa dagko pulang mga letra sa information board sa iyang simbahan ug sa ubos niana ang daotang propaganda batok kanila. Ang usa ka membro sa simbahan nakakita sa ngalang gipasundayag nga dayag ug, nga wala magbasa sa impormasyon sa ubos, mihinapos nga ang simbahan miuyon sa mga Saksi ni Jehova. Busa siya miadto sa usa ka tigom sa mga Saksi ug nakaangay sa iyang nakita ug nadungog. “Ngani,” matud sa taho, “ang kampanya sa pari nagpatunghag dakong interes inay sa kaatbang.” Daghan karon ang buot motuon ug moduol pa sa mga Saksi sa kalye ug mangutana kon kanus-a sila moduaw pag-usab.

◻ Ang usa ka hamubong pakigpulong sa serbisyo sa paglubong sa lubong sa usa ka bag-ong bawtismadong igsoong babaye ang nakapaarang sa laing pamilya sa Venezuela sa pagkontak sa kamatuoran. Ang usa ka medyor sa armi ug iyang pamilya, nga mga paryente sa namatay, namatig maayo sa Kasulatanhong pakigpulong ug tapos niadto nagdapit sa mamumulong ngadto sa ilang balay sa pagsusi sa mga teksto sa Bibliya nga gihisgotang detalyado. Ang resulta? Atong patubagon ang medyor:

“Ang akong asawa ug ako nahimong kuryoso ug buot mosusi sa Bibliya. Sa sinugdan ang akong tinguha mao ang pagpakita nga ako husto sa pag-angkon sa Katolikong relihiyon. Ugaling, sa matag panahong akong lalison ang usa ka punto, ang igsoong lalaki nga nagdumala sa pagtuon mobalik uban ang makataronganong punto de vista sa Bibliya. Sa mapaubsanon, akong naila nga ang kamatuoran anaa sa mga Saksi ni Jehova. Karong adlawa, ang akong asawa ug ako maoy mga Saksi ni Jehova, ug ang akong mga anak nagatuon sa Bibliya. Ako mapasalamaton sa bugtong matuod nga Diyos, si Jehova, si kinsa malipayon kong gialagaran ingong usa ka sundalo, dili uban ang unodnong mga hinagiban sa gubat kondili uban ang mga hinagibang gihatag sa espiritu sa Diyos, sumala sa 2 Corinto 10:4, 5.”

Oo, si Jehova nagapanalangin sa tugob sa iyang mga alagad sa Venezuela. Tungod sa talagsaong tumatambong sa Memoryal nga maoy upat ka pilo sa gidaghanon sa mga magmamantala, adunay dakong purohan sa dugang mga pag-uswag sa umaabot nga katuigan.

[Chart sa panid 21]

Pila ka kinatas-ang ihap sa Venezuela nga gibase sa mga taho sa Pebrero 1986:

31,247 magmamantala

2,291 payunir

50,659 pagtuon sa Bibliya

“Ang imong panalangin anaa sa imong katawhan.”—Salmo 3:8